ЕзыгъэзэкIар къахуэщIэркъым

ЩIым къыхуэблагъэу зыхужаIа уафэщIым, къызыхэкIар къахуэмыщIэу, лъэныкъуэкIэ ириIуэнтIэкIыжащ.

«2022 AEI» нагъыщэр зрата астероидым япэу гу щылъатар щIышылэм и 6-рщ. Жэщ-махуэ зэрыдэкIыуи, абы и зыгъэзэкIэм кIэлъыплъа, къыр дзакIэ абрагъуэхэр хьэршым зэрыщызекIуэр (орбитэр) къыIэрыхьа хъыбархэмкIэ езыр-езыру зэхэзыгъэкI AstOD Iэмалыр щыхьэт техъуащ зи гугъу тщIы уафэщIыр дыщыпсэу планетэм дежкIэ шынагъуэ ин дыдэ къэзышэу зэрыщытым.  

КIэлъыплъахэм зэрыжаIэмкIэ, астероидыр апхуэдизу псынщIэрызекIуэти, икIэщIыпIэкIэ къызэрыщIидзыжауэ, зытета лъагъуэм триIуэнтIыкIыну къаруи зэмани иIэххакъым. Европей хьэрш IуэхущIапIэм (ESA) щIытригъэчыныхьари арат а уафэщIыр ЩIы Хъурейм къыжьэхэуэнкIэ зэрыхъунум.    

ЩIышылэм и пэщIэдзэм махуэ зыбжанэкIэ, щтэIэщтаблэрэ теумэзэхыхьауэ, зыкIэлъыплъа астероидыр, къэувыIи къэгъази имыIэу гъунэгъу къызэрытхуэхъум къыхэкIыу, астрономхэм къабжат абы и «лъэр» ЩIы Хъурейм 2023 гъэм бадзэуэгъуэм и 4-м къызэрихьэсынур.

АрщхьэкIэ, телъыджащэу Iуэхум зыкъызэрихъуэкIащ. Махуиблым къриубыдэу зыкIэлъыплъа астероидыр ди зэхуаку къыдэхута Мазэм игъэпщкIуащ, къызэрыкъуэщыжуи зыкъызэригъэлъэгъуа щIыкIэр зыпэмыплъащ:  Мазэр зэрытекIуэтыжу, абыкIэ зэпымыууэ плъа телескопым «гу лъитащ» 2022 AEI уафэщI «зеджадэм», ЩIы Хъурейм зэран къыхуэмыхъужыфын хуэдизу, лъэныкъуэкIэ зэригъэзам.      

Ауэ щыхъукIи, иджы астрономхэм зэрыжаIэмкIэ, зи гугъу тщIы уафэщIыр ди планетэм блэлъэтыкIынущ километр мелуани I0-м нэблагъэкIэ тпэIэщIэу. Ар хуэдэ 20-кIэ нэхъыбэщ Мазэр зэрытпэжыжьэм нэхърэ.

АрщхьэкIэ, иджыри зэ къытыдогъэзэжри, зэрымыгурыIуэгъуэу къонэ щхьэхьу къытхуэжэ къыр дзакIэ абрагъуэр лъагъуэ шынагъуэм тезышыфа къарур къыздикIагъэнкIэ хъунур.