«Лэгъупыкъум» - лъагъунлъагъу

Къэбэрдей-Балъкъэрым лэжьыгъэ IуэхукIэ иджыблагъэ къэ­кIуащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ Чайкэ Юрий. Ар яхуэзащ Донецк ЦIыхубэ Республикэм кърашауэ узыншагъэр щызэтрагъэувэж «Лъэгъупыкъу» («Радуга») республикэ сабий центрым зыщызыгъэпсэху ныбжьыщIэхэм. КъБР-м и Iэтащхьэ КIуэкIуэ Казбек и гъусэу, къэрал къулыкъущIэм ныбжьыщIэхэм я щыIэкIэ-псэукIэм щыгъуазэ зыхуищIащ, сабийхэм я гъусэ гъэсакIуэхэм, центрым и IэщIагъэлIхэм епсэ­лъылIащ.
Донецк республикэм хы­хьэ Макеевкэ къалэм щыщ сабий 35-рэ щыIэщ иджыпсту «Лэ­гъупыкъум». Абыхэм зы­хуей-зыхуэныкъуэ псори ирагъэ­гъуэтыным хущIокъу IуэхущIапIэм и IэщIагъэлIхэр. Къапщтэмэ, тэмэму зэрагъашхэм къыдэкIуэу, а ныбжьыщIэхэм медицинэ кIэлъыплъыныгъэ ягъуэт, я нэгу зрагъэужь, Къэ­бэрдей-Балъкъэрым и щIыпIэ дахэхэм зыщрагъэплъыхь. ­КъинэмыщIауэ, сабийхэм пап­щIэ центрым къыщызэрагъэпэщащ егъэджэныгъэри: щхьэж зыхэса классым елъытауэ, дерсхэри классщIыб лэ­жьыгъэхэри зэпэщу щокIуэкI «Лэ­гъупыкъум».
Центрым и IэщIагъэлIхэм щепсалъэм, хьэщIэ лъапIэр къы­теувыIащ узыншагъэр щызэт­рагъэувэж а IуэхущIапIэр зы­хуэ­ныкъуэхэм, абы и мылъку-техникэ лъабжьэр нэхъри гъэ­быдэным. Чайкэ Юрий зэ­рыжиIамкIэ, ар хьэзырщ а Iуэ­хухэмкIэ центрым дэIэпыкъу­-ну. Зэрагъэпэщыжыну, зы­хуей хуа­гъэзэну мурад ящIащ ныбжьыщIэхэм я джэгупIэу бгъу, компьютер пэшри щIыгъуу.
Гъунэгъу щIыналъэм къикIа сабийхэмрэ абыхэм ящIыгъу балигъхэмрэ захуигъазэри, къэралым и унафэщIым и лIыкIуэр щIэупщIащ абыхэм къыхуащI гулъытэм, яIэ Iэмалхэм, я щыIэкIэ-псэукIэм. Макеевкэдэсхэми жаIащ, кавказ щIыналъэм щыпсэухэм зэрахабзэу, абыхэм нэмыс дахэ къызэрыкIэлъызэрахьэр, гуа­пэу, зэхэщIыкI яIэу къазэрыхущытыр. Апхуэдэу абыхэм фIы­щIэ ин хуащIащ «Лэгъупы­къум» и унафэщIхэмрэ и лэжьа­кIуэ­хэмрэ, къыхуащI гулъы­тэм­рэ къазэрыдэIэпыкъумрэ пап­щIэ.
Центрым щыхьэщIэ сабийхэм Чайкэ щагъэгъуэзащ я махуэр купщIафIэу, Iуэхугъуэ хьэ­лэмэт куэдкIэ гъэнщIауэ зэры­рахьэкIым. Къапщтэмэ, ахэр гукъыдэж яIэу хэтщ къыхузэрагъэпэщ спорт зэхьэзэхуэхэм. Апхуэдэщ художественнэ гимнастикэмкIэ, акробатикэмкIэ, картингымкIэ ныбжьыщIэхэр зыхэта зэпеуэхэр. Балигъхэми сабийхэми къыхагъэщащ школ программэм къыкIэрымыхуу, я дерсхэри зэрекIуэкIым зэры­щыгуфIыкIыр.
«Лэгъупыкъум» щыхьэщIэ са­бийхэр хуабжьу щыгуфIы­кIащ лъагъунлъагъу къахуэкIуа хьэщIэ лъапIэхэр къазэры­хуэупса фэеплъ тыгъэ цIыкIу­хэм, ерыскъы щIэщыгъуэхэм, IэфIыкIэ зэмылIэужьыгъуэ­хэм.