Улахуэхэм хагъахъуэ

Къэралым и бюджет IэнатIэхэм щылажьэхэм я хэхъуэр нэхъыбэ щIыным ехьэлIауэ Урысей Федерацэм и Правительствэм лэжьыгъэ пыухыкIахэр зэпымыууэ ирегъэкIуэкI, УФ-м и Президентым къахуигъэува къалэнхэр игъэзащIэу. 

Псалъэм къыдэкIуэу, УФ-м и Правительствэм и ахъшэ гъэтIылъыгъэм къыхэкIыу сом мелард 11 хуаутIыпщынущ, языныкъуэ федеральнэ къэрал IуэхущIапIэхэм я лэжьакIуэхэм я мазэ хьэкъым хухагъэхъуэн щхьэкIэ. Апхуэдэ унафэм иджыблагъэ Iэ щIидзащ УФ-м и Правительствэм и УнафэщI Мишустин Михаил. ИкIи мыгувэу ар зыхащIэнущ егъэджакIуэхэм, медицинэм и лэжьакIуэхэм, щIэныгъэ ищхьэ щрагъэгъуэт еджапIэхэм щылажьэ егъэджакIуэхэм, щIэныгъэ лэжьакIуэхэм, щэнхабзэмкIэ IэнатIэхэм пэрытхэм.

Абыхэм къыхуаутIыпщыну ахъшэм щыщу сом меларди 4,6-р здагъэкIуэнур егъэджэныгъэм пыщIахэм я улахуэм хухагъэхъуэнырщ, сом меларди 2-м нэблагъэр – щIэныгъэм, сом меларди 3,8-р медицинэ IэнатIэхэм пэрытхэрщ, сом мелуан 860-р щэнхабзэм и лэжьакIуэхэрщ. 

УФ-м и Правительствэм и пресс-IуэхущIапIэм къызэрыхигъэщамкIэ, апхуэдэ щIыкIэкIэ, къэрал бюджет IэнатIэхэм щылажьэхэм я улахуэр хэгъэхъуэным ехьэлIауэ УФ-м и Президентым 2012 гъэм къыдигъэкIа унафэр гъэзэщIа мэхъу.

                                                        ХЬЭЩЫКЪУЕЙ Олег.