30 сентября, 2023 - 07:04
КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ зыбжанэм щыхэплъа зэIущIэ.
Къэбэрдей-Балъкъэрым и къэрал мылъкум щыщ Налшык къалэм и муниципальнэ мылъкум хэгъэхьэжыным теухуауэ КъБР-м и Правительствэм игъэбелджыла проектыр къигъэлъэгъуащ КъБР-м щIы, мылъку зэхущытыкIэхэмкIэ и министр Тэхъу Аслъэн.
ЗэIущIэм щыхэплъащ зи ныбжьыр илъэс 25-м фIэмыкIхэм хьэрычэтыщIэхэм я реестрым храгъэтха я хьэрычэт мащIэмрэ курытымрэ гранткIэ ахъшэ зэрыхухахынум и хабзэхэр зэрахъуэжым и проектым. Ар КъБР-м и Правительствэм къыхилъхьащ.
- Проектыр тещIыхьащ мылъку зратынухэр къызэрыхахыну хабзэхэм. ДяпэкIэ хьэрычэтыщIэхэр нэхъ тыншу хэтыфынущ Iуэхум. Проектыр гъэзэщIэным и мардэм къытекIхэм папщIэ санкцэ щхьэхуэхэр ягъэувынущ, - жиIащ КъБР-м экономикэ зыужьыныгъэмкIэ и министр Рахаев Борис.
КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим Май къалэмрэ Новоивановскэ жылэмрэ я зэхуакум газыр тезыгуэшэну бжьамийхэр зэрыщагъэувынур къызэрызэрагъэпэщынум и проектым и IуэхукIэ къэпсэлъащ.
2023 гъэм КъБР-м транспортымрэ гъуэгу хозяйствэмкIэ и министерствэм муниципалитетхэм папщIэ цIыхубэ транспортхэр зэрызэрагъэпэщыну мылъкум хухалъхьэным и проектым теухуауэ зэIущIэм къыщыпсэлъащ КъБР-м транспортымрэ гъуэгу хозяйствэмкIэ и министр ДыщэкI Аслъэн. Автобус 42-рэ къащэхун папщIэ министерствэм хуаутIыпщынущ сом мелуан 398-рэ мин 562-рэ.
ЗэIущIэм щытепсэлъыхьащ медицинэм и лэжьакIуэ щхьэхуэхэм дэIэпыкъуныгъэ етыным теухуа проектми.
- Федеральнэ мылъкум къыхэкI социальнэ дэIэпыкъуныгъэ щхьэхуэ зылъысынухэм ящыщщ медицинэм и лэжьакIуэхэу медицинэм емыпха щIэныгъэ нэхъыщхьэ зиIэхэр. Абыхэм ящыщщ ФIэкIыпIэ зимыIэ медицинэ Iуэхутхьэбзэм и программэм хэт биологхэр. Апхуэдэу, проектым къыщыгъэлъэгъуащ республикэм и мылъкум къыхэкIыу паллиативнэ патронаж медицинэ Iуэхутхьэбзэ зыщIэхэм мазэ къэс социальнэ мылъку щхьэхуэ иратыну, - жиIащ КъБР-м узыншагъэр хъумэнымкIэ и министрым и къуэдзэ Иттиевэ Ларисэ.
КъБР-м узыншагъэр хъумэнымкIэ и министерствэм и бюджетым хущIагъунущ худэчых зиIэхэр зыхуэныкъуэ хущхъуэхэмкIэ къызэрагъэпэщын папщIэ. Абы теухуауэ КъБР-м и Правительствэм игъэбелджыла проектым тепсэлъыхьащ КъБР-м финансхэмкIэ и министр Лисун Еленэ. КъБР-м и Iэтащхьэм и унафэкIэ къащта проектым хухахынущ сом мелуани 100.
Республикэм и къэрал егъэджэныгъэ IуэхущIапIэхэм щылажьэхэм я улахуэм теухуа зэхъуэкIыныгъэхэр зыхэт проектым тепсэлъыхьащ КъБР-м Егъэджэныгъэмрэ щIэныгъэмкIэ и министр Езауэ Анзор.
- ЗэхъуэкIыныгъэхэр ехьэлIащ егъэджэныгъэ IуэхущIапIэхэм щыIэхэм я нэхъ мащIэу къахь ахъшэм 2023 гъэм шыщхьэуIум и 1-м щегъэжьауэ проценти 10 зэрыхэхъуэм. Апхуэдэуи, зэпымыууэ пIалъэ щхьэхуэкIэ егъэджэныгъэ IэнатIэм пэрытхэм я улахуэр проценти 7-м щегъэжьауэ процент 15-м нэскIэ хэхъуэнущ. 2023 гъэм, фокIадэм и 1-м щыщIэдзауэ IэнатIэм пэрыувагъащIэ IэщIагъэлI ныбжьыщIэхэм илъэсищым и кIуэцIкIэ ахъшэ бжыгъэ щхьэхуэ хуаутIыпщынущ. Проектым республикэ мылъкум щыщу сом мелуан 46-рэ мини 137,5-рэ текIуэдэнущ, - жиIащ министрым.