Мэзкуу щIыналъэм хыхьэ Наро-Фоминск къалэм щIышылэм и 18 - 20-хэм щекIуэкIащ Урысей Федерацэм алыдж-урым бэнэкIэмкIэ и чемпионат. Зэхьэзэхуэм хэтащ Къэбэрдей-Балъкъэрым и бэнакIуэ нэхъ лъэщхэри икIи екIуу абы зыкъыщагъэлъэгъуащ.
Уэзрэдж къуажэм щыщ Кабалоев Виталий зыхэта гупым (кг 55-рэ) япэ махуэм щытекIуащ икIи апхуэдэ щIыкIэкIэ Урысей Федерацэм тхуэнейрэ и чемпион хъуащ. Дыщэ медалыр ди щIалэм къыфIихьащ Краснодар крайм и бэнакIуэ Осипов Амаяк, зэIущIэм и бжыгъэр 2:1-уэ.
Килограмм 63-рэ зи хьэлъагъхэм я деж щыбанэ Локьяев Жамболэт кIэух зэхьэзэхуэр иригъэхьащ Мордовием и бэнакIуэ Емелин Сергей. Иджыри зы дыжьын медаль ди командэм къыхуихьащ килограмми 130-рэ хъухэм я деж щыбанэ КIэмпIарэ Марат. КIэух зэпеуэм абы къыщытекIуащ Лабазанов Нохъчэ.
Килограмм 87-рэ хъухэр щызэпэщIэтахэм я деж ещанэ увыпIэр къыщихьащ Гъуэныбэ Iэуес. Къыхэдгъэщынщи, ди щIалэр щыбанэр килограмм 82-рэ хъухэм я дежщ, ауэ Олимп джэгухэм апхуэдэ хьэлъагъ зиIэхэр зэрыхэмытым къыхэкIыу, килограмм 87-м я гупым щыбэнэн щIидзащ. Iэуес мызэ-мытIэу жиIащ ар абы и плъапIэу зэрыщытыр.
Чемпионатым и етIуанэ махуэм Къэбэрдей-Балъкъэрым и гъэсэнхэм иджыри медалитI къахьащ. Килограмм 67-м хъухэм я деж ГуIэжьей Iэдэм ещанэ щыхъуащ. ЗэIущIэм и бжыгъэр 6-3-уэ ар къыфIихьащ Алтай крайм и бэнакIуэ Новичихин Максим. Иджыри зы домбеякъ медаль зыIэригъэхьащ килограмм 82-рэ зи хьэлъагъхэм я деж щыбанэ Псэун Станислав. ЗэIущIэм и бжыгъэр 3:1-уэ ар текIуащ Приморскэ крайм и бэнакIуэ Зубков Вячеслав.
Урысей Федерацэм алыдж-урым бэнэкIэмкIэ иджы екIуэкIа чемпионатыр Олимп джэгухэм зи зэфIэкI къыщызыгъэлъэгъуэфынухэр къызэрыхах зэхьэзэхуэу щытащ.
