Илъэс щэ ныкъуэкIэ узэIэбэкIыжмэ, I968 гъэм дыгъэгъазэм, «Кабардинка» къэфакIуэ ансамблым Африкэ Ищхъэрэм концертхэр щитащ. Гупыр япэу хамэ къэрал щыкIуар абы щыгъуэщ.
«Кабардинка» ансамблым и артист 47-рэ абы кIуащ. Гупым хэтхэм я ныбжьыр илъэс I6-м щыщIэдзауэ 29-рэ хъурт. Абыхэм я мурадт лъэпкъ къафэхэр дунейпсо утыку щагъэлъэгъуэну. «Кабардинка» ансамблым километр мини 7-м щIигъу зэпичри, мазитIым къриубыдэу концертхэр итащ. Дауи, ди щIыналъэм дунейм щиIэ щытыкIэм къыщхьэщыкIырт здэкIуар, псом япэрауэ, егъэлеяуэ хуабэт. Абыи емылъытауэ, сценэр зэресам хуэдэу къызэмыгъэпэщами, гугъуехьхэр къызэранэкIыурэ, гукъинэжу зыкъагъэлъэгъуащ. КъызэщIэпкъуэжмэ, Мароккэ, Тунис, Алжир, Ливием я къалэ 29-м концерт 52-рэ щатащ. Абыхэм цIыху мин 30-м щIигъу екIуэлIащ, къэфакIуэхэм я концертхэр телевизоркIэ къыщатыжым еплъыжа щэ бжыгъэхэм я гугъу умыщIуи.
Дэнэ щIыпIэ зыкъыщагъэлъагъуэми – Тлемсен е Оран, Сиди-бель-Аббес, Маскарн е Тиарет жыпIэми, - дэнэ дежи IэгуауэшхуэкIэ щрагъэблагъэрт. Алжир и къалащхьэм и Лъэпкъ театрым тIысыпIэ имыIэжу щызэхуэсахэр къэтэджурэ «Кабардинка» гупым и къэфакIуэхэм Iэгуауэ инкIэ яIущIэрт, я къафэхэр яфIэщIэщыгъуэу. Псом хуэмыдэу «Къафэ», «Ислъэмей», «Удж» къафэхэм къытрагъэзэжыну лъаIуэрт.
Ансамблым и къэфакIуэ ДзыхьмыщI Зарэ Африкэ Ищхъэрэм зэрыкIуауэ щытам теухуа и гукъэкIыжхэм къыхощ Мароккэ щыкIуам лъэпкъ фэилъхьэгъуэхэр зыщыгъ, нэкIуIупхъуэ зыIулъ цIыхубзхэм я пащхьэм зэрызыкъыщагъэлъэгъуауэ щытар. Концертым и пэ къихуэу артистхэм къыжраIат а щIыпIэм Iэгуауэ хуаIэту зэрыщымыхабзэр. Япэ къафэр и кIэм нагъэсу макъамэр зэпыуа нэужь, залыр щым хъуащ. ИтIанэ марокканхэр я лъакъуэхэмкIэ зэрытеуIуэр зэхахащ. АбыкIэ къафэр ягу зэрыдыхьар къагъэлъагъуэу арат. Артистхэм ар къагурыIуэри, абы игъэгушхуауэ концертым пащащ.
Ливием и къалащхьэ Триполи газетхэм щатхырт лъэпкъ къафэ гъуазджэм и фIыпIэм зыхагъэгъуэзэну хуеймэ, «Кабардинка» ансамблым и концертым кIуэну, ар къэфакIуэ гуп нэхъыфIхэм зэрыщыщыр. Гупым я концертхэм щыболъагъу я пасэрей лъэпкъ къафэхэм пщIэ зэрыхуащIыр. Тунис къыщыдэкI «Аксьон» газетми лъагэу къыщалъытат совет артистхэм я зэфIэкIыр. «Джендубе, Кефе, Кассерине, Гафсе, нэгъуэщI щIыпIэхэм гуапэу щыIуощIэ «Кабардинка» ансамблым и концерт гъэщIэгъуэнхэм», - жиIэу тетт абы тхыгъэ.
Гупым и уэрэджыIакIуэу щыта, Урысей Федерацэм и цIыхубэ артисткэ, КъБР-м щIыхь зиIэ и артисткэ, Къэрал саугъэтым и лауреат, ЮНЕСКО-м Гъуазджэмрэ щэнхабзэмкIэ и дунейпсо советым хэт Гъэсашэ Натальи а концертхэр гукъинэж щыхъуащ. «Ливийские времена» газетым щатхат Наталье и уэрэдхэр цIыхухэм гурыхь зэращыхъуар, Iэгуауэ инхэр зэрыхуаIэтар.
«Кабардинка» ансамблым лэжьыгъэшхуэ ищIащ. Мароккэ, Тунис, Алжир, Ливием я щыхьэрхэм, къалэшхуэхэм къадэкIуэу, ахэм я щIыпIэ нэхъ пхыдзахэми зыкъыщагъэлъэгъуащ. Концерт нэужьым щIыналъэхэм я лъэпкъ IуэрыIуатэм, абы щыпсэухэм я къафэ гъуазджэм зыщагъэгъуэзащ, щэнхабзэмрэ гъуазджэмрэ ехьэлIауэ зэдэуэршэрахэщ. «Кабардинка» ансамблыр Африкэ Ищхъэрэм зэрыщыIам мыхьэнэшхуэ иIащ Совет Союзымрэ а щIыналъэхэмрэ щэнхабзэ и лъэныкъуэкIэ зэдэлэжьэным.
