Щыхьэрым и хьэщIэхэр ягъэгушхуэ

Лъэпкъ гвардием и дзэ часту Звезднэ поселкэм щыIэм и оркестрым, «Кавказыр дыдейхэм я телъхьэщ» акцэм хыхьэу, концерт щитащ Налшык къалэ и «Кхъужьей хадэ» санаторэм икIи абы зыщызыгъэпсэхухэр игъэгуфIащ. 
Урысей гвардием и музыкантхэм хьэщIэхэм папщIэ ягъэзэщIащ «Саратов полкым и марш», уэрэдхэу «Си Лъэпкъ гвардие», «Урысейм и щIыхь», апхуэдэуи «Маньчжурием и щыгухэм» вальсыр. ЗыгъэпсэхуакIуэхэр дзэ музыкантхэм гуапэу къаIущIащ, ягъэзэщIа дэтхэнэми Iэгуауэшхуэ хуаIэтащ. 
 «Оркестрым Хэкум теухуа и репертуарым псоми иджыри зэ дигу къигъэкIыжащ дэ къэралышхуэм - Урысейм - дызэрыщыщыр», - жиIащ зыгъэпсэхупIэм и унафэщI Уэртэн Хьэчим.