Футболым и дунейпсо махуэм ирихьэлIэу

Футболым и дунейпсо махуэр ХьэтIохъущыкъуей къуажэм щыгъэлъэпIащ. Абы хухэхауэ екIуэкIащ Бахъсэн щIыналъэм и топджэгу зэхьэзэхуэ. 
Спортсмен ныбжьыщIэхэм захуигъэзащ икIи джэгукIэ дахэ къагъэлъэгъуэну ехъуэхъуащ Бахъсэн щIыналъэ администрацэм и Iэтащхьэм и къуэдзэ Къэзан Заур. «Дэтхэнэ къуажэми сабийхэм футболым зыщыхуагъасэ. ИкIи, ди гуапэу къыхэдгъэщынщи, абыхэм ящыщ куэдым гугъэфIхэр уагъэщI», - жиIащ абы. 
ЗэпэщIэтыныгъэ гуащIэхэм пашэныгъэр щаубыдащ ХьэтIохъущыкъуей къуажэм дэт етIуанэ курыт еджапIэм и командэр. ЩIыналъэ зэхьэзэхуэм етIуанэ увыпIэр къыщахьащ Бахъсэнёнкэ и езанэ курыт еджапIэм. Домбеякъ медалхэр зэдагуэшащ ХьэтIохъущыкъуей дэт ещанэ курыт еджапIэмрэ кадет школ-интернатымрэ я командэ къыхэхахэм. 
ЗэущIэхэр щызэпагъэухэм и деж къекIуэлIахэм я нэгу зрагъэужьащ къуажэм и творческэ гупхэм ягъэхьэзыра теплъэгъуэхэмкIэ. 
ТекIуахэмрэ къыхэжаныкIахэмрэ медалхэмрэ Бахъсэн щIыналъэ администрацэм ЩIалэгъуалэм ядэлэжьэнымрэ спортымкIэ и къудамэм и грамотэхэрэ иратащ.