Сыхьэти 4-кIэ упщIэ 67-м жэуап яритащ

Урысей Федерацэм и Президент Путин Владимир пресс-конференц-теленэтын занщIэ жыпхъэм иту сыхьэти 4-рэ дакъикъи 4-кIэ цIыхухэм епсэлъащ. А зэманым къриубыдэу къэрал унафэщIым упщIэ 67-м жэуап яритащ.

Путиным зыхуагъэзащ федеральнэ, щIыналъэ журналистхэм, хамэ къэрал зэмылIэужьыгъуэхэм къикIахэм, Украинэм щекIуэкI дзэ Iуэху хэхам щыIэхэм, видео-зэпыщIэныгъэ Iэмалхэмрэ социальнэ сетьхэмрэ къэзыгъэсэбэпа цIыхубэм.  

КъэралкIуэцI, къэралщIыб Iуэхугъуэхэм ятеухуа упщIэ куэд иратащ Президентым, политикэм, экономикэм, псэукIэм, узыншагъэм, спортым, нэгъуэщI унэтIыныгъэхэми ялъэIэсащ. Апхуэдэуи езым и гъащIэмрэ еплъыкIэхэмрэ ятеухуахэр зыфIэгъэщIэгъуэнхэр куэдт.

Эфир занщIэм щIимыдзэ щIыкIэ, ар екIуэкIыху къагъэхьа упщIэхэр ЦIыхубэ фронтым зэхуихьэсащ, Президентым зи гугъу ищIахэм нэмыщI, а псоми илъэс псокIэ елэжьынущ.