Къару зэхэлъкIэ

Къэбэрдей-Балъкъэрым и Жылагъуэ палатэм щекIуэкIа зэхыхьэм щызэхуэсахэм Iэ щы­традзащ 2024 гъэм гъатхэпэм и 15 - 17-м ди къэралым щекIуэ­кIыну президент хэхыныгъэхэр ди респуб­ликэм хабзэм тету къы­щы­зэ­гъэ­пэ­щыным хуэгъэза зэгурыIуэныгъэм.

АбыкIэ жылагъуэ зэгухьэныгъэхэмрэ хьэ­ры­чэтыщIэу щымыт IуэхущIапIэхэмрэ къагъэлъэ­гъуащ хэхыныгъэхэр ще­кIуэкIыну махуэхэр хабзэм тету зэгъэ­кIуауэ, хуитыныгъэмрэ нахуагъэмрэ щы­тепщэу къызэгъэпэщынымкIэ, ап­хуэдэуи а ­зэманым хъыбарегъащIэ IэнатIэхэм ­къатхэмрэ Интернетым къралъ­хьэхэмрэ кIэлъыплъынымкIэ дэIэпы­къуэгъу нэсу къызэрыувыфынумкIэ шэ­сыпIэ зэрихьэр.
ЗэIущIэр къызэIуихащ КъБР-м и Жы­лагъуэ палатэм и тхьэмадэ Берд Хьэзрэталий.
- Нобэ мыбдежым фыщызэхуэтшэсащ, ди къэралым щекIуэкIыну президент хэхыныгъэхэр ­хабзэм тету ди республикэм къыщызэгъэ­пэ­щы­нымкIэ хьэ­рычэтыщIэу щымыт IуэхущIапIэхэри сэбэп зэрыхъуфынум ­теухуауэ хъыбар фэдгъащIэу, дэтхэнэми зэгурыIуэныгъэ щхьэхуэ фэт­щIы­лIэн папщIэ. Абы ипкъ иту, дэ дыхущIэкъунущ а махуэхэм хэхыныгъэхэм къекIуалIэ­хэм (зи ныбжьыр балигъыпIэм иувахэм я деж къы­щыщIэ-дзауэ жьы дыдэ хъуахэм я деж щиухыжу) Iэ зэ­рыщаIэтыр зэгъэ­кIуауэ, нахуагъэми хуитыныгъэми тегъэщIауэ, щхьэхуиту ди щIыналъэм зэрыщедгъэкIуэкIыным. ЗэгурыIуэныгъэм зэ­ри­тымкIэ, хэхыныгъэм щыдикъалэныр цIыхухэм я Iуэху еплъыкIэр къагъэлъэ­гъуэным дыхэмыIэбэу, и зэхэтыкIэ-зэ­хы­хьэкIэр зэпIэзэрыту, хабзэм тету зэредгъэкIуэкIыным дыхущIэкъунырщ, - жиIащ Берд Хьэзрэталий, зэIущIэм щIэсхэм защыхуи­гъазэм.
АдэкIэ зэхыхьэр иригъэкIуэкIащ КъБР-м и Жылагъуэ палатэм и аппаратым и унафэщI Дьяченкэ Аннэ.
- Дэ фыкъедгъэблэгъащ, 2024 гъэм и гъатхэ­пэм Президент хэхыныгъэу ди къэралым ще­кIуэкIынур, ди къару зэ­хэтлъхьэу, тэмэму къызэгъэпэща хъунымкIэ дызэрызэдэлэжьапхъэм теу­хуа зэгурыIуэныгъэ щхьэхуэхэр фыкъызыбгъэ­дэкIа IуэхущIапIэхэмрэ дэрэ зэтщIылIэн папщIэ. «Жылагъуэ штаб» зыфIэтщу къызэдгъэпэщ Iэ­натIэм и лэжьыгъэр сыткIи хуиунэтIынущ къэралым дежкIэ мыхьэнэ ин дыдэ зиIэ мы Iуэхум ­щIы­пIэхэм зэрызыщыхуагъэхьэзырымрэ езы хэ­хыныгъэхэр хабзэм тету зэрекIуэкIымрэ лъы­гъуэ­зэным. ДызыгъэгуфIэщ, а лъэныкъуэмкIэ Iуэху­тхьэбзэ зэращIэ­фынумкIэ хъыбар дагъащIэу, ­хьэ­рычэтыщIэу щымыт IэнатIэ зыбжанэм мы зэманым зэрызыкъытхуагъэзари. Зи гугъу тщIы Iуэхум теухуа зэгурыIуэ­ныгъэхэр дяпэкIи етщIы­лIэнущ ди республикэм и адрей жылагъуэ зэгу­хьэ­ныгъэхэми политикэ партхэми, - жиIащ абы.
АдэкIэ Дьяченкэ Аннэ, зырызыххэу я цIэхэр ­къриIуэурэ, утыкум къришащ къызэхуэсахэм ящыщу «Ассамблея народов России» урысей­псо жылагъуэ-къэрал зэгухьэныгъэм и Къэбэрдей-Балъкъэр къудамэм и унафэщIым и къуэдзэ ­Жэман Мадинэ, «Боевое братство» урысейпсо ­зэгухьэныгъэм и щIыналъэ къудамэм и исполкомым и тхьэмадэ Абэнокъуэ Владимир, хьэ­рычэтыщIэу щымыт «Ресурсный центр развития волонтёрства (добровольчества)» IуэхущIапIэм и республикэ къудамэм и унафэщI Хьэщэ Мила­нэ, «Экология жизни» щIыналъэ зэхуаку жылагъуэ-щIыуэпс зэщIэхъееныгъэм и тхьэмадэм и къуэ­дзэ КIарэ Залинэ, Налшык къалэ округым и жы­лагъуэ зэгухьэныгъэу «ЦIыхубзхэм я совет» зы­фIащам и пашэ Дыджэш Лидие, «Народный фронт   за Россию» урысейпсо жылагъуэ зэщIэ­хъееныгъэм КъБР-м щиIэ къудамэм и Iэтащхьэ Бакаев Евгений, Урысейм и юристхэм я зэгухьэ­ныгъэм и республикэ IэнатIэм и унафэщI Къазджэрий Людмилэ сымэ.
КъБР-м и Жылагъуэ палатэм и тхьэмадэ Берд Хьэзрэталий утыку къихьахэм зырызыххэу яIэ­щIилъхьащ щIызэхуэса Iуэхум ехьэлIауэ Зэгуры­Iуэныгъэ зэрызэращIылIам щыхьэт техъуэ тхылъ­хэр.