ЗэхъуэкIыныгъэхэмрэ жэрдэмхэмрэ

КъБР-м и Парламентым и УнафэщI Егоровэ Татьянэ иригъэкIуэкIащ Президиумым хэтхэм я зи чэзу зэIущIэ. Абы Iуэхугъуэ 40-м щIигъум щыхэплъащ. 

ЗэIущIэм нэхъыщхьэу зи гугъу щащIар «2024 гъэм КъБР-м и республикэ бюджетымрэ 2025, 2026 гъэхэм тещIыхьамрэ ­ятеухуауэ» хабзэм и проектырщ.
Парламентым БюджетымкIэ, налогым­рэ финанс рынокымкIэ и комитетым и тхьэмадэ АфэщIагъуэ Михаил жиIащ дэфтэрхэр УФ-м Бюджет кодексымрэ ­«КъБР-м и мылъку ухуэкIэмрэ бюджет ­зегъэкIуэкIэмрэ ятеухуауэ» КъБР-м и законымрэ къагъэув мардэхэм изагъэу зэрагъэхьэзырар. 
Егоровэ Татьянэ депутатхэр къыхуриджащ финанс дэфтэр нэхъыщхьэм и дэтхэнэ Iыхьэри зэпкърахыну, ар нэхъ зэгъэщIылIа министертвэхэмрэ къулыкъущIапIэхэмрэ Iуэхум къыхашэну, хабзэубзыху орган нэхъыщхьэм и комитетым зыхуей хуэзэу щаубзыхуну. А псори и пIалъэм къриубыдэу зэфIагъэкIыу, едэIуэныгъэ зэIухахэр къызэрагъэпэщын зэры­хуейр жиIащ УнафэщIым. 
Законопроектыр Парламентым и зи чэзу зэIущIэм япэ еджэгъуэм къыщащтэну я мурадщ, ар щэкIуэгъуэм ирихьэлIэнущ. Псом япэу депутатхэм республикэ бюджетым и жыпхъэхэр яубзыхунурэ, етIуанэ еджэгъуэм ирихьэлIэу нэхъ зэпкърыхауэ, хэхъуэмрэ къагъэсэбэпымрэ теухуа статьяхэр хэту ягъэпсынущ. 
ЦIыхухэм республикэм и мылъку дэфтэр нэхъыщхьэм зыщагъэгъуэзэн ­папщIэ, ар КъБР-м и Парламентым и ­сайтым къралъхьащ https://parlament.kbr.ru.
Парламентархэр хэплъащ нэгъуэщI хабзэхэм я проектхэми. Абыхэм ящыщщ нэхъ лейуэ яхъумэ щIыпIэхэм, псом хуэмыдэу къэрал щIыуэпс заповедникхэмрэ лъэпкъ паркхэмрэ, зегъэужьыным.
КъищынэмыщIауэ, зэIущIэм щыхэ­плъащ КъБР-м медицинэ страхованэмкIэ и фондыр 2024 гъэм, къыкIэлъыкIуэну гъэхэм зыхуэдэнум, а пIалъэ дыдэм республикэ бюджетыр зэрыхъунум, щIыналъэ библиотекэхэм я тхылъ бжыгъэр зэрагъэбэгъуэфынум, Жылагъуэ палатэм и лэжьэкIэр зыубзыху хабзэм игъуэт зэ­хъуэкIыныгъэхэм, нэгъуэщIхэми. 
Президиумым хэтхэм зэпкърахащ федеральнэ законхэм я иужьрей проектхэр, хабзэм теухуауэ щыIэ жэрдэмхэр, Iуэху­гъуэ зэмылIэужьыгъуэхэм хухэхауэ УФ-м и нэгъуэщI хэгъэгухэм кърагъэхахэр. 
ЗэIущIэм и кIэухым Парламентым Экономикэ политикэмкIэ, инновацэ зыужьы­ныгъэмрэ хьэрычэт IуэхухэмкIэ и комитетым и унафэщI Iэпщэ Заур и лэжьэгъухэр щигъэгъуэзащ республикэм и Парла­ментым УФ-м 2021 - 2025 гъэхэм зэхьэ­зэхуэм зэрызыщиужьым теухуа Лъэпкъ планыр («гъуэгу картэ») КъБР-м гъэзэщIа зэрыщыхъум» ехьэлIауэ зэфIагъэкIахэм. 
Апхуэдэуи депутатхэм къызэдащтащ КъБР-м и Парламентым и ЩIыхь тхылъыр егъэджэныгъэ, спорт, гъуэгу IэнатIэхэм щылажьэхэм ящыщу зэтыпхъэхэр.