ГугъэфIхэр уэзыгъэщI спортсмен щIалэщIэ

Мы махуэхэм Тэрч щIыналъэ администрацэм гуфIэгъуэ зэIущIэ щызэхэтащ. Абы щагъэлъэпIащ алыдж-урым бэнэкIэмкIэ Урысей Федерацэм и чемпионату Владимир областым хыхьэ Суздаль къалэм щекIуэкIам зэфIэкI лъагэхэр къыщызыгъэлъэгъуа Гъуэныбэ Iэуесрэ абы и гъэсакIуэ Белгъэрокъуэ Эдуардрэ.
Килограмм 82-м нэблагъэ зи хьэлъагъхэм я зэхьэзэхуэм пэщIэдзэ зэIущIэхэм шэч къызытумыхьэн текIуэныгъэхэр къыщызыхьа Гъуэныбэ Iэуес финал ныкъуэ зэпэщIэтыныгъэм хьэрхуэрэгъу къыщыхуэхъуащ Токио щекIуэкIа Олимп джэгухэм хэта Чихиркин Александр. ЗэIущIэм хухаха зэманыр 3:3-уэ иухащ, арщхьэкIэ иужьрейуэ балл къэзыхьар Чихиркинырати абы текIуэныгъэр къыхуагъэфэщащ икIи домбеякъ медалыр зыIэригъэхьащ. Юниорхэм я деж къыщихьа текIуэныгъэ дахэхэм къыкIэлъыкIуэу Гъуэныбэм и ехъулIэныгъэхэм къыщыпищащ япэу зыхэта балигъхэм я чемпионатым.
ЩIыналъэм щыщ спортсменхэу олимп спорт лIэужьыгъуэхэмкIэ Урысей Федерацэм и командэ къыхэхам хэтхэмрэ абыхэм я тренерхэмрэ ахъшэ саугъэткIэ гъэлъапIэным теухуауэ Тэрч муниципальнэ районым щIыпIэ самоуправленэмкIэ и советым и сессием къыщащта унафэм ипкъ иткIэ Гъуэныбэ Iэуесрэ абы и гъэсакIуэ Белгъэрокъуэ Эдуардрэ ахъшэ къызэрыхахыну сертификатхэр яритащ щIыналъэм и Iэтащхьэ Дадэ МуIэед.
Iэтащхьэм абыхэм захуигъазэу жиIащ: «Iэуес ехъулIэныгъэкIэ зыкъыщигъэлъэгъуащ япэу зыхэта алыдж-урым бэнэкIэмкIэ Урысей Федерацэм и чемпионатым. АдэкIи зэрыхигъэхъуэн гъэтIылъыгъэхэр иIэщ икIи ди гуапэу и текIуэныгъэхэм дыкIэлъыплъынущ».

Къэхъун Бэч.
Поделиться: