ДунеитIым я зэхуакум
Горький Максим и цIэр зезыхьэ урыс драмэ театрым иджыблагъэ япэу щагъэлъэгъуащ «Отель двух миров» спектаклыр.
Ди зэманым и драматург цIэрыIуэ Шмитт Эрик-Эмануэль и IэдакъэщIэкI пьесэр налшыкдэсхэм къызэрымыкIуэу ягу ирихьащ. Ар зыгъэувар Балъкъэр Юрэщ.
ЦIыхур зэрытелIыкIым теухуауэ дунейпсо литературэм тхыгъэ щымащIэкъым. Дунеягъэмрэ хьэдрыхэрэ яку дэту къалъытэ цIыхур зэрыт щытыкIэм, здэщыIэ щIыпIэм, къелхэм ягъуэт гупсысэкIэм теухуауэ еплъыкIэ гъэщIэгъуэн куэд щыIэщ. Мыбыи аращ и лъабжьэр.
Спектаклым и лIыхъужь нэхъыщхьэ Жюльен Порталь (Къуэдз Расул егъэзащIэ) машинэ зэжьэхэуэм хэхуа иужь, хьэщIэщ гъэщIэгъуэн гуэрым къыщIохутэ. Абы ар щыхуозэ ипэкIэ имыцIыхуа гуэрхэм икIи къыгуроIуэ, ахэри езым хуэдэу зэрытелIыкIар. Ахэр хэти щылIэнум, хэти къыщыхъужынум йожьэ.
Утыкум тетIысхьэпIэ зыбжанэ, зы стIол (къакIуэ-кIуэжхэр щатхыу), С, В хьэрфхэр зытет гъуэгу зэхэкIыпIэхэр щыболъагъу. ИужькIэ дохутырым (Мамаладзе Элеонорэ) къызэрыдгуригъаIуэмкIэ, С-мкIэ ягъакIуэр узыфэ гуэр къызэузхэмрэ къэхъукъащIэм и зэран зэкIахэмрэщ, В-мкIэ зызыукIыжыну яужь итахэр яунэтI. ЛIыхъужь нэхъыщхьэр В-мкIэ зэрагъэкIуам папщIэ мэныкъуакъуэ, ауэ абы къыгурагъаIуэ фадэ ефэу руль зэрыдэтIысхьар езым и ягъэу, ари зыукIыжыным зэрыщыщыр.
ХьэщIэщым и администратору абы щоджэгу Нэгъуей Заур, и къуэдзэм и ролыр Накуэ Надин егъэзащIэ. Апхуэдэу спектаклым ущрохьэлIэ - Президент Дельбек (Сыбэч Алим), Раджапур Iэзэ (Щауэ Артур), узыфэ хьэлъэ къызэуз Лорэ пщащэм (Бей Маринэ), хьэщIэщыр зэлъыIузых Мари (Литфулинэ Альбинэ) сымэ. Къэхъунум ухуэпIащIэу абыхэм спектаклым ухашэри, удрагъэхьэх. Языныкъуэ лIыхъужьхэм уи гур ящIоузри, нэхъ псынщIэу хъужыну, я Iуэху зэтеувэжыну уахуохъуапсэ, языныкъуэхэм гущыкI зыхуагъэщI.
Жюльен а щIыпIэ гъэщIэгъуэным къыщыгуроIуэж и гъащIэр пщIэншэу зэригъэкIуар. Абы зыхэщIыкI, гущIэгъу иIэ мэхъу, итIанэ, фIыуэ елъагъу Лорэ пщащэ тхьэIухудыр. Апхуэдэу, я гупсысэкIэм зехъуэж а щIыпIэм къыщыхута дэтхэнэми.
ЩIагъыбзэ ин, гушыIэ шэрыуэ зыщIэлъ спекталым цIыхум и мыгъуагъэхэм я гугъу щащI икIи лъэныкъуэ куэдкIэ узыщIегъэгупсысыж. КъищынэмыщIауэ, нобэрей махуэкIэ упсэун зэрыхуейр иджыри зэ дигу къегъэкIыж.
Театрым къехъулIа спектаклымкIэ дохъуэхъу.
Таурыхъ зэхэзэрыхьа
Чуковский Корней и IэдакъэщIэкIхэр зи лъабжьэ «Перепутанная сказка» сабий спектаклыр Горький Максим и цIэр зезыхьэ урыс драмэ театрым щагъэуващ.
Абы щIидзэн ипэ, сабийхэм фIыуэ ялъагъу уэрэд цIыкIухэр театрым къыщеуэрти, щIэсхэр къанэ щымыIэу дежьуурт. Таурыхъым нэхъри удрагъэхьэхырт утыкур щхъуэкIэплъыкIэу зэрыгъэщIэрэщIам, артистхэм я щыгъын хьэлэмэтхэм.
Спектаклыр зыгъэувар КъБР-м щIыхь зиIэ и артист Толстовэ Евгениещ. Абы хузэфIэкIащ таурыхъым и купщIэр имыхъуэжу иджырей дунейм щыщ гуэрхэр хипщэн. Аращ ар сабийхэм нэхъыбэу ягу щIрихьар. цIыкIухэр темызэшэн хуэдэу, спектаклыр сыхьэт ныкъуэм къизагъэу ягъэлъэгъуащ. Пэжым ухуеймэ, япэ дакъикъэхэм щегъэжьауэ, а таурыхъым пэшым щIэс псори дихьэхыу зэреплъыр нэрылъагъут.
Сабийхэм яфIэфI гушыIэ, уэрэд, къафэхэмкIэ гъэнщIат спектаклыр.
Мэзым къыщыхъу-къыщыщIэхэр онлайн жыпхъэм иту къэзытыж кинорепортёр, Iуэхур езыгъэкIуэкIхэр шэрыуэу псалъэу спектаклым хэтщи, абыхэм теплъэгъуэхэр зэпащIэ. Зы таурыхъым адрейр къыпыувэрт, абы и гъусэу утыкур зэрыгъэщIэрэщIахэри зэрахъуэкIырт. Айболит, Муха-Цокотуха, аргъуей угъурсыз, бэдж бзаджэ, хьэндрабгъуэ тхьэIухудхэр хэтт а таурыхъ теплъэгъуэхэм.
Спектаклым щыджэгуащ – Хъупэ Марианнэ, Накуэ Надин, Дэрокъуэ Рустам, Къущхьэ ФатIимэ, Шыкъуэ Аскэр, Толстовэ Марие, Малишевская Марие, Сторожевэ Анастасие, Нэгъуей Заур сымэ.
Таурыхъ хабзэу псори зэгурыIуэжауэ, сымаджэхэр ягъэхъужауэ, щыуам къыгурыIуэжауэ, нэщхъыфIэу иухащ.
Къыхэгъэщыпхъэщ Чуковский Корней езым и IэдакъэщIкIхэр зэхилъхьэурэ зы къахищIыкIыу зэрыщытар. Абы илъэс 50 ипэкIэ и усэ 13 зэхилъхьэри, сабийхэм папщIэ литературэ къуажэхь зэхигъэуват.
Сабийхэмрэ ныбжьыщIэхэмрэ папщIэ спектакль гъэщIэгъуэнхэр зыгъэув Толстовэ Евгение ар къигъэсэбэпри, «Доктор Айболит», «Фёдориное горе», «Мойдодыр», «Муха-Цокотуха» тхыгъэхэр зэхилъхьэри, сабийхэми балигъхэми яфIэгъэщIэгъуэн спектакль утыку кърихьащ.
Пэшым щIэсахэм спектаклымкIэ замыгъэнщIауэ зэрызэбгрыкIыжыр нэрылъагъут. шэч хэлъкъым абыхэм театрым къызэрытрагъэзэнум, зымылъэгъуахэр хуаIуэтэжурэ зэрырагъэхъуэпсэнум.
Шыпсэхэр и лъабжьэу
Налшык дэт гуащэ театрым и илъэс лэжьэгъуэр зэхуищIын ипэ Овиденкэ Юлие и «Каша из топора» пьесэм къытращIыкIа спектакль щагъэлъэгъуащ.
Урыс цIыхубэ таурыхъхэр зи лъабжьэ пьесэм зэуэ шыпсэ зыбжанэ зэрыщызэхалъхьам и фIыгъэкIэ, цIыкIухэр спектаклым еплъащ яфIэгъэщIэгъуэну, яфIэщIэщыгъуэу, къэхъунум хуэпIащIэу. Сыхьэт ныкъуэкIэ екIуэкI Iуэхугъуэм цIыкIухэри къыхашат, ахэр таурыхъым хэт лIыхъужьхэм дэIэпыкъурт, упщIэхэм жэуап иратырт, къуажэхьхэр зэпеуэу къащIэрт.
Театрым и кIыщым мы спектаклым папщIэ гуащэщIэхэр, фащэщIэхэр щадат. Таурыхъым, гуащэхэм къищынэмыщIауэ, артистхэри щоджэгу. Ахэр – Линьковэ Наталье, Лобжанидзе Анжеликэ, Ульбашевэ Миланэ, Жариков Артём, Техьэж Марат, Куэшэр Анзор сымэщ.
