Мэкъумэш IэнатIэр я нэIэ щIэтщ

Урысей Федерацэм и Президент Путин Владимир лэжьыгъэ IуэхукIэ Ставрополь крайм щыIащ. Ар хуэзащ Урысейм и мэкъумэш ­IэнатIэр зезыхьэхэм икIи абы дяпэкIэ зэрызрагъэужьынум тепсэлъыхьащ. 

Къэбэрдей-Балъкъэр Республикэм къыбгъэдэкIыу зэIущэм хэтащ «Каббалкрас­те­ние­водство»-м и генеральнэ унафэщI Къумыкъу Анзор. Абы къэрал унафэщIыр щигъэгъуэзащ ди лъахэм мыIэрысей гъэкIыным зэрызыщиужьым, абыкIэ къэралым щынэхъ лъэрызехьэхэм КъБР-р зэрыхабжэм, апхуэдэуи мыIэ­рысэм къыхэщIыкIауэ сабийхэм ирагъэшх мы­Iэрысэ хьэжа (пюре) къыщIагъэкIын зэрыщы­щIа­дзам, IэфIыкIэ щIынми куэдым зэрызратам. Къумыкъум мэкъуэш IэнатIэм пэрыт псори зыгъэпIейтей упщIэр иритащ Путиным - дизель гъэсыныпхъэм и уасэр губгъуэм итхэм къатемыхьэлъэу гъэпсын зэрыхуейр. 
«Си фIэщ мэхъу зэIущIэм щызэпкърахахэр ­IэнатIэм зиужьынымкIэ сэбэп зэрыхъунур, ­Президентым къулыкъущIэхэм пщэрылъ ящи­щIахэр зэрагъэзэщIэнур», - жиIащ КъБР-м и ­Iэтащхьэ КIуэкIуэ Казбек. 
2023 гъэм КъБР-м и мэкъумэш IэнатIэм сом меларди 3,7-рэ хухахащ. Ахэр былым гъэ­-хъуным, къэкIыгъэ гъэкIыным, ерыскъы про­мышленностым, къуажэ щIыпIэхэм зегъэу­жьы­ным трагъэкIуэдащ. Гулъытэшхуэ зыхуащIхэм ящыщщ къэкIыгъэхэм псы зэрыщIагъэлъадэ ­Iэмалхэр егъэфIэкIуэныр. Псы зыщIагъэлъадэ щIыуэ гектар мин 64-рэ диIэ хъуащ, ар щыкIэ ­нэхъыбэщ нэгъабэрейм нэхърэ. 
Iэтащхьэм зэрыжиIамкIэ, мэкъумэш IэнатIэм зегъэужьынымрэ абы пэрытхэм къэрал дэIэ­пыкъуныгъэ етынымрэ иджыри къыпащэнущ.