КъБР-м и Iэтащхьэ КIуэкIуэ Казбек Москва щыIэу, видеозэпыщIэныгъэ IэмалхэмкIэ хэтащ ЩIыналъэ зыужьыныгъэмкIэ правительствэ комиссэм и президиумым и зэIущIэм. Ар иригъэкIуэкIащ УФ-м и Правительствэм и УнафэщIым и къуэдзэ Хуснуллин Марат.
ЗэIущIэм хэтащ УФ-м и Правительствэм и УнафэщIым и къуэдзэ Чернышенкэ Дмитрий, траспортымкIэ министрым и япэ къуэдзэ Костюк Андрей, ухуэныгъэмрэ ЖКХ-мкIэ министрым и къуэдзэ Ивановэ Светланэ, «Росавтодор»-м и унафэщI Новиков Роман, хэгъэгу Iэтащхьэхэр.
Зэхуэсыр теухуауэ щытащ гъуэгу ухуэныгъэм щIыналъэхэр иужь зэритым, нобэкIэ зэфIагъэкIахэм. Апхуэдэуи гъуэгухэм ятеухуауэ 2022 гъэм зэфIагъэкIынухэм тепсэлъыхьащ. Новиков Роман къызэхуэсахэм я пащхьэ щыжиIащ щIыналъэхэм гъуэгухэр щаухуэнымкIэ иращIылIа илъэсищ зэгурыIуэныгъэр здынэсар, кърикIуахэр.
Хуснуллиным къыхигъэщащ гъуэгу ухуэным текIуадэ мылъкур зэгъэзэхуа хъун папщIэ зэгурыIуэныгъэхэр зэращIылIэн, абы ирахьэлIэхэр нэхъ щыпудым ирихьэлIэу къэщэхун зэрыхуейр.
Вице-премьерым хэгъэгу Iэтащхьэхэм гу лъаригъэтащ гъуэгу Iуэхумрэ «ПсэупIэмрэ къалэ щIыпIэхэмрэ» лъэпкъ проектымрэ зэгъусэу зэделэжьмэ зэрынэхъыфIыр, егъэджэныгъэ, медицинэ IуэхущIапIэхэм, турист екIуэлIапIэхэм и Iуэху щызэрахуэкIэ, гъуэгури абы щIыгъуу зыхуей хуагъэзэн зэрыхуейр.
ЗэIущIэм къызэрыщыхагъэщамкIэ, гъуэгу ухуэнымкIэ Къэбэрдей-Балъкъэрыр япэ итхэм ящыщщ.
Ди республикэм мы гъэм «ФIагъ лъагэ зиIэ гъуэгу шынагъуэншэхэр» лъэпкъ проектымкIэ объекти 184-м щелэжьын хуейт. Абы щыщщ километри 123-рэ хъу гъуэгу телъхьэныр, щIыпIийм щыIэ гъуэгу километр 37-р къэгъэнэхуныр, щIыпIэ 18-м гъуэгубгъухэр щыгъэбыдэныр, щIыпIи 116-м лъэс лъагъуэ зэпрыкIыпIэхэр, Т7 светофорхэр тету, щыщIыныр. Лэжьыгъэхэр щIыпIи 172-м щызэфIэкIащ, иджыри къэнэжахэм йолэжь. Налшык къалэ ЩоджэнцIыкIум и уэрамым и гъуэгу километр 1,5-р, Налшык уикIыу Май къалэм узэрыкIуэ гъуэгум и километри 4,6-р щызэрагъэпэщыж. Ахэр 2022 гъэм яухынущ.
2021 гъэм псори зэхэту гъуэгум сом меларди 2 хухахат. ЗэгурыIуэныгъэм къыщыгъэлъэгъуа пIалъэм тету и чэзум яублащ лэжьыгъэр. «ФIагъ лъагэ зиIэ гъуэгу шынагъуэншэхэр» лъэпкъ проектымкIэ республикэм къыхуаутIыпща ахъшэм и процент 98-р къагъэсэбэпащ. Апхуэдэуи «Комплексное развитие сельских территорий» къэрал программэм ипкъ иткIэ, мы гъэм къуажэхэм гъуэгу хъарзынэ щытралъхьащ.
КъБР-м и Iэтащхьэм и унафэкIэ, республикэ, щIыналъэ программэхэмкIэ екIуэкIа лэжьыгъэхэр къызыхуэтыншэу зэфIыхьащ. Гъуэгухэр тралъхьа къудей мыхъуу, ахэр ягъэнэхуащ, лъэс лъагъуэхэр ящIащ.
Мы тхьэмахуэм хэгъэгум иджыри къыхуаутIыпща сом мелуани 100-мкIэ республикэ мыхьэнэ зиIэ гъуэгу километр 11 щызэрагъэпэщыжыну я мурадщ.