Хэт лъэужьыр зейр?(Сабий хъыбар) Япэ уэсыр хуэфIу къытрилъхьат. Даниял Iэжьэ цIыкIур къищтэри, пIащIэу шыгъуэгу хадэм ихьащ. Абы лъэгу егъэзыхыгъуэр и ежэхыпIэт щIымахуэр къэсамэ. Акъужьыр и нэкIум къеуэу здэкIуэм абы гу лъитащ уэс щхьэфэ хужьым къытена лъакъуапIэ цIыкIухэм. ЯпэщIыкIэ джэдууэ игугъащ ар зейр, арщхьэкIэ еплъыжыIуэри, аратэкъым-тIэкIу цIыкIуIуэт. ИтIанэ, джэдур щабэрыкIуэщ, сакъыпэу и лъакъуэхэр уэсым щызэблех, къызэринэкI лъэужьыр IупщIу. Мыр аратэкъым - лъакъуапIэ цIыкIунитIэхэр зэпэзэнэт, пIащIэу зэрыпхыкIар къапщIэу. Лъэужьым тету кIуэурэ, бжыхь джабэм нэсащ. АдрыщIымкIэ кIуэуэ ядэнутэкъым, хадэбжэ цIыкIури щIымахуэ псом гъэбыдат. Даниял и Iэжьэр игъэуври, дадэ и лъыхъуакIуэ ежьащ, дауэ мыхъуми, абы къищIэн хуейт а лъэмб мыцIыхухэр зейр. - Мы сэ слъагъур кIэпхъщ, - жиIащ дадэ зэреплъу. Вындыб мэзым къыщIэкIыу абыхэм унагъуэ хадэхэм ит жыг нэхъ инхэр тIысыпIэ щащI къохъу. Ужьэу къыщIэкIынри зыхуэIуа щыIэкъым. Дадэ Даниял и Iэпэр иубыдри лъэмбыр здэкIуэмкIэ яунэтIащ. Хадэбгъум кIэщIэту здекIуэкIым, дадэ и нэр хуэзащ псы нэпкъым игъэщIеикIауэ щхьэщыт дзэлыжьым и лъабжьэм зыгуэр зэрыщыпэщащэм. Еплъыпэмэ - цыжьбанэт. Ар ямыгъэпIейтейуэ кIэлъыплъыну мурад ящIащ. Абы и щхьэ цIыкIур щIэIуауэ зыгуэрым епэщэщри, жыг лъабжьэм иIэ гъуэм ипщхьэжащ. Дзэлыжьыр езыр сыт щIат. Дадэ зэрыжиIэжымкIэ, езым и ныбжьым и нэхьэкъехуэт. Жыгыр апхуэдизкIэ инт, и лъэдийр гъумыщIэти, зы лъэныкъуэм къыщыщIэдзауэ адрейм унэсын щхьэкIэ лъэбакъуэ зыбжанэкIэ къыпэпкIухьын хуейт. Даниял псом нэхърэ нэхъ игъэщIэгъуар абы и кугъуанэ нэщIым и инагъырт. Ар жыг лъэдийм и къэгъэшыпIэм хуэзэрт, дадэ лъапэпцIийуэ зиIэтмэ хуиту лъэIэсу. Дадэ Даниял IэкIэ къищтауэ абы иригъэплъыну щыдриIэтейм, тIури къигъащтэу, абы къипкIащ ужьэ къуэлэн дахащэ. - Зи цIэ ираIуэр бжэщхьэIу тест, - жиIащ дадэ дыхьэшхри. КъащIэ иджы, лIыгъэ уиIэмэ, а тIум лъакъуапIэр зейр… Даниял иджы къыфIэIуэхужтэкъым абы и зэхэгъэкIыныр - цыжьбанэри ужьэри и щыпэлъагъути, дуней гуфIэгъуэр зэрихьэрт. - Цыжьбанэр щIымахуэм жейркъэ? - щIэупщIащ Даниял къыздэкIуэжым. - Мы дэ дызрихьэлIар жейм езэгъыу къыщIэкIынтэкъым, - жэуапу аращ дадэ къыхуэгъуэтар. Пэжыр жиIэмэ, езыри абы щымыгъуазэу къыщIэкIат. Фэ фщIэуэ пIэрэ абы и жэуапыр? Шэрэдж Дисэ.
Поделиться:
Читать также:
27.04.2024 - 19:53 →
Хъыджэбз мэкъуауэ
27.04.2024 - 11:18 →
Hapт Ермыдэ иныжьхэр зэриукIар
26.04.2024 - 17:20 →
Абазэ таурыхъхэр
26.04.2024 - 13:00 →
Хьилэшы къэрабгъэ
24.04.2024 - 15:23 →
ФIыуэ флъагъухэм закъевгъащIэ!
|