Урысейм щынэхъ лъэщхэр

Дзюдо
 

Красноярск къалэм Ярыгин Иван и цIэр зэрихьэу дэт спорт уардэунэм иджыблагъэ щекIуэкIащ Урысейм дзюдомкIэ пашэныгъэр къыщыхьыным хуэунэтIа зэхьэзэхуэ. Абы хэтащ къэралым и щIыналъэхэм ящыщу 63-м я бэнакIуэу 540-рэ, щIалэхэри хъыджэбзхэри зэгъусэу, я ныбжькIэ илъэс 23-м щIимыгъуауэ икIи ахэр гуп 14-у гуэшауэ щытащ.

Къэбэрдей-Балъкъэрым и щIыхьыр ихъумэу зэпеуэм хэта Замбат Къантемыр зэхьэзэхуэм и япэ махуэм япэ зэIущIитхур и хьэрхуэргъухэм къафIихьри, кIэух зэхьэзэхуэм щыIущIащ Ставрополь крайм и бэнакIуэ Тумасянц Леван икIи, ди жагъуэ зэрыхъущи, ар къытекIуащ, дыжьын медалыр и Iэрылъхьэуи къигъэзэжащ. Ди щIалэр щыбанэр килограмм 66-рэ зи хьэлъагъхэм я дежщ. 
ЕтIуанэ махуэм утыкум къихьащ Ало Мухьэмэд. КIэух зэхьэзэхуэм и Iыхьэ ныкъуэм ар щыхуэзащ Шэшэным и бэнакIуэ, иужькIэ чемпион хъуа Шабиханов Сайхъан, икIи ди щIалэм ар къытекIуащ. ИужькIэ, финал «цIыкIум» Мухьэмэд къебэнащ Иркутск областым и дзюдоист Бобылёв Андрей. Мыбдежым ди щIалэр нэхъ лъэщу къыщIэкIащ, абы кърикIуэуи, домбеякъ медаль къихьащ. Ало Мухьэмэд щыбанэр килограмм 73-рэ зи хьэлъагъхэм я дежщ.
Зэхьэзэхуэм и ещанэ махуэм Къэбэрдей-Балъкъэрым и бэнакIуэхэм иджыри медалищ ди республикэм къыхуахьащ. ЯпэщIыкIэ, кIэух зэпеуэм и Iыхьэ ныкъуэм килограмм 90 зи хьэлъагъхэм я деж ди щIалитI щызэхуэзащ – Къуныжь Роланрэ Абазэ Астемыррэ. Мыбдежым Абазэр щытекIуэри, финалым икIащ икIи адэкIэ абы къыщыпэщIэта Волгоград областым и спортсмен Айсин Дамир хигъащIэри, зэхьэзэхуэм и дыщэ медалыр къихьащ. 
Финал «цIыкIум» адэкIэ щыбэна Къуныжь Ролан къыпэщIэтащ Санкт-Петербург къалэм и командэм хэт дзюдоист лъэщ Эдилсултанов Ихван. Мыбдежым ди щIалэр нэхъ лъэщу къыщIэкIащ икIи домбеякъ медалыр къихьащ. 
Килограмми 100 хъухэм я деж щыбанэ Быф Идар зэхьэзэхуэм и кIэух Iыхьэ ныкъуэм Челябинск къалэм щыщ Павлюков Анджей къытекIуэри, финал «цIыкIум» домбеякъ медалым щыщIэбэнащ. Абдеж абы къыщыпэщIэтащ Пермь къалэм и бэнакIуэ Оборин Данил, ауэ адыгэ щIалэм ещанэ увыпIэр зыIэщIигъэкIакъым. 
Апхуэдэ щIыкIэкIэ, Къэбэрдей-Балъкъэрым и командэм ехъулIэныгъэхэр иIэу зэхьэзэхуэм зыкъыщигъэлъэгъуащ икIи медаль хъушэ абы къыщихьащ – дыщэрэ дыжьыну зырыз, домбеякъыу щы. Афэрым, яжыдоIэ ди щIалэ пелуанхэм!