Дунейпсо зэхьэзэхуэр я плъапIэуМэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэхуэ. Абы хэтащ зи щIалэгъуэ спортсмен нэхъ лъэщхэм ящыщу 700-м нэблагъэ. Къэбэрдей-Балъкъэрым къыбгъэдэкIыу абы щыIащ «Пять колец» спорт академием и гъэсэнхэр икIи зэхьэзэхуэм и япэ махуэм Тхьэмокъуэ Элинэрэ Иуан Дианэрэ, дагъэгуфIэу, медаль зэхуэмыдэхэр къытхуахьащ. Абыхэм тIуми я зэфIэкI щагъэлъагъуэр килограмм 42-рэ зи хьэлъагъхэм я дежщ. АтIэ, Тхьэмокъуэм къэрал зэпеуэм дыщэ медаль къыщихьащ, Иуаныр ещанэ хъуащ. КъыкIэлъыкIуэ махуэм ди щIалэхэми наIуэ къащIащ зэрымыхуэмыхур. Килограмм 59-рэ хъухэр зыхэт гупым зыкъыщызыгъэлъагъуэ Бицу Къантемыр иригъэкIуэкIа зэIущIитхуми щытекIуэри, зэхьэзэхуэм и дыщэ медалыр къихьащ. Iусен Дамири япэ увыпIэм нэсыным зы лъэбакъуэ фIэкIа къыхуэмынэжауэ кIэух зэпеуэр иригъэхьащ. Мыбдежми, ди щIалэм зэIущIитху къыпэщылъащ текIуэныгъэр къихьын папщIэ, щызауэри килограмм 55-рэ хъухэм я дежщ. Ещанэ махуэм Къэбэрдей-Балъкъэрым и командэм иджыри зы медаль къыхэхъуащ, ари – дыщэу! Ар къытхуэзыхьар Хубуловэ Анжеликэщ (кг 68-рэ). Иджы екIуэкIа зэхьэзэхуэм щытекIуахэм Iэмал ягъуэтащ къэралым и командэ къыхэхам хэту мы гъэм бжьыхьэм Корее Ипщэм щекIуэкIыну дунейпсо зэхьэзэхуэм хэтыну Ди командэм и тренерхэр Ахъмэт Амир, Тикаев Индрис, Унэжокъуэ Абдельджэбар сымэщ. ХЬЭЩЫКЪУЕЙ Олег.
Поделиться:
Читать также:
25.04.2024 - 17:30 →
Олимп чемпионыр ящыгъупщэркъым
25.04.2024 - 17:00 →
Кубокыр къыздашэ
23.04.2024 - 20:03 →
Уанэш зэхьэзэхуэшхуэ
23.04.2024 - 17:06 →
Гуп зэпеуэм япэ щыхъуащ
23.04.2024 - 15:26 →
Урысейм щынэхъ лъэщхэр
|