ХьэтIохъущыкъуейхэр къыхэжаныкIащ

Зи еджапIэ кIуэгъуэ мыхъуа цIыкIухэр зыщIэс IуэхущIапIэхэм тхылъ зэкIуэцIыкIхэр, лэпбуккIэ зэджэхэр, щIынымкIэ зэхьэзэхуэ гъэщIэгъуэнхэр щокIуэкI, Бахъсэн щIыналъэр къызэрызэрагъэпэщрэ илъэси 100 щрикъум ирагъэхьэлIауэ.

ЛэпбуккIэ зэджэр нэрылъагъу Iэмэпсымэщ, балигъхэри сабийхэри зыузэщI, щIыналъэм и тхыдэм, къыщекIуэкIа Iуэхугъуэхэм, щIыуэпсымрэ дыкъэзыухъуреихь дунеймрэ теухуа теплъэгъуэхэр къызэщIэзыубыдэ тхылъщ, щхъуэкIэплъыкIэу гъэщIэрэщIарэ пшынэм хуэдэу къызэкIуэцIыкIыу щIауэ.

Зэхьэзэхуэм кърахьэлIа дэтхэнэ зы лэжьыгъэми узыIэпишэрт, пщымыгъупщэжыну зэхэлъхьат. Тхылъхэм я напэкIуэцIхэм хьэблэм, къуажэм, щIыналъэм я тхыдэм ухрагъэлъасэ къудейкъым, атIэ уи сабиигъуэр щекIуэкIа щIыпIэхэр хьэлэмэту къагъэщIэрэщIэж, щIыпIэ гуимыхужхэр хьэлэмэту къагъэлъагъуэ. Тхылъхэм уащыIуощIэ игъащIэ лъандэрэ къуажэмрэ щIыналъэмрэ щыпсэу цIыхухэм, узыщыгъуазэу щымыта лъэныкъуэ гуэркIэ щIэрыщIэу ахэр нэIуасэ къыпхуищIыжу.

Бахъсэн щIыналъэм егъэджэныгъэмкIэ и къулыкъущIапIэм хъыбар къызэритамкIэ, зэхьэзэхуэм къыщыхэжаныкIащ ХьэтIохъущыкъуей къуажэм дэт гимназиер. ЕджапIэм утыку кърилъхьа лэпбукыр интерактив 1эмалк1э бгъэлъагъуэ мэхъу, зы теплъэгъуэр къыщридзэкIэ къыкIэлъыкIуэнум уи гур темыхуэу зы ущэхуа, щIэщыгъуэ гуэр хэлъу гъэпсащ. КъэпщытакIуэхэм хьэлэмэт къащыхъуахэм ящыщщ тхылъ къызэкIуэцIыкIым QR-тхыпхъэхэр мымащIэу зэрытещIыхьар. КъызэрыщIэкIамкIэ, а тхыпхъэхэм телефоным и камерэр тебгъапсэмэ, еджэныгъэм теухуауэ сабийри балигъри зыхуэныкъуэну интернет напэкIуэцI купщIафIэхэм я хэщIапIэхэр къет, языныкъуэхэр занщIэу къызэIуехри, езы лэпбукым къигъэув къуажэхьхэм я жэуапхэр къыщыуигъэлъыхъуэу лэжьыгъэ пыухыкIам ухешэ. Шэч хэлъкъым, мы Iэмалыр цIыкIури инри зэзышалIэ бгъэдыхьэкIэщ, джэгукIэ жыпхъэм иту, уэршэрым теухуауэ, щхьэр гъэлэжьэным хуэгъэпсауэ.

КъэпщытакIуэ гупым хэтхэм зэдэарэзыуэ къыхагъэщащ зэхьэзэхуэм къыхыхьахэр хьэлэлу зэрылэжьар, щIэныгъэрэ зэхэщIыкIкIэ зыкъыщIамыгъахуэу, иджыри къэс зыри зыхуэмыза щIэ гуэркIэ зэпеуэм зэрыхэтар. Абы уфIэкIыжмэ, гу лъумытэнкIэ Iэмал иIэкъым лэпбуккIэ зэджэ тхылъ зэкIуэцIыкIхэр ауэ сытми нэгузегъэужь Iэмэпсымэу къэмынэжу, еджэныгъэмрэ гъэсэныгъэ лэжьыгъэмрэ хуэфIу щызепхьэн хуэдэу, къэралым щызекIуэ егъэджэныгъэ мардэхэм, ФГОС жыхуаIэм, пыщIауэ зэрызэхалъхьам, сабийм и ныбжьым теухуауэ зыIэригъэхьэн хуей есэныгъэхэр къызэралъытар. Абы и IуэхукIэ зэхьэзэхуэм хэтахэм псоми фIыуэ утыкум зыщагъэлъэгъуащ, зыми щыщIэныгъэ иIакъым.

Ауэ, зэпеуэ щыхъукIэ, пашэныгъэр зыхь щыIэщи, и кууагърэ гъэпсыкIэкIэ сыт и лъэныкъуэкIи утемыукIытыхьыжу утыкушхуэ ипхьэ хъуну къалъытащ хьэтIохъущыкъуей егъэджакIуэхэм я IэщIагъэр.