Къэбэрдей-Балъкъэрым и лIыкIуэхэр Киров областым щохьэщIэ

Къэбэрдей-Балъкъэрым и Правительствэм и УнафэщIым и япэ къуэдзэ Говоров Сергей, КъБР-м щIыуэпсымрэ экологиемкIэ и министр Шаваев Ильяс, КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим, КъБР-м курортхэмрэ туризмэмкIэ и министрым и къуэдзэ Шаваев Ислъам сымэ иджыблагъэ лэжьыгъэ IуэхукIэ Киров областым щыIащ. Ахэр абы иригъэблэгъащ а щIыналъэм и унафэщI Соколов Александр.

Санкт-Петербург щекIуэкIа дунейпсо экономикэ зэхуэсышхуэм Къэбэрдей-Балъкъэрымрэ Киров областымрэ щызэращIылIауэ щыта зэгурыIуэныгъэм лъэныкъутIми IэмалыфIхэр къарет фейдэ къиту зэдэлэжьэну.

«Шэч къытесхьэркъым, ди зэпыщIэныгъэхэм фIы куэд къазэрыдэкIуэнум. Ди IэнатIэ пажэхэм хохьэ биотехнологиер, химие промышленностыр, машинэ зэпкъырлъхьэныр, металлургиер. Абыхэм къыщыщIагъэкI продукцэхэм я нэхъыбэм я фIагъхэмкIэ къэралым бжьыпэр щаIыгъщ. Абы къыхэкIыуи, промышленнэ корпорацие къызэдгъэпэщыну къыхалъхьэ Iуэхугъуэр хьэлэмэту къызолъытэ», - къыщыхигъэщащ зэIущIэм Соколов Александр.

Областым и лIыщхьэм Къэбэрдей-Балъкъэрым икIа хьэщIэхэр иригъэблэгъащ Киров къалэр илъэс 650-рэ зэрырикъум ехьэлIауэ етIанэгъэ ирагъэкIуэкIыну гуфIэгъуэ Iуэхугъуэхэм хигъэтыну.

Говоров Сергей Киров областым и губернаторым фIыщIэ хуищIащ къызэрырагъэблэгъам икIи гуапэу къазэрыIущIам папщIэ. Апхуэдэуи къыхигъэщащ КъБР-м и лIыкIуэхэр щIыналъэм и IуэхущIапIэ зыбжанэм зэрыщыIар, псом нэхъыбэу ахэр дэзыхьэхыр щIыгъэпшэрхэр къыщыщIагъэкI IуэхущIапIэхэрауэ зэрыщытыр.

«Псом япэу ди мэкъумэшыщIэхэр зэпызыщIэнур ахэрщ. Иджыпсту ди республикэм жыг хадэхэм зрегъэужь, ауэ дунейм къыщекIуэкI экономикэ зэхъуэкIыныгъэхэм я зэранкIэ, щIыгъэпшэрхэр къыщытщэхуу щыта щIыпIэхэр дымыхъуэжу, нэгъуэщI хэкIыпIэхэр къэдмыгъуэту хъуркъым.  Къыхэзгъэщыну сыхуейт, Киров областыр технологие лъэщхэр зи тегъэщIапIэ щIыналъэу зэрыщытыр, лыхэкIхэм елэжь и IэнатIэхэм фIыуэ зэрызаужьар. Дэ къыфхуедгъэшэфынущ пхъэщхьэмыщхьэхэр, хадэхэкIхэр, нэгъуэщI ерыскъыхэкIхэр, жылапхъэхэр», - жиIащ Говоровым.

Апхуэдэуи абы къыхигъэщащ Киров областым къыщыщIагъэкI, зэман кIэщIым къриубыдэу бухуэ хъу кемпингхэмрэ глэмпингхэмрэ ехьэлIауэ зэдэлэжьэну зэрыфIэигъуэр.

ЛъэныкъуитIыр зэгурыIуащ турист зэпыщIэныгъэхэми зрагъэужьыну. ЩIыналъэм и губернаторым абы ехьэлIауэ жиIащ Киров къалэмрэ Минводрэ кхъухьлъатэхэмкIэ зэпызыщIэ гъуэгухэр къызэIуахын мурад зэрыщыIэр, абыхэм нэхъ гъунэгъу зэрызэхуащIынур, зэпыщIэныгъэхэр зэрагъэбыдэнур.

Къэбэрдей-Балъкъэрым икIа лIыкIуэхэм Киров къалэм дэт «Лэжьыгъэм и щIыхь» хадэм щыхасащ псей къащхъуэу блы, щIыналъэм и къалащхьэр  илъэс 650-рэ зэрырикъум теухуауэ. Жыгхэр ди республикэм тыгъэу Киров областым иратащ КъБР-м и унафэщIхэмрэ Соколов Александррэ я зэгурыIуэныгъэкIэ.

                                                                    ХЬЭЩЫКЪУЕЙ Олег.