Нэхъыжьхэм ящIэ: цIыхухэм сыт щыгъуи хэхыныгъэхэм щIэ гуэрхэр, зыщIэхъуэпсхэр ирахьэлIэ. Ахэр сыт хуэдэ зэманым екIуэкIми. Иджырей IэIэтыр гъатхэм, дунейм и къэщIэрэщIэжыгъуэм ирихьэлIащ. Ар гугъапIэфIхэр къызэрыдэхъулIэнум и нэщэнэуи къыщIэкIыну дыхуейщ.
Апхуэдэ гупсысэхэм зэщIаIыгъэу хэхакIуэхэр екIуэлIащ Бахъсэн районым щыIэ Куба къуажэм и хэхыпIэ участкэ №22-м. Ахэр, дауи, щыгъуазэт иджырей президент хэхыныгъэхэр махуищкIэ зэрызыпашам. Ауэ куэдым я къалэныр нэхъ псынщIэу, нэгъуэщIу жыпIэмэ, япэ махуэм зэфIагъэкIащ. ИкIи щIегъуэжакъым: зи пщэрылъхэр хущIэкъуащ мы Iуэхур нэгузыужьу, щIэщыгъуэу къызэрагъэпэщыным икIи ар къайхъулIащ.
- Иджырей хэхыныгъэхэр япэ итахэм къащхьэщокI ахэр сыт и лъэныкъуэкIи хуэщIауэ зэрыщытымкIэ-къыджиIащ участкэ хэхакIуэ комиссэм и унафэщI АфIэунэ Мадинэ. - Интернетым, видеоIэмэпсымэхэм Iэмал къыдатащ ди лэжьыгъэр нахуэу, зэIухауэ едгъэкIуэкIыну. Зыми зыкIи гукъанэ къытхуищIыфынукъым: дэтхэнэми пэрыуэншэу и фIэфIыныгъэр къигъэлъэгъуащ. КъэмыкIуэфынухэр къыхэттхыкIат. Абыхэм я унэхэм дыкIуэурэ, Iэ едгъэIэтащ. Апхуэдэхэм я бжыгъэр 207-рэ мэхъу, псори зэхэту къыдэгъэбыдылIа цIыху 1670-м ящыщу. Iэ зыIэтахэм мымащIэу яхэтщ хъуэхъуахэри. Къэрал мыхьэнэшхуэ зиIэ мы Iуэхум цIыхухэм яфI къахудэкIуэну, зауэ Iуэху хэхар ди текIуэныгъэкIэ псынщIэу иухыну, зыхуей дгъуэту псори псэуну, мамырыгъэрэ зэгурыIуэрэ унагъуэхэм илъыну, ди сабийхэр узыншэну зэрагуапэр жаIащ къуажэм дэс нэхъыжьыфIхэу Къардэн Сэрэбий, Нэгуэр Лев, Шорэ Лиуан, апхуэдэу хабзэхъумэхэм я Бахъсэн район зэгухьэныгъэм жыджэру хэт Ныр Заурбэч, нэгъуэщIхэми.
Зэхыхьэр ягъэдэхащ ТхьэкIумащIэ Андулыхь и цIэр зезыхьэ езанэ курыт школымрэ зи гугъу тщIы езы хэхыпIэ участкэр здэщыIэ ЩэнхабзэмкIэ унэм и сабий къэфакIуэ гупымрэ ята концертхэм.
Дэ дахуэзащ Iэ зэраIэтым кIэлъыплъ лIыкIуэхэм. Абыхэм яхэтакъым мыарэзы.
Апхуэдэ щытыкIэ щыIащ Бахъсэн районым и хэхыпIэ участкэ псоми. Ахэр быдэу япыщIауэ щытащ щIыналъэ округми. Пэжу, дэ щыгъуазэ дызэрищIамкIэ, ар и щIагъкIэ щыIэхэм щIадэIэпыкъун хуей щхьэусыгъуэ къыкъуэкIакъым: дэтхэнэми и къалэныр ищIэжырт игъэзэщIэн папщIи Iэмал псори иIэт. Участкэхэр зыхуейхэмкIэ къызэгъэпэщат, мафIэ къыщIэнэмэ зэрагъэукIыфIыжыну Iэмэпсымэхэри яхэту. Хабзэхъумэхэри сакъыу щытащ.
Ди гуапэщ мы хэхыныгъэхэр фIы и лъэныкъуэкIэ тхыдэм хыхьэну.
