Адыгэбзэр зыджа щIэныгъэлIхэр
Услар Пётр Кавказ бгырыс лъэпкъхэм я бзэхэм щIэныгъэ лъабжьэ етыным папщIэ зэфIиха лэжьыгъэшхуэмкIэ тхыдэм зи цIэр хыхьа Услар Пётр (1816 - 1878) пащтыхьыдзэм и генералу щытащ. Абы и дзэ къулыкъум щыщIидзар Дагъыстэнырщ (1837), ауэ 1840 гъэм Петербург игъэзэжащ дзэ хуэIухуэщIэхэм пыщIа щIэныгъэм нэхъыбэу зыщигъэгъуэзэн мурадкIэ. Абы щыIэу офицер щIалэр штаб нэхъыщхьэм хагъэхьащ икIи 1850 гъэм аргуэру Кавказым къагъэкIуэжащ, Эривань губернэм и щытыкIэм тетхыхьын папщIэ. Илъэс 25-кIэ иужь итащ Услар Пётр и щIэныгъэ-къэхутэныгъэ лэжьыгъэу Кавказым щригъэкIуэкIам, бгырыс лъэпкъхэм щэнхабзэ зыужьыныгъэ егъэгъуэтыным хуэунэтIауэ щытам. Бгырыс лъэпкъыбзэхэр джыным, абыхэм я грамматикэ зэхэгъэувэным Услар щыхуежьар 1861 гъэрщ, абы щыгъуэ щIэныгъэлIым къыдигъэкIащ абхъазыбзэм теухуа тхыгъэшхуэ. ЩIэныгъэ-къэхутэныгъэ зрищIылIэ бзэхэм Услар япэщIыкIэ алфавит яхузэхилъхьэрт икIи абы лъабжьэ яхуищIыр лъэхъэнэм и теориещIэхэрт. Услар Пётр адыгэбзэм и макъ псори убзыхуауэ къызэщIэзыубыдэ алфавит зэхигъэуващ, ар урысыбзэм, хьэрыпыбзэм, ермэлыбзэм, КъухьэпIэ ЕвропэмкIэ щыIэ бзэ зыбжанэм зэраригъапщэ щапхъэхэри дэщIыгъуу къигъэлъэгъуащ. А алфавитыращ ХьэтIохъущокъуэ Къазий къигъэсэбэпауэ щытар. Услар и лэжьыгъэшхуэхэу «Абхъазыбзэ», «Шэшэныбзэ» монографиехэм 1863 гъэм Петербург щыIэ ЩIэныгъэхэмкIэ Академием къыхуигъэфэщауэ щытащ «Демидовым и саугъэткIэ» зэджэр, кавказыбзэхэр джыным хуищIа хэлъхьэныгъэшхуэм папщIэ 1868 гъэм Услар Пётр ЩIэныгъэхэмкIэ Академием и член-корреспондент хъуащ.
Чикобавэ Арнольд Куржы бзэ щIэныгъэлI, лингвист-теоретик, иберий-кавказыбзэхэр джынымкIэ къудамэм и къызэгъэпэщакIуэ Чикобавэ Арнольд 1898 гъэм Сачикобао къуажэм (Куржы) къыщалъхуащ. Кутаиси дэт куржы гимназиер (1917), Тбилиси и къэрал университетым философие факультетым бзэхэр щадж и къудамэр (1922) къиуха нэужь, а еджапIэ нэхъыщхьэм къагъэнащ «профессор цIэр къызэрыфIащыным адэкIэ хуагъэхьэзырын» папщIэ. 1933 - 1960 гъэхэм Тбилиси университетым кавказыбзэхэмкIэ и кафедрэм и унафэщIу лэжьа Чикобавэ и егъэджакIуэхэр къызэрыщыгугъам хуэдэу филологие щIэныгъэхэмкIэ доктор (1929), профессор (1933), Куржым ЩIэныгъэхэмкIэ и академием и академик (1941), Куржым щIыхь зиIэ и щIэныгъэрылажьэ (1946), Дагъыстэным, Къэбэрдей-Балъкъэрым (1968), Абхъазым (1978), Шэшэн-Ингушым (1983) щIэныгъэхэмкIэ щIыхь зиIэ я лэжьакIуэ, Гумбольт и цIэр зэрихьэу Берлин дэт университетым щIыхь зиIэ и доктор (1960) цIэ лъапIэхэр къыхуагъэфэщащ, Инджылызым и филологхэм я зэгухьэныгъэм хагъэхьащ (1968), Куржым и къэрал саугъэтыр тIэунейрэ хуагъэфэщащ (1971, 1990), Ломоносовым (1951), Джавахишвили (1980) я цIэхэр зезыхьэ саугъэтхэр къратащ. 1936 - 1985 гъэхэм Чикобавэ и унафэм щIэтащ Куржым ЩIэныгъэхэмкIэ и академием хыхьэ Бзэ щIэныгъэ институтым иберий-кавказыбзэхэр джынымкIэ и къудамэр. Кафедрэми къудамэми я лэжьыгъэхэр зэтезыублауэ щытар аращ. 1950 - 1952 гъэхэм Чикобавэ Арнольд Бзэ щIэныгъэхэмкIэ институтым и унафэщI мэхъу, 1950 - 1963 гъэхэм Куржым ЩIэныгъэхэмкIэ и академием и президиумым хэтщ. 1945 - 1964 гъэхэм Чикобавэ и унафэм щIэту лажьэ комиссэм игъэхьэзыра «Куржыбзэм и псалъэгъэнахуэ псалъалъэр» къыдэкIащ, абы и редактор нэхъыщхьэу щытари зи гугъу тщIы академик цIэрыIуэрщ.
Яковлев Николай ЩIэныгъэлI, еджагъэшхуэ, кавказыдж, лингвистикэм и теориемрэ и къэгъэсэбэпыкIэмкIэ IэщIагъэлI Яковлев Николай 1892 гъэм Саратов куейм хыхьэ къуажэ цIыкIум къыщалъхуащ. Москва дэт университетыр 1916 гъэм къэзыуха, щIэныгъэм хуэнэхъуеиншэ щIалэр бзэ зэмылIэужьыгъуэхэм пасэу дихьэхащ. СССР-м хыхьэ лъэпкъ цIыкIухэм, тхыбзэ зимыIахэм я бзэхэм папщIэ алфавитхэр зэхэгъэувэным, ахэр егъэфIэкIуэным, пэжырытхэр гъэпсыным къаруушхуэ ирихьэлIащ Яковлевым, абы и нэIэм щIэт зэпыту щытащ кавказ бгырыс лъэпкъхэм я бзэмрэ щэнхабзэмрэ джыныр. Яковлевым хэлъхьэныгъэшхуэ хуищIащ адыгэ-абхъазыбзэм и макъхэр зэрызэхэлъыр, и грамматикэр джыным, адыгэ литературэбзэм и грамматикэр зэхэгъэувэным, адыгэ тхыбзэр гъэпсыным. ЩIэныгъэлIым гулъытэшхуэ хуищIу щытащ кавказ лъэпкъхэм я IуэрыIуатэмрэ тхыдэмрэ, ахэр и лъабжьэу бзэмрэ щэнхабзэмрэ я блэкIамрэ къакIуа гъуэгуанэмрэ зыхуэдэр къипщытащ, абыхэм адрей лъэпкъхэм я тхыдэм хуаIэ пыщIэныгъэхэр къихутащ. Яковлев Николай и IэдакъэщIэкIхэу цIэрыIуэ хъуащ ингуш лъэпкъым теухуауэ 1925 гъэм къыдигъэкIа тхыгъэр, Европэм, Азием, Америкэм иса пасэрей лъэпкъхэм я бзэ зэпыщIэныгъэхэм (1946), адыгэ щэнхабзэм теухуар (1928), лингвист Iуэху еплъыкIэхэмкIэ гъэпсауэ тхыдэмрэ щэнхабзэмрэ епха нэгъуэщI лэжьыгъэ куэди. ТАМБИЙ Линэ.
Поделиться:
Читать также:
29.04.2024 - 13:08 →
«ТекIуэныгъэм и диктантым» фыхэт
28.04.2024 - 17:33 →
Псыхэр къабзэ хъун папщIэ
28.04.2024 - 13:01 →
Архитекторхэм я зэфIэкIхэр
28.04.2024 - 11:59 →
Пэрыт увыпIэр адэкIи иIыгъынущ
28.04.2024 - 10:57 →
ПсэупIэщIэхэр - гуфIэгъуэ щIыкIэм тету
|