Къэралым щыпашэхэр

18 декабря, 2020 - 05:01

БэнэкIэ хуит

Смоленск къалэм иджыблагъэ щекIуэкIащ бэнэкIэ хуитымкIэ щIалэгъуалэм я урысейпсо зэхьэзэхуэ. Къэбэрдей-Балъкъэрым икIахэм абы медалищ къыщахьащ.

Зи ныбжьыр илъэс 23-м щIимыгъуахэм я зэпеуэм Урысей Федерацэм щынэхъ лъэщ дыдэ хъуащ Шэрий Иналбэчрэ ЗакIуий Азэмэтрэ. Абыхэм дыщэ медалхэр къыхуагъэфэщащ.
Иналбэч щыбэнар килограмм 70-м нэс зи хьэлъагъхэм я дежщ. Шэч къызытумыхьэн текIуэныгъэхэр къыпэщIэта псоми къафIихьри, ар финалым нэсащ. Абы ныкъуэкъуэгъу къыщыхуэхъуащ Иркутск щыщ Балтуев Александр. КIэух зэIущIэм хуумыгъэфэщэну адыгэ щIалэр и хьэрхуэрэгъум куэдкIэ ефIэкIащ икIи, хухаха зэманыр имыух щIыкIэ 13:2-уэ хигъащIэри, зэхьэзэхуэм бжьыпэр щиубыдащ.
Шэрийм зыкIи зыкъыкIэригъэхуакъым ЗакIуий Азэмэт. Килограмм 92-м нэс зи хьэлъагъхэм я зэпеуэм абыи къыщыпэлъэщын къыхэкIакъым. Осетие Ищхъэрэ - Аланием щыщ Толпаров Аслъэн щебэна финал зэIущIэм абы и тепщэныгъэр апхуэдизкIэ щылъагэти, бжыгъэр 10:0-у япэ щищым судьям зэIущIэр къызэтригъэувыIащ.
«Финал мащIэм» щытекIуэри, бэнэкIэ хуитымкIэ щIалэгъуалэм я урысейпсо зэхьэзэхуэм домбеякъ медалыр щызыIэригъэхьащ Гъурдалий Рахьим. Килограмм 61-м нэс зи хьэлъагъхэм я зэпеуэм и иужь зэIущIэм абы щыхигъэщIащ осетин бэнакIуэ лъэщ Бекоев Вадим.

 

ЖЫЛАСЭ Замир.
  • 11 просмотров
Поделиться:

Читать также:

25.04.2024 - 17:30 → Олимп чемпионыр ящыгъупщэркъым
25.04.2024 - 17:00 → Кубокыр къыздашэ
23.04.2024 - 20:03 → Уанэш зэхьэзэхуэшхуэ
23.04.2024 - 17:06 → Гуп зэпеуэм япэ щыхъуащ
23.04.2024 - 15:26 → Урысейм щынэхъ лъэщхэр