Илъэс 90 гъуэгуанэ

Мы гъэм илъэс 90 ирокъу Нарткъалэ дэт консерв заводыр къызэрызэIуахрэ. Ар лажьэу яутIыпщауэ щытащ 1934 гъэм. Ди щIыналъэм и япэ промышленнэ IуэхущIапIэ лъэрызехьэхэм ящыщу щыта заводым лэжьэн щыщIидза япэ илъэсхэм щегъэжьауэ  мыхьэнэшхуэ щиубыдащ  тIысагъащIэ Докшукинэ посёлкэм, иужькIэ Нарткъалэ зыфIаща жылэм щыпсэухэм я гъащIэм. 

 Заводым и лэжьакIуэхэр дапщэщи хущIэкъуащ я пщэрылъ къалэнхэр къызыхуэтыншэу зэрагъэзэщIэным. Консерв заводым нэхъыбэу щелэжьырт нащэм, помидорым, баклажаным, къэбышкIийм, джэш цIынэм, нэгъуэщI хадэхэкIхэми. Абыхэм къыхащIыкI фIэIугъэ зэмылIэужьыгъуэхэр щызэбгрыкIырт Совет Союзым и щIыпIэ куэдым. 
Заводым и зэфIэкIхэм псом хуэмыдэу зиужьащ, ар акционер зэгухьэныгъэм хуэкIуа нэужь. Абы и лэжьыгъэр зэтриухуащ иджырей мардэщIэхэм, технологиещIэхэм хуэкIуэу. Зы илъэсым къриубыдэу предприятэм къыщIигъэкIыф хъуащ консерв зэрылъ банкI мелуан бжыгъэхэр. ЩIэупщIэшхуэ яIэу къокIуэкI абы щытраIуантIэ фIэIугъэхэу нащэм, помидорым, джэш хъурей щхъуантIэм къыхэщIыкIахэм, пхъэщхьэмыщхьэ зэмылIэужьыгъуэхэм, хадэхэкIхэм къыщIаху псыхэм, нэгъуэщIхэми. 
Сыт хуэдэ лъэхъэни заводым щолажьэ лэжьыгъэм и гугъуехьхэм къапимыкIуэт гуп зэрыIыгъ. КъыщызэIуахагъащIэм, илъэс 90 ипэкIэ,  къищта а хьэлыр IуэхущIапIэм ноби къыдогъуэгурыкIуэ. АтIэми, гуп зэдэурщ сыт хуэдэ къалэнми, ар нэхъ ин дыдэу ирехъуи, пщIэрэ щIыхьрэ иIэу пэлъэщыфынур.