Урысей Федерацэм и Президентым и полномочнэ лIыкIуэу КИФЩI-м щыIэм и деж щылажьэ Советым и зэIущIэм

Чайкэ Юрий и унафэм щIэту ­Пятигорск къалэм щекIуэкIащ Урысей Федерацэм и Президентым и полномочнэ лIыкIуэу Кавказ Ищхъэрэ федеральнэ округым щыIэм и деж щылажьэ Советым и зи чэзу зэIущIэр.

Абы щытепсэлъыхьащ округым хиубыдэ хэгъэгухэм Лъэпкъ проектхэр зэрыщагъэзащIэм, а лэжьы­-гъэр егъэфIэкIуэным, апхуэдэуи УФ-м и Президентым ЩIыналъэм и Iуэхухэр зегъэкIуэнымкIэ центрхэр (ЦУР) къызэгъэпэщыным теухуауэ пщэрылъ къащищIахэр зэрызэфIагъэкIам.
ЗэIущIэм щIэсащ УФ-м и Феде­ральнэ Зэхуэсым и Къэрал Думэм и УнафэщIым и къуэдзэ Тимо­-феевэ Ольгэ, Урысей Федерацэм ухуэ­ныгъэмрэ псэупIэ-комму­наль­нэ ­хозяйствэмкIэ и министрым и къуэ­дзэ Музыченкэ Сергей, УФ-м и ­Правительствэм проект IуэхухэмкIэ и департаментым и директор Ле­витская Юлие, Бжыгъэр зи ­лъабжьэ проектхэм зегъэу­жьы­ным­кIэ ­мылъку къызы­пэ­мыкIуэ «Диалог» автоном IуэхущIапIэм и унафэщI ­Табак Владимир, Советым хэтхэр.
2021 гъэм округым хыхьэ щIы­налъэхэм лъэпкъ проектхэр гъэзэ­щIэным хухахащ сом меларди 107,5-рэ. Абы и процент 94-р къызэра­- гъэ­сэбэпыным хуэунэтIа зэгуры­Iуэныгъэхэр зэращIылIащ, ар нэ­гъабэрей бжыгъэм нэхърэ нэхъыбэщ (процент 83-рэ). Iуэхум текIуэда мылъкур къапщтэмэ, къагъэлъэгъуа ахъшэм и процент 70,5-рэ мэхъу, блэкIа илъэсым процент 69-уэ щытащ. Ауэ къэралым и адрей хэгъэгухэм щыIэ бжыгъэхэм еб­гъапщэмэ, нэхъ мащIэщ (процент 73-рэ). 
Къэрал УнафэщIым и лIыкIуэу ­округым щыIэм жиIащ 2021 гъэм щIыналъэхэм я нэхъыбэм Лъэпкъ проектхэр зэрагъэзащIэм кърикIуа­хэм арэзы къызэрищIыр, псом хуэ­мыдэу къыхигъэщащ Къэбэрдей-Балъкъэр, Шэшэн республикэхэр.
КъБР-м Лъэпкъ прооектхэм хэту щIыналъэ проекту 47-рэ игъэхьэзыращ, 2019 - 2024 гъэхэм тещIыхьауэ абы хухаха мылъкур сом мелард 35-м щIегъу. Мы илъэсым ягъэзэ­щIэну щIыналъэ проекту 41-рэ къагъэлъэгъуат, а Iуэхум хухахащ сом меларди 8,5-рэ. Ухуэныгъэ, зэгъэ­пэщыныгъэ лэжьыгъэр щрагъэ­кIуэ­кIыну объектхэр 88-рэ хъурти, 63-р яухащ. Абы хохьэ курыт школхэр, сабий садхэр, щэнхабзэм и унэхэр, библиотекэхэр, спорт, сабий джэгупIэхэр, нэгъуэщIхэри. 2021 гъэм дыгъэгъазэм и 1-м ирихьэлIэу щIыналъэ проектхэм хухаха мылъкум и процент 86,7-р къагъэсэбэпащ. 
Мы зэманым и кIэм нагъэсыж илъэсым къриубыдэу зэфIагъэкIыну ягъэбелджыла Iуэхухэр, абы ­къы­дэкIуэуи дызытехьэну гъэм зэ­лэ­жьыну проектхэр ягъэхьэ­зыр. Нэ­хъапэIуэу республикэм и ­Iэтащ­- хьэм зэрыжиIамкIэ, щIы­налъэм со­циаль­нэ IуэхущIапIэу 70-м щIигъу щаухуэну къапэ­щылъщ.

ЗэIущIэр зытеухуа Iуэхухэм ящыщу етIуанэм щынэсым, ­Чайкэ Юрий къызэхуэсахэм ягу къигъэкIыжащ УФ-м и Пре­зидентым 2020 гъэм гъатхэпэм и 1-м хэгъэгу псоми ЩIыналъэм и Iуэхухэр зегъэкIуэнымкIэ центрхэр къыщызэрагъэ­пэщыну къалэн къазэрыщищIар.
- Къапщтэмэ, Кавказ Ищхъэрэ федеральнэ округым а пщэ­рылъыр щагъэзэщIащ. ЦУР-хэр округым и щIыналъэ псоми къыщызэIуахащ икIи муниципалитетхэм япыщIауэ Iуэхур зэтраублауэ купщIафIэу мэлажьэ. Центрхэм, цIыхухэм я тхьэу­сыхафэхэм, лъэIухэм хэплъэурэ, ахэр утыку кърахьэ, апхуэдэ гукъеуэхэр къызыхэкIыр къащIэнымкIэ социологие къэху­тэныгъэхэр ирагъэкIуэкI. Абы къегъэлъагъуэ жыла­гъуэм пыщIауэ я Iуэхур зэрекIуэкIыр. Ди жэрдэмкIэ, Урысейм щыяпэу, Пятигорск къалэм щIыналъэхэм я Iуэхухэр зэзыгъэуIу центр къыщызэдгъэпэщащ. Абы дыщигъэгъуэзэнущ хэгъэгухэм къикI хъыбархэм икIи щIыналъэ центрхэм я лэжьыгъэр щызэдгъэуIуфынущ. Сэ къызолъытэ къэрал ­по­литикэм и унэтIыныгъэхэм ящыщу къыхалъхьа мы Iуэхур Кавказ Ищхъэрэм тэмэму гъэзэщIа щыхъуауэ, - къыхигъэщащ Чайкэ Юрий. 
Къэбэрдей-Балъкъэрым ЩIыналъэм и Iуэхухэр зегъэ­кIуэнымкIэ центрыр 2020 гъэм и щэкIуэгъуэ мазэм къыщы­зэIуахащ. Мы илъэсым къриубыдэу «Инцидент Менеджмент» IэмалымкIэ цIыхухэм я лъэIуу мин 16-м щIигъум щыхэплъащ абы. Ахэр нэхъыбэу зытеухуар псэупIэ-коммунальнэ, со­циальнэ, медицинэ IэнатIэхэм, гъуэгухэм епха Iуэхухэрщ.