Бдзэжьей сэбэп

Хекыр цIыхухэм щIэх-щIэхыурэ къащэху, тыкуэнхэм пэрыхьэту щIэлъщ икIи пудщ. Уасэшхуэ зыщIамытым фIагъышхуэкIи щымыгугъыу есащ цIыхур - аращ а бдзэжьей телъыджэми къыщыщIар.

Хекым хуэдэу фошыгъу, жьэгъу, псантхуэ узхэмкIэ сэбэп къэгъуэтыгъуейщ, уеблэмэ лышхми пэщIэтщ. Ар тыншу адрейхэм къахэфцIыхукIыфынущ: и жьэ кIуэцIыр фIыцIэщ, и пкъыр хуэкIыхьщ, и бгъуитIыр тIолыдыкI, и тхы фIыцIафэм, адрей бдзэжьейхэм къащхьэщыкIыу, тетыр зы кIэбзийщ. Бдзэжьей балигъым килограммищым нэс и хьэлъагъщ, и кIыхьагъыр метрэ ныкъуэм щынэблагъэ къохъу.

Бдзэжьейр къулейщ белокымрэ микро-макропкъыгъуэхэмкIэ. Абы хэлъщ фтор, гъущI, кальций, натрий, калий, магний, фосфор, тхъуэбзащхъуэ, бдзапцIэ, йод, хром, гъуаплъэ, молибден, кобальт, никель, марганец, витамин зэмылIэужьыгъуэхэр: В, С, Е, А, РР. Абыхэм псоми Iэпкълъэпкъыр фIыуэ ягъэлажьэ, щIыфэ, жьэ кIуэцI, зоб узхэм хуэсэбэпщ, пкъыгъуэ зэранхэр Iэпкълъэпкъым къыпкъреш, антибиотикхэм я пIэм йоувэ. ЦIыхухэм я узыншагъэр хъумэнымкIэ дунейпсо зэгухьэныгъэм игъэува мардэмкIэ ар тхьэмахуэм тIэу пшхыну сэбэпышхуэщ. Абы хэлъ дагъэ кислота омега-3-р цIыхум и Iэпкълъэпкъым хуримыкъунырщ фошыгъу, лъынтхуэ, псантхуэ узхэр, тэмакъкIэщIыгъэр, лъы дэуейр къызыхэкIыр.

Хекыр ерыскъы зэгъщ, абы хэлъ пкъыгъуэхэм языхэзым аллергие хувимыIэмэ.

Мыр зыщывмыгъэгъупщэ - бдзэжьейм и сэбэпынагъ псори зэлъытыжар абы и гъэщтыкIэмрэ зэрахъумэ щIыкIэмрэщ. Къэпщэхуну фIыр зэ фIэкIа ямыгъэщта, мыл пIащIэ тIэкIу фIэкIа зытемылъхэрщ. КъыщыфщэхукIэ мыину е ику иту къафщтэ. Апхуэдэр нэхъ гъэхьэзырыгъуафIэщ икIи пкъыгъуэ зэран куэд зыщIашэну хунэсакъым.

«Кавказ Ищхъэрэ МВЛ» IуэхущIапIэм и Къэбэрдей-Балъкъэр къудамэ.