КъэкIуэну зэманым и джэгухэр

 «Джэгухэр» къыщызэIуихым, Путин Владимир абыхэм я мыхьэнэми тепсэлъыхьащ: «Мы зэхьэзэхуэм хабзэмрэ иджырей зэманымрэ, Iэпкълъэпкъ узыншэм и дахагъымрэ акъыл куумрэ, спортымрэ иджырей Iэмэпсымэхэмрэ, щIэныгъэмрэ егъэджэныгъэмрэ зэригъэуIуащ. А псоми цIыхум лъэныкъуэ псомкIи зиузэщIын, ехъулIэныгъэ иIэу псэун папщIэ хуэныкъуэщ. Нобэ, IэмэпсымэщIэхэм жэрыжэкIэ зыщаужь лъэхъэнэм, теплъэ куэд зиIэ, лъэныкъуэ куэдкIэ зэхэшыпсыкI зэпеуэныр мардэ зэрыщыхъуар ди нэкIэ дэзыгъэлъагъу дунейм нэгъуэщIу ущыпсэуфынукъым». 

ЗэрымыщIэкIэ апхуэдэу ирихьэлIа, е ар нэхъ къащтэу абы траухуа? Сытми, «КъэкIуэну зэманым и джэгухэм» я къызэIухыгъуэр зэрыдунейуэ щхьэж и анэдэлъхубзэм и махуэр щигъэлъапIэ мазаем и 21-м техуащ. «Иджы си лэжьэгъухэм солъэIу нобэ къызэIутх «Джэгухэм» къекIуэлIахэм щхьэж езым и анэдэлъхубзэкIэ фIэхъус псалъэкIэ зыхуагъэзэну», - жиIэщ Путин Владимири, трибунэхэр зэуэ къызэщIэхъеящ. Урысейм и Президентым бгъурыту утыкум итхэт Белоруссием, Къыргъызым, Таджикистаным, Къэзахъстаным я президентхэр, хамэ къэралхэм къикIа хьэщIэшхуэхэр, спорстмен, уэрэджыIакIуэ цIэрыIуэхэр. 

Япэу микрофоныр зыхашия Лукашенкэ Владимир белорусыбзэкIэ къэпсэлъащ: «Маржэ! КъэкIуэну зэманым фыхуэпIащIэ!». Къэзахъстаным и президент Токаев Къасым-Жомарт къызэрыригъэжьар фIыщIэ псалъэщ. «ПщIэ зыхуэсщI Урысейм и Президент Путин Владимир Владимир и къуэ! Япэрауэ, си щхьэкIэ фIыщIэ пхузощI! Мы «КъэкIуэну зэманым и джэгукIэхэм» хуэдэ зэхьэзэхуэ зэи зыщIыпIи щалъагъуакъым, дунейми щызекIуэркъым. Псоми я насып текIуэну сохъуэхъу!» Ар дыдэр урысыбзэкIэ зэридзэкIыжри, Токаевым жэрдэм ищIащ къыкIэлъыкIуэ «Джэгухэр» Къэзахъстаным щрагъэкIуэкIыну. «Спортыр мамырыгъэм и лIыкIуэщ, узыншагъэм и лъабжьэщ», - къыргъызыбзэкIэ жиIащ адэкIэ микрофоныр зыхуашия Жапаров Садыр. – Спортым сыт щыгъуи щытекIуэр нэхъ лъэщырщ». 

Пэжыр жыпIэмэ, президентхэр я бзэкIэ зэрыпсалъэм гухэхъуэу хэтыр зэлъытар абыхэм къапсэлъ фIэхъус псалъэхэм я закъуэтэкъым. Урысейм бжыгъэшхуэкIэ къэIэпхъуауэ щолажьэ икIи щопсэу таджикхэр, къэзахъхэр, къыргъызхэр, узбекхэр, нэгъуэщI лъэпкъ куэдым щыщхэр. Дэри ди щIыпIэм икIауэ цIыху куэд къалэшхуэхэм щыIэщ, я щIакхъуэ Iыхьэ къалэжьыжын, е IэщIагъэ, щIэныгъэ зрагъэгъуэтын папщIэ. Ауэ ди лъэпкъэгъухэр Урысейм щыщмэ, таджикхэм, узбекхэм ещхьу, хэхэсу зыкъыщыплъытэж къэралым и лIыщхьэм бгъурыту уи Хэкум и тхьэмадэр плъагъуным, ар уи анэдэлъхубзэкIэ псалъэу зэхэпхыным и уасэр хамэ щIыпIэ щыIа дэтхэнэ зыми фIыуэ ещIэ икIи зыхещIэ. «Джэгухэр» къэгъэнауэ, ахэр игъэгушхуэнра къыщIэкIынт УФ-м и Президентым апхуэдэ мурад езыгъэщIар. Урысейр лъэпкъ куэду зэрызэхэтыр абы и хъугъуэфIыгъуэу къызэрилъытэр, дэтхэнэ зыми и хабзэ, и бзэ, езым епха нэщэнэ щхьэхуэхэм зригъэужьыну зэрыхуитыр иджыри зэ дуней псом яригъэлъэгъуащ Путин Владимир. 

АдэкIэ фIэхъус псалъэхэм пащащ Узбекистаным и президет Мирзиёев Шаукъэт, Таджикистаным и президент Рахмон Эмомали сымэ. Абыхэми я лъэпкъхэр зэрыпсалъэ бзэхэмкIэ зыхуагъэзащ хьэщIэхэмрэ спортсменхэмрэ.

Къэрал 107-м щыщ спортсменхэр зыхэтыну мы зэхьэзэхуэшхуэр къыщызэIуах дауэдапщэм Путин Владимир и сэмэгурабгъумкIэ щыбгъурытащ дунейпсо зэхьэзэхуэхэр къызэзыгъэпэщхэм щытыкIэ гугъум ирагъэува, фигурнэ къэжыхьынымкIэ Китайм щекIуэкIа олимпиадэм къыщытцIыхуа, зэчиишхуэ зыбгъэдэлъ тэтэр хъыджэбз Валиевэ Камилэ. Къэбэрдей-Балъкъэрым зэрыщыщыр зэи зымыгъэгъуащэ, ар дэнэ щыщыIи хуабжьу къыхэзыгъэщ уэрэджыIакIуэ Билан Димэ къыхидзэу ягъэзэщIа Урысейм и гимныр къыщеуэм, Камилэ къэралым и пащхьэм итт, и нэпсхэр лIыгъэкIэ иубыду. ИлъэсиплIкIэ дунейпсо зэхьэзэхуэхэм хэтын хуитыныгъэр зыпаубыда хъыджэбзыр, итIани, къикIуэтыркъым. Тэтэрстаным, Камилэ къыщалъхуа Къэзан къалэм апхуэдэу лъагэу и щхьэр щиIэтыфын хуэдэу утыкум иришащ хъыджэбзыр Президентым. Зригъэзыхурэ зэрыдэуэршэрари журналистхэм яIэщIэкIакъым. Къедгъэжьа щыхъуакIэ, къыщIызгъуну сыхуейт Валиевэм иджыблагъэ и лъэпкъыр фIыуэ зэрилъагъум нэгъуэщI и нэщэни къызэригъэлъэгъуар. Куэд зытепсэлъыхь, хэIущIыIу хъуагъащIэ «Слово пацана» фильмым хэт, тэтэрыбзэкIэ ягъэзащIэ «Пыялэ» уэрэдыр щIэту, Камилэ игъэхьэзыращ «Блогер» зыфIища фигурист къафэ. Уи бзэмрэ уи лъэпкъымрэ фIыуэ плъагъумэ, ахэр зэрыбгъэлъэпIэну Iэмал къыпхукъуэмыкIынкIэ Iэмал зэримыIэм ари и щыхьэтщ. 

А щапхъэ дахэхэр ди нэгу щIагъэкIри, лъэпкъ IуэхукIи ди бзэм и лъэныкъуэкIи дызэлэжьын хуей гупсысэхэм ди гур хуашащ Тэтэрстаным къыщызэIуаха «Джэгухэм». Спортсмен минитIым щIигъу зрагъэблэгъа зэпеуэр Къэзанрэ Сочэрэ щекIуэкIынущ гъатхэпэм и 3 пщIондэ. 

Анэдэлъхубзэм и махуэм къытедгъэзэжмэ, аргуэру Шэшэн республикэм дызрагъэхъуэпсащ. А республикэм шэшэныбзэ щезыгъэдж егъэджакIуэ 1644-м псоми а махуэм ирихьэлIэу иратащ сом мини 100 зырыз. Апхуэдэ жэрдэмкIэ утыку къихьащ Шэшэным и Правительствэм и унафэщIым и къуэдзэ Кадыровэ Айшатрэ Администрацэм и унафэщIым и къуэдзэ Кадыровэ Хъадижэтрэ. Мылъку саугъэтыр Урысейм и ЛIыхъужь, Шэшэным и япэ президент Кадыров Ахъмэт-хьэжы и цIэр зезыхьэ щIыналъэ фондым къыхагъэкIынущ.