Си япэ IэдакъэщIэкIыр

ТУБАЙ Мурат, сурэтыщI:

Гъуазджэм сыкъыхэхъукIащ сэ, си адэ-анэр пхъэр художественнэу ибзэнымкIэ IэпщIэлъапщIэти, абыхэм пхъэм хуаIэ лъагъуныгъэр си деж къэсагъэнущ.

Япэ дыдэу си Iэпэм къыпыкIар къызэрыгуэкI шэнт щхьэгуэщ. Илъэси 6-7 си ныбжьу арат абы щыгъуэм. Си адэм и лъэщапIэ пэшым къыщызгъуэта пхъэ кIапэлъапэхэм къыхэсщIыкIа шэнтым егъэлеяуэ сыщыгуфIыкIырт. Уи IэкIэ зыгуэр пщIыным къыпхуихь гуфIэгъуэр абы щыгъуэщ япэу щызэхэсщIар. Фи фIэщ зэрыхъун, нэхъыбэ дыдэрэ ди лъапсэм къыщагъэсэбэп хьэпшыпу а шэнт цIыкIур иджыри диIэкIэ.

ГъащIэм и гъуэгу бгъуфIэр

Еянэ классым сыщеджэу къызгурыIуащ си гъащIэр гъуазджэм еспхыну сызэрыхуейр. Художественнэ школ сыкIуэн щIэздзащ, ар къэзухри КъБКъУ-м декоративно-прикладной гъуазджэмкIэ и факультетым сыщIэтIысхьащ. Зэи къысхуихуакъым абы сыщыхущIегъуэжа. Егъэлеяуэ сфIэфIщ цIыхум сэбэп сыхуэхъуну, си IэкIэ сщIам зыгуэрым гукъыдэж къриту слъагъумэ, дамэ къыстокIэ. Адыгэхэм къадэгъуэгурыкIуэ IэщIагъэр, си унагъуэм и деж и мызакъуэу, лъэпкъ псом хуэхъумэным си къару зэрыхэлъыр-щэ?!

Иджыри сыстуденту сэ къысхуагъэлъэгъуат Сабийхэм эстетикэ гъэсэныгъэ етынымкIэ  Къэзанокъуэ Жэбагъы и цIэр зезыхьэ центрым щезгъэджэну. Нобэр къыздэсым абы сыщыIэщ, дахагъэ я Iэ цIыкIухэмкIэ къагъэщIу сабийхэр согъасэри.

IэщIагъэ Iей щыIэкъым

Дэтхэнэ зы сабийми ищIэну сыхуейщ IэщIагъэ Iей зэрыщымыIэр. Нэхъыщхьэр уи гумрэ уи псэмрэ фIэфI лэжьыгъэм упэрытынырщ, аращ насыпыфIэ узыхуэщIынур. Си гуапэ хъунущ си IэщIагъэм сабий нэхъыбэ дезгъэхьэхыфмэ, къыхуэзгъэушыфмэ.