ГъуэгущIэ тралъхьэнущ, псэуалъэщIэхэр яухуэнущ

  Налшык къалэм и Iэтащхьэ Алэкъей Арсен, КъБР-м ухуэ­ны­гъэм­кIэ, ЖКХ-мрэ гъуэгу хозяйст­вэмкIэ и министр Къуныжь Вячес­лав, республикэм транспортымрэ свя­­зымкIэ и къэрал комитетым и унафэщI Къудей Арсен сымэ пресс-конференц ирагъэ­кIуэкIащ. Ар теу­хуауэ щытащ Налшык Мэлбахъуэм и цIэр зезыхьэ уэрамым телъ лъэ­мы­жымрэ абы и лъабжьэм щIэт ­гъущI гъуэгу къудамэмрэ зэпкъ­ры­хын зэ­ры­щIадзам.

  ЗэIущIэр къыщызэIуихым, Алэ­къей Арсен журналистхэм ягу къигъэкIыжащ «Налшык-20» дзэ къалэ цIыкIу зэхуэщIар ухуэн щыщIадза 1956 гъэм, лэжьыгъэр щIагъэпсынщIэн мурадкIэ, гъущI гъуэгу къудамэр тралъхьауэ зэрыщытар. 1992 гъэм ар зэхуа­щIыжри, гъущI гъуэгу къудамэм хуэ­меиж хъуащ.
 Фейдэ зэрыпымылъым тету, Урысейм ТранспортымкIэ и министерствэм и унафэкIэ, гъуэгур нэгъабэ зэхуащIащ. АбыкIэ хьэлъэхэр зыгъэIэпхъуэу щыта лы комбинатымрэ Iэ­фIыкIэ фабрикэмрэ лэжьэжыркъым, вольтышхуэ Iэмэпсымэхэр щагъэхьэзыр, ЖБИ-2 заводхэм ар къагъэсэбэпыркъым. КъищынэмыщIауэ, Iэтащхьэм къызэрыхигъэщащи, яхъу­мэ курорт бгылъэ-санитар щIыпIэм и Iэшэлъашэм промышленнэ предприятэхэмрэ щIэлъхьапIэ базэхэмрэ щыIэ хъунукъым. Къалэ округым и генеральнэ планыщIэм и проектым ар щыгъэбелджылащ.
  Алэкъей Арсен зэрыжиIамкIэ, 1975 гъэм яухуа лъэмыжыр зэи ремонт ящIакъым. И техникэ щытыкIэр кIэухыу къапщыта нэужь, дяпэкIэ къэбгъэсэбэпыну дзыхьщIыгъуэджэу къалъытащ. Лъэныкъуэ псори зэпашэчри, лъэмыжыр зэпкърахыну, ­гъущI гъуэгу къудамэр зытелъа щIыпIэм ­автомобиль гъуэгущIэ тралъхьэну уна­фэ къащтащ. ШыщхьэуIум и 1-м ирихьэлIэу лэжьыгъэ псори яухыу, Мэл­бахъуэм и цIэр зезыхьэ уэрамыр къы­зэIуахыжыну, илъэсым и кIэ пщIондэ автомобиль гъуэгущIэ яухуэну я мурадщ.
  Лэжьыгъэхэр щрагъэфIэкIуэну зэманым транспортыр зэрызекIуэну схе­мэм­рэ жылагъуэ транспортыр зэ­ры­зэблэкIыну щIы­кIэм­рэ нэгъэсауэ зэпалъытри, ГИБДД-м и IуэхущIапIэм деж щы­зэ­хуа­гъэ­кIуащ. Кировым, Щорсым, Комаровым, Калюжнэм я цIэхэр зезыхьэ, Эльбрусскэ, Тырныаузскэ уэ­рамхэр а Iуэхум хуэгъэхьэзырыным, зэгъэ­пэ­щыжыным ма­зае кIуам щIадзащ. Мэлбахъуэм и уэрамыр Калюжнэмрэ Кировымрэ я уэрамхэм щы­пыхьэ щIыпIэхэм гъуэгугъэлъагъуэ схе­мэхэр зыщIыгъу хъыбарегъащIэ таблохэр щыфIадзэнущ. Гъуэ­гухэм я щы­тыкIэр зыгъэнаIуэ кар­тэ­хэмкIэ гъэпса электрон таблохэри зэ­ра­гъэувыну щIыкIэми хоплъэ.
 Алэкъей Арсен къызэрыхигъэщамкIэ, ирагъэкIуэкIыну лэжьыгъэхэр къалэми налшыкдэсхэми зэрытрамыгъэ­хьэлъэным хущIэкъунущ. Калюжнэм и уэрамым къыщыщIэдзауэ Толстойм и уэрамымкIэ транспортыр щызекIуэу мы зэман гъунэгъум яублэнущ. Зати­шьем и Iэшэлъашэм деж зыхуимыт ­сату щIыпIэхэр щыIуахынущ, и Iэ­гъуэб­лагъэр зэIузэпэщ ящIынущ. Лъэмыжыр щызэхуащIынум ирихьэ­лIэу транспорт зекIуапIэхэр хьэзыр хъунущ.
  КъБР-м Транспортымрэ связымкIэ и къэрал комитетым и унафэщI Къудей Арсен къы­зэригъэлъэгъуамкIэ, лъэ­мы­жым и пкъыгъуэ зэрыIыгъхэр жьы хъуащ ­икIи хуабжьу къэтIэсхъащ, къы­зыхуэтыншэу зэрагъэпэщыжы­фы­ну­къым. Абы къызэрилъытэмкIэ, транспорт зэб­лэ­кIыпIэхэр къалэшхуэхэм я щапхъэм ­тету къызэгъэпэщыпхъэщ. Ухуэ­ны­гъэмкIэ, ЖКХ-мрэ гъуэгу хозяйствэмкIэ министр Къуныжь Вячеслав зэ­рыжиIамкIэ, къалэм щаухуэну авто­мобиль гъуэгущIэр проект пэрытхэм ящыщ зыщ.
   Налшык и Iэтащхьэ Алэкъей Арсен къыхигъэщащ автомобиль гъуэгущIэм республикэм и щыхьэрым и транспорт инфраструктурэр нэрылъагъуу зэ­ры­ригъэфIэкIуэнур. Лъэмыжыр трах­мэ, абы къедза щIыпIэхэр зэ­Iу­зэпэщ ящIынущ, Iэгъуэблагъэр зы­гъэдэхэну иджырей псэуалъэхэр ­щау­хуэнущ.
  - Къалэм щыщ а Iыхьэр къахуэ­мы­цIыхужу едгъэфIэкIуэнущ,- къыхигъэбелджылыкIащ Алэкъей Арсен.

Налшык къалэ округым и щIыпIэ администрацэм и пресс-IуэхущIапIэ.

Свежие номера газет Адыгэ псалъэ


21.06.2017
20.06.2017
19.06.2017
16.06.2017