Налшык къалэ администрацэм гъуэгу хозяйствэмрэ къалэр зэIузэпэщ щIынымкIэ и Дапартаментымрэ подряднэ организацэхэмрэ я IэщIагъэлIхэр щIымахуэр икIыху гъуэгухэм хуэбэлэрыгъынукъым.
Коммунальнэ IуэхущIапIэхэм я лэжьакIуэхэмрэ спецтехникэхэмрэ пщэдджыжьым жьыуэ я къалэнхэм пэрохьэ: тещтыкIауэ нэху къекIа гъуэгухэм пшахъуэ, шыгъу тракIутэ, лъэс зекIуапIэхэм зэкIэ я гугъу ящIыркъым, шэджагъуэ нэужьхэм хуэзэу мащIэу къызэрыпсыIэм къыхэкIыу.
Мы махуэхэм дунейм и щытыкIэм зэрызихъуэжым елъытауэ, абыхэм къадэIэпыкъунущ КъБР-м Транспортымрэ гъуэгу хозяйствэмкIэ и министерствэри «Горзеленхоз» IуэхущIапIэри. Гъуэгухэм ямызакъуэу, ахэр кIэлъыплъынущ фэтэр зэтетхэм я унащхьэхэм ирищIэкI Iумылхэми, бжэIупэхэм щызэтрихьэ уэс Iувхэми. Куэдрэ къохъу къэтIэсхъа мылыр зэуэ къехуэхыу, лъэс зекIуапIэхэм я курыкупсэм къыщытехуэ. Апхуэдэхэм нэхъ ущрохьэлIэ лъэс зекIуапIэхэр унэхэм бгъурытыпэу здрикIуэ Хъураным, ПащIэм, Лермонтовым, КIыщокъуэм я уэрамхэм. Мы махуэ зэкIэлъыкIуэхэм гъуэгубгъухэмрэ лъэс зекIуапIэхэмрэ телъ уэсыр и кIэм нэсу къэткIуну хунэсакъым. Абыхэм пщэдджыжькIэрэ пшахъуэ тракIутэ.
Коммунальщикхэм апхуэдэу я нэIэ тетщ скверхэм щызэблэкI гъуэгу цIыкIухэм, щIымахуэ пщэдджыжьхэм жьы къабзэкIэ бэуэну хуейхэр шынагъуэншэу щызекIуэн папщIэ. Ипэ ита илъэсхэм къащхьэщыкIыу, дыгъэгъазэм дытехьэху жыгхэм мыхъейуэ япыта пщIащэхэм я нэхъыбэр, уэсыр зэуэ къатесэри, щIиуфащ. Дыгъэ кIапэ къызэрыкъуэкIыу ахэри мащIэ - мащIэурэ къыхагъэкъэбзыкI, гъатхэм жыг щIагъхэр къабзэу техьэн хуэдэу. Зыхуей хуагъэзахэм ящыщщ цIыху нэхъыбэ щызекIуэ ХьэтIохъущокъуэм и жыг хадэмрэ Дэшхуей хадэмрэ я лъагъуэхэр, гуэл Iуфэхэр, къалэ паркым хуэзэу Налшык псым узэрыдыхьэ лъэс гъуэгу нэхъ инхэ ЗэгурыIуэныгъэм, Абхъазым, МафIэ Мыужьыхым и Iэгъуэблагъэхэр уэсыр Iуву къытрилъхьауэ нэху къыщекIа япэ махуэхэ ягъэкъэбзауэ Iэгъущэлъэгъущэщ. Коммунальнэ хозяйствэхэр зыхуеину уэсытхъу техникэхэмрэ IэмэпсымэхэмкIэ сыт щыгъуи хуэдэу къызэгъэпэщащ. ЛэжьакIуэхэр нэхумыщым я лэжьыгъэм пэрохьэ.
