«Гуэрэн» шыгъэжапIэм мазаем и 26 - 27-хэм щекIуэкIащ мыгъэрей шыгъажэ кIыхьхэм я япэ зэхьэзэхуэр.
Адыгэшыр хъумэнымрэ зегъэужьынымкIэ фондым и президент Сибэч Артур сыт щыгъуи хуэдэу гухэхъуэу къызэIуихащ шыгъажэ кIыхьхэм я чэзур. «Куэдым ямыщIэнкIи хъунущ, ауэ ди республикэр шыгъажэ кIыхьхэм я Хэкущ, - жиIащ Сибэчым зэхьэзэхуэм хэтахэмрэ къекIуэлIахэмрэ фIыщIэ псалъэкIэ защыхуигъазэм. - Урысейм япэу щекIуэкIа шыгъажэ кIыхьыр щызэхэтар Къэбэрдей-Балъкъэрырщ. Шыгъажэ кIыхьхэмкIэ Урысейм и япэ гуп къыхэхам хэтари адыгэшхэм теса адыгэ щIалэ защIэщ. Стокгольм щызэхашауэ щыта Дунейпсо шыгъэджэгум «шыгъажэ кIыхьхэр» унэтIыныгъэм хэтари адыгэшым теса къэбэрдей адыгэщ. Си гуапэщ а хабзэхэр иджыри мы щIыналъэм зэрыщытхуэхъумэр. «Гуэрэныр» илъэс зыбжанэ хъуауэ шыгъажэ кIыхь егъэкIуэкIынкIэ щыпэрытщ Урысейм. Франджымрэ Испаниемрэ уакъыфIэкIмэ, ди къэралыр а IуэхумкIэ дунейм щыещанэщ. Дэ мыбдежым дыщызэдауи ди Iуэху еплъыкIэхэр щызэтемыхуи куэдрэ къытхуохуэ, ауэ дызэгурыIуэныр ди япэ къалэнщ. ДызэгурымыIуэу адэкIэ дыкIуэтэфынукъым».
Сибэчым къыхигъэщащ адыгэшым и псынщIагъми зэхьэзэхуэхэм къекIуалIэхэм я бжыгъэми гу лъыптэу зэрыхэхъуэм. Фондым и унафэщIым щIалэгъуалэр къыхуриджащ я «шыгъажэ унагъуэр» нэхъ ин ящIыну, цIыху нэхъыбэ кърашэлIэну.
Нэхъ пасэу зэбгратыкIауэ щыта хъыбарым ипкъ иткIэ, километри I20-рэ зи кIыхьагъ гъуэгуанэр «зы сыхьэтым къриубыдэу километр I5» псынщIагъым къыкIэрымыхуу къэзыкIум сом мини I20-рэ иратыну къагъэгугъат. Зи гугъу тщIы зэхьэзэхуэм апхуэдэ зэфIэкI къыщигъэлъэгъуащ зы сыхьэтым километр I7,II-рэ псынщIагъ къигъэлъагъуэу, япэу къэса Щоджэн Щамел. ЕтIуанэ увыпIэр къихьащ Касог шым теса Егъэн Идар, ещанэр – Зыхъуэ Замирщ (и шым и цIэр Сальмэщ).
