«ТекIуэныгъэм и диктантым» фыхэт

Къэбэрдей-Балъкъэрым мэлы­жьы­хьым и 26-м IуэхущIапIэ 78-м щатхынущ Хэку зауэшхуэм теухуа «ТекIуэныгъэм и диктант» урысейпсо тхыдэ диктантыр. Ар теухуауэ щытынущ Ленинград къа­-лэр щхьэхуит къызэращIыжрэ илъэс 80 зэрырикъум, СССР-м и гъунапкъэхэм совет зауэлIхэр зэрикIам, зэуапIэм щыIа тхакIуэхэм ящыщу зи юбилейхэм, нэ­гъуэщIхэми. Iуэхур мы гъэм еханэу къы­зэрагъэпэщ.

ЗауэлI щIыхьым и къалэу къалъыта Налшык къалэр къапщтэмэ, Бэрбэч Хь. и цIэр зезыхьэ КъБКъУ-м, КIуэкIуэ Валерэ и цIэр зезыхьэ КъБКъАУ-м, ГъуазджэхэмкIэ Кавказ Ищхъэрэ къэрал институтым, Урысей МВД-м Краснодар щиIэ универси­тетым и къудамэу Кавказ Ищхъэрэм щы­Iэм, Мэлбахъуэ Тимборэ и цIэр зезыхьэ КъБР-м и Лъэпкъ къэрал библиотекэм, ­Налшык къалэм и гимназие №1, №29-хэм, курыт еджапIэхэу №7, 9, 14, 25, 26, 33-хэм. «ТекIуэныгъэм и диктантыр» Евро-пэм и бгы нэхъ лъагэ дыдэм - Iуащхьэмахуэ - щатхынущ. 
Къэбэрдей-Балъкъэрым и цIыхухэр дапщэщи жыджэру хэтщ хэкум, дзэм, тхыдэм, теухуа зэхыхьэхэм. Иджыри ап­хуэдэу зэрекIуэкIынум шэч хэлъкъым. 
«Урысей зэкъуэт» партым и Къэбэрдей-Балъкъэр къудамэм и гъэзэщIакIуэ ко­митетым и унафэщI, «Историческая па­мять» парт проектым и жылагъуэ сове-тым и щIыпIэ къудамэм и унафэщI Парафилов Дмитрий зэрыжиIэмкIэ, Iуэхум хэтынущ «Урысей зэкъуэт» политикэ партым и депутатхэмрэ республикэ уна­фэщI­хэмрэ. 
Iуэхур зи жэрдэмхэм я дэIэпыкъуэгъущ Урысей тхыдэ зэгухьэныгъэр, Урысей дзэ-тхыдэ зэгухьэныгъэр, «Волонтёры Победы» зэщIэхъееныгъэр, министерствэ­хэмрэ IуэхущIапIэ щхьэхуэхэмрэ, уней, къэрал, жылагъуэ IуэхущIапIэхэр.
Къэралыр къапщтэмэ, «ТекIуэныгъэм и диктантыр» IуэхущIапIэ мин 26-м щат­хынущ. Абы щыщу 200-р дуней псом и къэрал 58-м къыщызэрагъэпэщащ. IуэхущIапIэ 1 минрэ  щитIрэ къызэрагъэпэ­-щащ УФ-м ШынагъуэншагъэмкIэ и ми­нистерствэм, МЧС-м, Урысей гвардием, МВД-м. КъыжыIапхъэщ, гъэ къэс Iуэхум хэтхэм я бжыгъэм къызэрыхэхъуэр, абы зэрызиубгъур. «ТекIуэныгъэм и диктантыр» бзитхукIэ (инджылызыбзэкIэ, франджыбзэкIэ, хьэрыпыбзэкIэ, китаибзэкIэ, испаныбзэкIэ) зэрадзэкIынущ.
Тхыдэ диктантыр зэуэ щатхынущ кхъухь­лъэтапIэхэм, мафIэгухэм, гъущI гъуэгу ­вокзалхэм, заповедникхэм, музейхэм, кос­модромхэм. КъищынэмыщIауэ, диктантыр зэпэIэщIэу щатх хъунущ диктант-победы.рф сайтым и «Тестхэр» Iыхьэм. 
Iуэхум теухуа пощт маркэхэр къыдагъэкIынущ икIи ахэр япэу щагъэлъэгъуэнущ Москва, ТекIуэныгъэм и музейм. Диктантым теухуа пощт маркхэм Iуэхум нэ­хъри зригъэубгъунущ.