Афэрым, «Вагъуэ цIыкIу»!

Зэман кIэщIым къриубыдэу ди республикэми нэгъуэщI щIыналъэхэми цIэрыIуэ зыщызыщIыфа гуп дахэщ щапхъэ зытрах «Вагъуэ цIыкIу» къэфакIуэ ансамблыр. Илъэсих хъууэ аращ абы и художественнэ унафэщI, «Кабардинка» къэрал академическэ ансамблым илъэс куэдкIэ хэта, КъБР-м гъуазджэхэмкIэ щIыхь зиIэ и лэжьакIуэ Къурашэ Эдик ар къызэрызэригъэпэщрэ.

 

«Вагъуэ цIыкIу» ансамблым хэт цIыху плIыщIым хэбдзыну зы яхэткъым жыхуаIэм хуэдэщ. Я унафэщIым жиIэр зэхахыу, абы сыт и лъэныкъуэкIи едаIуэу, зэрамыгъэщIэхъуным хэту апхуэдэхэщ. «Гупыр зытещIыхьар сабий цIыкIухэрщ, атIэми илъэсихым къриубыдэу къыдэкIуэтеяхэм «ансамблым куэдщ фызэрыхэтар» схуажеIэнукъым, абы щыгъуэми ягури я псэри Iуэхум зэретар слъагъуу, - жеIэ Эдик. - Ауэ сыхущIокъу ансамблым нэхъ цIыкIухэри зэрыхэзгъэхьэным, щхьэхуэу згъасэ гупхэм нэхъ къыхэжэпхъыкIхэр, зэфIэкI зиIэу слъагъухэр къыхэсшурэ». Эдик зи гугъу ищI гупхэр тIу мэхъу, сабий садым кIуэхэмрэ школым и пэщIэдзэ классхэм щIэсхэмрэ хэту, дэтхэнэри цIыху плIыщI-плIыщI хъууэ. НэхъыщIэхэр мазий хъуауэ и нэIэм щIэтщ, курытыр - илъэсрэ мазийрэ ипэкIэ зэхуишэсащ.
- Сабийм и джэгугъуэр щикI зэман иIэщ, илъэси 5 - 6-хэм и деж, макъамэр зыхищIэн щыщIидзэри къыпхуэхутэнущ. Мис а тIум я зэхуаку дэлъ зэман кIэщIыр къызэрызубыдынырщ сызыхущIэкъур, - жеIэ Эдик. - Апхуэдэуи яужь ситщ псори зэгъусэу гъэсэн щIэздзэным, сыту жыпIэмэ сабийхэр джэдкъуртым къриша джэджьейм хуэдэщ, иужьыIуэкIэ «дунейм къытехьахэр» Iуэхум нэхъ хэшэгъуей хъунри зыхуэIуа щыIэкъым. Мазэ-мазитIкIэ сепсалъэу аращ си ныбжьэгъу цIыкIухэм: сызыхуейр къагурызогъаIуэ, я лъэбакъуэхэр ябжыфу, сатырым захуэу ирикIуэу, нэгъуэщIу изогъасэ.
Зи ехъулIэныгъэхэм дыкIэлъыплъ, къалэшхуэхэм щит концертхэм теухуа тхыгъэхэр ди газетым теддзэ, ди республикэм щекIуэкI Iуэху дахэхэм зэрыхэтыр гуапэ тщыхъу «Вагъуэ цIыкIум» зэрызиужьым и щыхьэтщ гупым и макъамэ унафэщI, ди республикэм и цIыхубэ артист Сэхъу Хьэсэн пшынэ еуэкIэ иригъащIэу ансамблым и деж гуп щхьэхуэ зэрыщиIэр, бэрэбанэ еуэну хуейхэми хухаха гупжьей зэрылажьэр (зыгъасэр Шэрэдж Алимщ).
Иужьрей илъэсым къриубыдэу абы Налшык щитащ (Къафэм и дунейпсо махуэм ирихьэлIэу, мэлыжьыхь мазэм) сольнэ концерт, Дыгъэмыс Шершнёв Виктор и цIэр зэрихьэу къафэмкIэ зэхьэзэхуэ щекIуэкIам япэ увыпIэр, гран-при саугъэтыр, къыщихьащ. Дыгъэгъазэм и 10 - 14 махуэхэм хореографие гъуазджэмкIэ «GRAND PREMIUM» дунейпсо зэпеуэу Санкт-Петербург щекIуэкIам хэтати, гупыр зэпеуэм и лауреат хъуащ (I нагъыщэ), «Лъэпкъ къафэхэр» Iыхьэм и саугъэт нэхъыщхьэр къахьащ, ахъшэ саугъэтхэр къыхуагъэфэщащ. РСФСР-м и цIыхубэ артист Ульбашев Мутай и фэеплъ пшыхьым, иджыблагъэ Налшык и Музыкэ театрым щекIуэкIам, гупым щигъэзэщIа къафэхэм Iэгуауэшхуэ хуаIэтащ.
Гупым и репертуарым хэтщ «Уэркъ къафэ», «Авар хъыджэбз къафэ», «Кабардинка», нэгъуэщIхэри. Дэтхэнэри зыхуей хуэзэу, щытхъурэ фIыщIэрэ къалэжьу екIуу ягъэлъагъуэ. Эдик зыхущIэкъур тхыдэ зиIэ, илъэс куэд щIауэ адыгэхэм къадэгъуэгурыкIуэ къафэ дахэхэр зэригъэувынымрэ ахэр IэщIыб щIэблэм ямыщIынымрэщ. «Си гъэсэнхэм къафэр лэжьыгъэ, IэщIагъэ яхуэхъункIи мэхъу, дэнэкIэ ямыгъазэми, ди напэр трамыхыу утыку итыкIэ дахэм и щэхухэр ящIэну аращ сызыхуейр», - къыджеIэ Эдик.

ЦIыхуищэрэ тIощIым щIигъу зи нэIэм щIэт, къэфэкIэм и щэхухэм я мызакъуэу дэтхэнэри гъащIэм лъэ быдэкIэ хигъэувэным хущIэкъу унафэщIым мурад гуэррэ хъуэпсапIэрэ зэриIэм шэч хэлъкъым. Абыхэм дыщигъэгъуазэмэ дызэригуапэр щыжесIэкIэ, жэуапу къызитращ:
- ИлъэсыщIэм узыншэу дытехьэну си гуапэщ. Утыку щIимытын, къыщIэмыфэн, щIэмыгушхуэн ямылъагъуу сабийхэр къэхъуну, гукъыдэжым ахэр зэи щымыщIэну Тхьэм жиIэ. Мыдрейуэ 2019 гъэм и накъыгъэ мазэм Москва щекIуэкIыну «Континент данс» зэхьэзэхуэм дыхэтыну драгъэблэгъащи, абы узыншэу дынэсыну, екIуу зыкъыщыдгъэлъэгъуэну догугъэ, ди хъуэпсапIэ нэхъыщхьэри мызэкIэ аращ.
Я гурылъ псори гупым хэтхэмрэ абы и гъэсэнхэмрэ къайхъулIэну! Афэрым, «Вагъуэ цIыкIу»!

 

ИСТЭПАН Залинэ.
Поделиться: