Ерыщу зи хъуэпсапIэр зэзыгъэхъулIэНалшык щыщ, илъэситху хъуауэ Санкт-Петербург щыпсэу икIи щеджэ уэрэджыIакIуэ Болэ Астемыр куэд щIауэ и хъуэпсапIэт Япэ къэрал телеканалым и «Голос» проектым и зэфIэкI щеплъыжыну. ЩIалэм мы гъэ гъатхэм ар зригъэхъулIащ. Налшык къалэм и курыт еджапIэ №13-м и 9-нэ классыр къиуха нэужь, Болэ Астемыр ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым уэрэд жыIэнымкIэ и къудамэм щIэтIысхьащ. 2018 гъэм Болэм и щIэныгъэм щыпищащ Санкт-Петербург къэрал институтым эстрадэмрэ музыкэ гъуазджэмкIэ и факультетым. Астемыр зэрыжиIэмкIэ, ар уэрэд жыIэным дезыгъэхьэхар американ уэрэджыIакIуэ цIэрыIуэ Джексон Майкл и щапхъэрщ. ЩIалэм езыр-езыру зригъэсащ гитарэрэ фортепианэрэ еуэфу. Бельгием щыщ уэрэджыIакIуэ икIи композитор Ван Поль игъэзащIэ Papaoutai уэрэдыр проектым щыжиIащ Астемыр. ГъэщIэгъуэнракъэ, къэпщытакIуэ гупым хэт псоми - Пресняков Владимир, Беляев Антон, Бастэ, Гагаринэ Полинэ сымэ - зэуэ я гупэр къыхуагъэзат абы. КъыжыIапхъэщ, къэпщытакIуэ гупым хэтхэм апхуэдэ гулъытэ зыхуащIар Астемыр зэризакъуэр. Ар хэдэн хуей щыхъум, Беляев Антон дэлажьэм нэхъ къищтащ. Теленэтыным щыкIуэм Iуэхум трагъэгушхуэну абы дэщIыгъуащ и адэ-анэр, и ныбжьэгъухэр. - Беляевым сыдэлажьэм нэхъ къэсщтат, сыту жыпIэмэ, «Голос» проектым езыр уэрэджыIакIуэу хэтти, къытпэщылъ псори ищIэрт, - жиIащ Астемыр. - ИкIи ар къызэрыхэсхамкIэ сыщымыуауэ къызолъытэ. Тольяти щыщ, илъэс 18 зи ныбжь Ляшенкэ Аннэ и гъусэу Астемыр игъэзэщIащ Hi-Fi гупым я «Глупые люди» уэрэд цIэрыIуэр. Беляевым и гупым Астемыр къыхинащ. Иужьым ар пеуащ Капрельян Анастасие Байгузинэ Гульнарэрэ. Ди лъэпкъэгъум игъэзэщIащ Бочелли Андреа и Con te partiro итальян уэрэдыр. Зэпеуэм и кIэух Iыхьэм нэса Астемыр и пэ Байгузинэ Гульнарэ ищами, къэрал псор зэплъ телепроект иным зыкъызэрыщигъэлъэгъуамрэ абы и финалым пхыкIыу къызэрацIыхуамрэ ехъулIэныгъэщ. Болэм жеIэ, утыку щитым зэрыгузэвам къыхэкIыу, и зэфIэкI псори къигъэлъэгъуэну зэрыхузэфIэмыкIар. Ауэ щIалэр къикIуэтхэм ящыщкъыми, и мурадщ и зэфIэкIхэм зригъэужьу зыкъигъэлъэгъуэну. ТЕКIУЖЬ Заретэ.
Поделиться:
Читать также:
19.04.2024 - 17:44 →
ЩIэблэ къабзэ къытщIохъуэ
15.04.2024 - 14:52 →
Агуий и Iэхэлъахэм
15.04.2024 - 12:10 →
Гагарин и гуфIэкIэ
11.04.2024 - 09:30 →
УнафэщIхэмрэ IэнатIэ лъыхъуэхэмрэ зэрощIэ
10.04.2024 - 11:00 →
Дисанэ и ехъулIэныгъэ
|