Урысей Федерацэм и Къэрал Советым и комиссэм, Правительствэм ЩIыналъэхэм зегъэужьыныгъэмкIэ и штабым, УФ-м Ухуэныгъэмрэ псэупIэ-коммунальнэ хозяйствэмкIэ и министерствэм и коллегием зэхэту къызэрагъэпэща зэIущIэм хэтащ Къэбэрдей-Балъкъэрым и Iэтащхьэ КIуэкIуэ Казбек.
Урысей Федерацэм и Правительствэм и УнафэщIым и къуэдзэ Хуснуллин Марат и нэIэ щIэту екIуэкIа зэхыхьэм къыщыпсэлъащ УФ-м и Президентым и дэIэпыкъуэгъу, Къэрал Советым и тхьэмадэ Левитин Игоррэ абдежым щыIэ комиссэм и пашэ Минниханов Рустамрэ, зи гугъу тщIы министерствэм и тхьэмадэ Файзуллин Ирек, федеральнэ властым и гъэзэщIакIуэ IуэхущIапIэхэм я лIыкIуэхэр, щIыналъэхэм я Iэтащхьэхэр.
ЗэIущIэм къыщапщытэжащ УФ-м Ухуэныгъэмрэ псэупIэ-коммунальнэ хозяйствэмкIэ и министерствэм гъэ блэкIам хузэфIэкIахэр. Апхуэдэуи, къызэхуэсахэр щхьэхуэу хэплъащ 2030 гъэ пщIондэ къэралым и экономикэм ухуэныгъэмкIэ и къудамэмрэ псэупIэ-коммунальнэ хозяйствэмрэ зэрызаужьын хуейм тещIыхьа программэм.
Левитин Игорь къыщыпсалъэм къыхигъэщащ къэралым псэупIэщIэхэр щыщаухуэкIэ Iэмалуи тегъэщIапIэ нэхъыщхьэуи къыхахыпхъэр. Ар иджырей пщалъэхэмрэ технологиещIэхэмрэ тещIыхьа унэтIыныгъэхэм тетынырщ.
«УФ-м и Президентым Iэ зыщIидза дэфтэрым зэритымкIэ, къэралым и экономикэм дежкIэ мыхьэнэ ин зиIэщ къалэхэмрэ абыхэм къедза Iэгъуэблагъэмрэ ухуэныгъэщIэхэр къыщрахьэжьэкIэ а Iуэхур зэгъэщIылIа икIи зылъэIэс лъэныкъуэ псори зэщIэгъэуIуэныр икIи зэдегъэкIуныр. Апхуэдэщ, унэщIэхэр къыщаIэт хьэблэхэм къыщыунэху автомашинэ зекIуапIэщIэхэр зыхуей хуэгъэзэнри, жьы хъуа унэхэмрэ къамыгъэсэбэпыж промышленнэ IуэхущIапIэхэмрэ здэщыт щIыпIэхэм зэхъуэкIыныгъэ инхэр къазэрыщыпэплъэри, къалэхэм зыгъэпсэхуакIуэу къыдыхьэхэм я бжыгъэм кIэремыгъэхунымкIэ IэмалыщIэхэр къызэрыгъэсэбэпыпхъэри», - щыжаIащ зэIущIэм.
Къэбэрдей-Балъкъэрыр къэтщтэнщи, 2021 гъэм фэтэр куэд зыхэт унэу 39-рэ щаухуащ. Ар, метр зэбгъузэнатIэу яхузэфIэкIам тетщIыхьмэ, 2020 гъэм зрагъэхъулIам елъытауэ, проценти 2,8-кIэ нэхъыбэщ,
Къалэхэм ухуэныгъэхэр щIэгъэхуэбжьауэ щрагъэкIуэкIыныр, шэч хэмылъу, елъытащ абыхэм хухах щIыпIэр псыкIэ ирикъуу къызэрызэгъэпэщами. А лъэныкъуэмкIэ къыхэгъэщыпхъэщ 2022 - 2024 гъэхэм ди республикэм и къалащхьэм щрагъэжьэну ухуэныгъэхэм псы ешэлIэным, къагъэсэбэпар Iушыжыным пыщIа инженер Iэмалхэр зыхуей щыхуэгъэзэнымкIэ, федеральнэ, щIыналъэ бюджетхэм къахэкIыу, сом мелардым щIигъу зэрыхухахари.
ЗэIущIэм кърикIуахэр щызэхилъхьэжым, республикэм и Iэтащхьэ КIуэкIуэ Казбек къыхигъэщащ: «Налшык къагъэсэбэпа и псыр лъэныкъуэкIэ Iузыш инженер ухуэныгъэхэр зэхъуэкIын щIэдзэнри, а лъэныкъуэмкIэ Тырныауз къалэм хухэха проектыр зэхэгъэувэныр и кIэм нэгъэсынри 2022 гъэм зэфIэдгъэкIыну ди мурадщ. Мы зэманым щIэддзащ Бахъсэн и псыхъуащхьэхэм-кIэ щыIэ Азау хуейм деж къыщыщIэдзауэ Эльбрус посёлкэм нэс псы къагъэсэбэпар зэрыIуаш коллекторыр зэгъэпэщыжыныр. Гъэ къакIуэ Дзэлыкъуэ щIыналъэм ит къуажэхэр псы къабзэкIэ къызэгъэпэщыным хуэгъэза лэжьыгъэми пытщэнущ. Проектхэм я нэхъыбэр «Кавказ Ищхъэрэ федеральнэ щIыналъэм и зыужьыкIэ» къэрал программэм хеубыдэ».