Пэрытхэм я пэрытыжХьэгъэжей Джонсон ящыщщ къызыхэхъухьа лъэхъэнэр лэжьыгъэшхуэкIэ зыгъэнщIа цIыху щыпкъэхэм. Къэралым и экономикэм и IэнатIэ нэхъ гугъу дыдэхэм я зыужьыныгъэр абы къыгуэхыпIэ имыIэу епхащ. Ар наIуэ пщещI тегушхуауэ къикIуа гъуэгуанэмрэ и гуащIэ хьэлэлым къыпэкIуа пщIэмрэ. Владикавказ къалэм дэт Бгы-металлург институтыр фIы дыдэу къэзыуха щIалэм Сыбыр Жыжьэр къыщыхуагъэлъагъуэм, зымащIэкIи зрилъэфыхьакъым. Мы гъащIэм Iуэхушхуэхэр къызэрыщыпэплъэр ищIэ нэхъей, кърагъэза дзыхьым иригушхуэу гъуэгу техьащ. Ар 1961 гъэрт. ЗэманыфI дэкIащ Норильск бгы-металлург комбинатым езым и лъэIукIэ абы рабочэу лэжьэн зэрыщыщIидзэрэ икIи зэи хущIегъуэжакъым. Зыхыхьа гупми унафэщIхэми псынщIэу гу лъатащ Хьэгъэжейм зыпэрыт IэнатIэм пщIэ зэрыхуищIым, цIыхухэм дахэу, екIуу зэрахэтым, куэд дэмыкIыуи мастеру ягъэуващ. ИужькIэ щIалэ жыджэрым, набдзэгубдзаплъэм цехым, гъуаплъэ заводым и унафэщI къулыкъухэр къыхуагъэфэщащ. Зи пщэрылъхэр гъуэзэджэу зыгъэзащIэ, гуащIэшхуэ къызыпкърыкI IэщIагъэлI жыжьаплъэр нэхъ къалэн гугъухэми зэрыпэлъэщынур нэрылъагъути, Надеждинск металлург заводым и Iэтащхьэу ягъэкIуащ. А илъэсхэм нэхъри наIуэ къэхъуащ Джонсон къызэгъэпэщакIуэфIу, унафэщI Iэзэу, лэжьакIуэ емызэшыжу зэрыщытыр. Предприятэм и зехьэкIэр иригъэфIэкIуащ, IэнатIэхэм щIэ куэд хилъхьащ. Адыгэ щIалэм и зэфIэкIыр къэрал псом хэIущIыIу щыхъуащ икIи, и IуэхущIафэр щапхъэу къахьырт. Абы и къэмылэнджэж лэжьыгъэм Ленин ордену тIу къыпэкIуащ, 1985 гъэм Лэжьыгъэм и ЛIыхъужь цIэ лъапIэр къыфIащащ. ИужькIэ Джонсон Балхаш бгы-металлург комбинатым и унафэщI хъури, пенсэм кIуэху абы щылэжьащ. ТIысыжа щхьэкIэ зрагъэгъэпсэхуакъым, къыщIэлъэIури 1996 гъэм нэхъапэм здэщыIа комбинатым и Iэтащхьэу яшэжащ. Иджы ар «Норильск никель» РАО-м и унафэщIщ, а предприятэмрэ «Норильскгазпром» АО-мрэ я директорхэм я советхэм хэтщ, Красноярск крайм и Хабзэубзыху Зэхуэсым и депутатщ. Джонсон щигъэзэжам Норильск бгы-металлург комбинатыр щытыкIэ хьэлъэ дыдэм итт, сом триллион 14 (абы щыгъуэ щыIа уасэмкIэ) кредитор щIыхуэу телът. Хьэгъэжейм и фIыгъэкIэ предприятэр «къэбэуэжащ». ИлъэситI нэхъ дэмыкIыу никелу къыщIагъэкIым процент 23-кIэ, гъуаплъэр - 14-кIэ, кобальту ягъэхьэзырым процент 40-м нэскIэ, лэжьыгъэм хъеру къитым хуэдэ зырэ ныкъуэкIэ, налогыу ятым хуэдищкIэ хэхъуащ, щIыхуэхэр къанэ щымыIэу зытрагъэкIыжащ. Апхуэдэу мылъкур зэрызэрагъэзахуэм къыпэкIуэу сом триллиони 2,6-рэ къыдагъэхуащ. ЗэхъуэкIыныгъэ хьэлъэхэр къыщрахьэжьа а зэманми Джонсон IуэхукIэ игъэнэIуащ рынок хъыжьэм узэрыпэщIэтыфыну Iэмалхэр.
Поделиться:
Читать также:
26.04.2024 - 12:55 →
Уэрамыр къагъэщIэрэщIэж
26.04.2024 - 12:33 →
Гъатхэр фыщысакъын хуей лъэхъэнэщ
25.04.2024 - 16:00 →
ЩIэщхъуитI
25.04.2024 - 14:33 →
Iус зэхэлъым къыщIэупщIэм хохъуэ
25.04.2024 - 13:00 →
Хэкур фIыуэ лъагъуным хуаущий
|