Урысейм и цIыху дыхъуну дыхуейщ

           Урысейм Палестинэм хиубыдэ Газэ секторым щыIэ и цIыхухэр къишэжын щIидзащ щэкIуэгъуэм и 12-м. А лэжьыгъэр зэфIегъэкI УФ-м КъэхъукъащIэ къызэрымыкIуэхэм япэщIэтынымкIэ и министерствэм (МЧС).

        Урысей Президентми абы и унафэкIэ Iуэхур зэфIэзыгъэкI МЧС-ми фIыщIэ хуэзыщI цIыхухэр ди къэралым къаша къудейкъым. Абыхэм ящыщ куэд Кавказым къагъэIэпхъуащ. «Дэ Урысейм и цIыху дыхъуну дыхуейщ», - жиIащ Дагъыстэным Газэм щыщу къаша гупым  я нэхъыжьым.

         Зи гугъу тщIы цIыхухэр Палестинэм щыпсэууэ арати, «щтапIэ ихьэжахэм» хуащIэ псомкIи зыщIагъэкъуащ. Дипломат зэпыщIэныгъэкIэ къэралым игъэкIуахэр бысымхэм ягурыIуэри, гузэвэгъуэм хэхуахэр къыхашащ. Блыщхьэм, щэкIуэгъуэм и 13-м, Урысейм и цIыхухэу Газэм щыIахэр  Мысырым и щыхьэр Каир и кхъухьлъатэ тедзапIэм нашэсащ. МЧС-м и лэжьакIуэ Мартынов Даниил лэжьыгъэр зэрекIуэкIым щытепсэлъыхьащ абдежым:

         - Газэ щIыпIэм дызэрыщыIэрэ тхьэмахуэм щIегъу. Нобэ зэфIэдгъэкIа Iуэхур къыдэхъулIэным ипэ къихуэу, цIыху куэдым захуэдгъэзэн хуей хъуащ, лэжьыгъэшхуи едгъэкIуэкIащ. Махуэ къэмынэу, щIыналъэм и унафэщIхэм, граждан зыхъумэжыныгъэмкIэ, къэрал кIуэцI IуэхухэмкIэ министерствэхэм, посольствэхэм допсалъэ. Абы Мысырри, Израилри, Палестинэри хеубыдэ. ЦIыхухэр нэхъ псынщIэу къитшыжын щхьэкIэ, ХАМАС зэгухьэныгъэм щыщхэми даIущIэн хуей хъуащ. Дэ мыбы ди Президент Путин Владимиррэ МЧС-м и министр Куренков Александррэ я унафэкIэщ дыкъызэрыкIуари, цIыхухэр хэкум гъэIэпхъуэжыныр зэрыхъукIэ зэрыдмыгъэгувэным иужь дитщ. Нобэрей IуэхукIэ ахэр цIыху 70 мэхъу. Ди къэралым щыщу зы цIыхум «фыкъыддэIэпыкъу» къыджиIэху, дыкIуэжынукъым. Апхуэдэ лъэIукIэ зыкъытхуэзыгъазэхэр «Рафах» зэпылъыпIэм деж гъунапкъэм щызэпрыдошри, ди кхъухьлъатэм идогъэтIысхьэ.  

          Израилымрэ Америкэмрэ лейуэ зэрахьэр нахуэу дунейпсо утыкум кърихьащ Урысейм и лIыкIуэу ООН-м зэпымыууэ щыIэ зэпыт Небензя Василий. ООН-м  ШынагъуэншагъэмкIэ и советым и зэхуэсым абы щыжиIащ: «Палестинэм цIыхугъэр зыгъэпуд гузэвэгъуэшхуэ щокIуэкI, дуней псор зэлъищIысауэ. Израилым и авиацэм цIыхухэр щыпсэуа унэхэм я нэхъыбэр зыри къыхэмынэжу зэтрикъутащ, зыхэпсэукI хуэIухуэщIэхэр хьэбэсабэ ищIащ. Ди щхьэфэцым зресэ икIи дыкъегъэгубжь школхэр, сымаджэщхэр, мэжджытхэр, щтапIэ ихьэжыпIэхэр лагъымхэм я нэщанэуапIэ зэращIам.  НаIуэу къыхыдогъэщ: бэм къагъэщхьэпэ ухуэныгъэхэм IэщэкIэ уеуэныр цIыхум и хуитыныгъэм ебгъэрыкIуэ зэуэкIэщ. Дунейпсо цIыхубэм и хуитыныгъэр узэбакъуэ мыхъунщ. Сыт хуэдэ зауэри гузэвэгъуэшхуэщ, ауэ мамыру цIыхубэр щыпсэухэм, махуэ къэс я щхьэ IуэхукIэ къагъэсэбэп ухуэныгъэхэмрэ IуэхущIапIэхэмрэ къэбгъэуэнкIэ Iэмал иIэкъым».

         Небензя пхъашэу тепсэлъыхьащ Израилыр мамыр гъащIэм ебгъэрыкIуэным зэрыщымымэхъашэм, гущIэгъуншагъ ин зыхэлъ и унафэ пхэнжхэмкIэ сабии, балигъи, цIыхубзи зэрызэдигъакIуэм.

         Палестинэмрэ Израилымрэ я зэпэщIэтыныгъэр жэпуэгъуэм къызэрыхъеижрэ, цIыху мин 12-м щIигъу хэкIуэдащ. Колумбием, Боливием, Чилим, Иорданием, Бахрейным, Гондурасым, Тыркум я лIыкIуэхэр Израилым кърашыжащ. Тыркум я уэчылхэм я зэгухьэныгъэм къэралыр дунейпсо хейщIапIэм ирашэлIэну унафэ къащтащ. Апхуэдэ жэрдэмкIэ утыку къихьащ Ирландием щыщ парт унафэщI Макдональд Мэри. Ауэ иджыблагъэ зэхуэса хьэрып къэралхэмрэ Тыркумрэ хуабжьу псэлъа фIэкIа, Палестинэм хуэщхьэпэн хэкIыпIэ гуэри къагъэлъэгъуакъым. Абы и щхьэусыгъуэри наIуэщ: щIыдагъэмрэ Iэщэмрэ я унафэр зыщIхэр Израилымрэ Америкэмрэ я жыIэм щIэтщ.  

         «Хьэрып къэралхэм сыт тщIэн хуейр жыфIэу фызэхуэсауэ зэхэсхащи, фэ зы къалэн закъуэщ фиIэр: фи жьэр зэтефпIи фыщыс!» - жиIэри къэпсэлъащ укIытэри цIыхугъэри зыфIэкIуэда, Израилым и премьер-министр Нетаньяху Биньямин. «Мы Палестинэм къыщыбгъэхъум узэрихьыжынум зыхуэгъэхьэзыр!» - къритащ абы жэуап Тыркум и президент Эрдоган Тайип. Дунейпсо цIыхубэр уэрамхэм дэтщ, сабий укIыныр щывгъэт жаIэри. Ауэ гузэвэгъуэм и кIэр иджыри къэлъагъуэркъым. 

       ПIалъэкIэ зэзэуэныр ягъэувыIауэ, иджыпстукIэ лъэныкъуитIым гъэру яIыгъа цIыхухэр зэрахъуэж. ХэкIыпIэ захуэ мы Iуэхум игъуэтыным дунейпсо цIыхубэр щIохъупс.

                                                                              ЧЭРИМ Марианнэ.