Спорт

                                                                                           Тхэквондо

         ТхэквондомкIэ 6-нэ дунейпсо зэхьэзэхуэ Тайландым щекIуэкIащ иджыблагъэ. Абы хэтащ къэрал 21-м къикIа  спортсмен лъэрызехьэу 2000-м щIигъу.

 Къэбэрдей-Балъкъэрым щыщу илъэс 12 – 14 хъухэм я гупым хэтащ Тхьэмокъуэ Элинэрэ (килограмм 33-рэ) Къэзанш Къасболэтрэ (килограмм 57-рэ) - тIуми япэ увыпIэр яубыдащ. Абы къегъэлъагъуэ ди спортсмен ныбжьыщIэхэр Урысейм и командэ къыхэхам лъабжьэ хуэхъуахэм зэращыщыр. Иджы ахэр кIуэнущ дызыхуэкIуэ мазэм Боснием щызэхэтыну дунейпсо чемпионатми, дащыгугъынщ я текIуэныгъэхэмкIэ дагъэгуфIэну.

                                                                                        Атлетикэ псынщIэ

                            ТIуми домбеякъ медаль къахь

         Белоруссием и Брест къалэм спортсмен 400-м нэблагъэ зыхэта зэпеуэ щекIуэкIащ  мы къэралыгъуэм и Кубокыр къэхьыным щIэбэну. Урысейм икIа спортсменхэр 22-рэ хъурт. Абыхэм яхэта, ди республикэм щыщ Добренький Александр дискыр нэхъ жыжьэу дзынымкIэ ещанэ увыпIэр къихьри, домбеякъ медалыр къратащ.

         Мы спорт лIэужьыгъуэмкIэ илъэс 18 нэхърэ мынэхъыжьхэм я Урысейпсо зэпеуэ Москва щекIуэкIати, ди щIыпIэм щыщ Уэзрокъуэ Роман ещанэ увыпIэр къыщихьащ.

                                                                                                                                                                                         Дзюдо

                          МедалищкIэ къыхожаныкI

 Урысейпсо зэхьэзэхуэу Армавир щекIуэкIам Къэбэрдей-

Балъкъэрым икIа спортсменхэм медалищ къыщахьащ.

         Мыбы хэтащ илъэс 21-рэ нэхърэ мынэхъыжь  щIалэхэмрэ хъыджэбзхэмрэ - щIыналъэ зэмылIэужьыгъуэу 25-м щыщу  ц1ыху 300-м щIигъу.

         Килограмм 55-рэ зи хьэлъагъхэр зыхэта гупым  япэ увыпIэр щиубыдри, дыщэ медаль къихьащ Къэбэрдей-Балъкъэрым щыщ спортсмен Шад Алымбэч. Иджы ар хэтынущ бжьыхьэм Тулэ щекIуэкIыну Урысейпсо чемпионатым.

         Адрейхэу ди командэм къыхэжаныкIар ещанэ увыпIэр къэзыхьу домбеякъ медаль къызрата Жэмыхъуэ Маратрэ (килограмм 66-рэ) Мэкъуауэ Рустамрэщ (килограмм 81-рэ).

                                                                                                        Самбэ

                                   Пэнагуэ Казбек и фэеплъу

 СССР-м спортымкIэ и мастер Пэнагуэ Казбек и фэеплъу 26-нэ зэхьэзэхуэ щрагъэкIуэкIащ Тэрч къалэм. Мыбы хэтащ щIыпIэ зэмылIэужьыгъуэ 25-м къикIа спортсмени 130-рэ.

         Я хьэлъагъ елъытакIэ гупийуэ ягуэшауэ щытащ зэпеуэм кърихьэлIахэр. Къэбэрдей-Балъкъэрым и спортсменхэм медалих къахьащ. Зыхэта гупхэм япэ увыпIэр къыщахьащ   Къыз Айдамыр (килограмм 53-рэ), ЗэкIурей Къаплъэн (килограмм 64-рэ), Къущхьэ Жамболэт (килограмм 88-рэ). ЕтIуанэ увыпIэр Бабыгуей Олег (килограмм 79-рэ), ещанэр КъуэщIысокъуэ Идаррэ ХъутIэ Тамерланрэ (килограмм 64-рэ) къахьащ.

                                                                                    ШАФИЙ Аслъэн.