УФ-мрэ КъБР-мрэ цIыхубэ къафэхэмкIэ щапхъэу къыщалъыта, «Урысейм щIыхь зиIэ и ансамбль», республикэпсо, урысейпсо, дунейпсо фестивалхэмрэ зэпеуэхэмрэ я лауреат, «Кавказ Ищхъэрэм и вагъуэщIэ» щIыхьыцIэр къызыхуагъэфэща, «Урысей Артиадэм» и лауреат, ЩIалэгъуалэмрэ студентхэмрэ я XIX дунейпсо фестивалу 2017 гъэм Сочэ къалэм щекIуэкIам хэта, КъБР-м и Правительствэм и щIыхь тхылъыр мызэ-мытIэу зыхуагъэфэща «Нал цIыкIу» ансамблыр республикэр зэрыгушхуэ къэфакIуэ гуп нэхъыфIхэм ящыщщ.
Къэбэрдей-Балъкъэрым исхэр дызэрыгушхуэ, нэхъыжьхэми нэхъыщIэхэми фIыуэ тлъагъу «Нал цIыкIу» ансамблым Урысейм, республикэм и щэнхабзэм, къафэ гъуазджэм хуищI хэлъхьэныгъэр къэлъытэгъуейщ. Артист ныбжьыщIэхэм я къафэхэмрэ утыку итыкIэмрэ гур хэзыгъахъуэщ. Дауи, ар зи фIыгъэр ансамблым и унафэщI Куэшей Аликрэ гупым и гъэсакIуэхэмрэщ.
Къэбэрдей-Балъкъэр, Ингуш республикэхэм щэнхабзэмкIэ щIыхь зиIэ я лэжьакIуэ, балетмейстер Куэшей Алик «Нал цIыкIу» ансамблыр 1987 гъэм къызэригъэпэщащ. Ди къэралми дунейпсо зэпеуэхэми гупыр мызэ-мытIэу пашэ щыхъуащ, Кавказ Ищхъэрэм и республикэхэм щэнхабзэмкIэ я министерствэхэм я щIыхь тхылъхэр къыхуагъэфэщащ. Абы зыкъыщигъэлъэгъуащ Тыркум, Грецием, Израилым, Иорданием, Словением, Франджым, нэгъуэщI къэралхэми.
Ансамблым и гуп нэхъыщIэр 2011 гъэм къызэрагъэпэщащ, адэ-анэхэм я лъэIукIэ. Абы илъэситху зи ныбжь сабийхэр йокIуалIэ. Къафэм гу хуэзыщIа цIыкIухэм я бжыгъэм махуэ къэс къахохъуэ. ЗэрыгурыIуэгъуэщи, абыхэм уадэлэжьэн папщIэ шыIэныгъэ пхэлъын, сабийхэр фIыуэ плъагъун хуейщ. Гупым я балетмейстерщ «Нал цIыкIу» ансамблым илъэситху зэрыхъурэ къыщыфэу щыта Борсэ Русланрэ Мамрэш Наирэрэ.
Гур хагъахъуэ нэхъ цIыкIу дыдэхэмрэ ныбжьыщIэхэмрэ я утыку итыкIэ дахэм. Iэдэбу, зэкIужу, я бгыр псыгъуэрэ я пкъыр ухуауэ утыкум ит щIалэхэмрэ хъыджэбзхэмрэ, къафэ гъуазджэм къыдэкIуэу, лъэпкъым и щэнхабзэ хъугъуэфIыгъуэхэм, хабзэм, зыIыгъыкIэм, дуней тетыкIэм зэрыхащIыкIым гу лъыботэ.
Гупыр щыIащ Геленджик къалэм пэгъунэгъу Кабардинкэ жылэм. Абы щекIуэкIа фестиваль-зэпеуэм пашэ щыхъуащ «Нал цIыкIу» ансамблым и къэфакIуэхэр. Нэхъ цIыкIу дыдэхэм ящыщ Мамхэгъ Айдэмир къыхуагъэфэщащ зэпеуэм и кубокымрэ щIыхь тхылъымрэ. Апхуэдэу къэфакIуэ цIыкIухэр хэтащ Кавказ Ищхъэрэ федеральнэ щIыналъэм и цIыхубэ хъыбарегъащIэ IэнатIэхэм я етIуанэ зэIущIэшхуэу Ставрополь щекIуэкIам. Зэхыхьэм хэтхэм щIэщыгъуэ ящыхъуащ сабийхэм я фащэмрэ къафэмрэ.
Республикэм и щэнхабзэ гъащIэм жыджэру хэт гупым ЩIалэгъуалэмрэ студентхэмрэ я XIX дунейпсо фестиваль 2017 гъэм Сочэ къалэм щекIуэкIа-ми жыджэру зэрызыкъыщагъэлъэгъуам папщIэ фэеплъ медалрэ УФ-м и Президент Путин Владимир и Iэр зыщIэлъ щIыхь тхылърэ къыхуагъэфэщащ.
Сабийхэмрэ ныбжьыщIэхэмрэ папщIэ къызэрагъэпэща «Нал цIыкIу» псапащIэ фондым и унафэщI Борсэ ХьэIишэт зэрыжиIэмкIэ, ансамблыр республикэм щекIуэкI псапэ Iуэхухэм жыджэру хэтщ, жьы хъуахэм, сабий зеиншэхэм папщIэ концертхэр ят. Адэ-анэхэм «Нал цIыкIу» ансамблым и гъэсакIуэхэм фIыщIэ хуащI я сабийхэр лъэпкъ щэнхабзэм, гъуазджэм зэрыдрагъэхьэхым, щIэблэм къафэр зыхалъхьэ щымыIэу къызэрагъэхъум папщIэ.
