Кавказ Ищхъэрэр къыхэзыххэрУрысейм и туроператорхэм я зэгухьэныгъэм хъыбар къитащ Кавказ Ищхъэрэм и щIыналъэхэм зыщызыгъэпсэхуну къакIуэ туристхэм я бжыгъэм гъэмахуэ блэкIам зэрыхэхъуар. Абыхэм нэхъыбэу къыхахыр Дагъыстэнырщ. «Туристхэм Дагъыстэныр къыщIыхахым нэхъыбэу и щхьэусыгъуэр, я нэгу зрагъэужьыным къыдэкIуэу, тенджызми зыщагъэпскIыну Iэмал яIэщи аращ. Путевкэ тщэхэм я процент 80-р ДэгъыстанымкIэщ здэкIуэр», - жиIащ «Алеан» туроператорым и унафэщI Булах Оксанэ. «Туртранс-Вояж» урысей компанием и унафэщI Гончар Татьянэ къызэрыхигъэщамкIэ, щIэупщIэшхуэ иIэщ Къэбэрдей-Балъкъэрым. Псом хуэмыдэу, Iуащхьэмахуэ зыщызыгъэпсэхуну зыфIэфIхэр куэд мэхъу. Абы нэмыщI, КъБР-м къэкIуэн ипэ иту республикэм и къалащхьэ Налшык и хьэщIэщхэм я пэшхэр пIалъэ пыухыкIакIэ къызэращтэм теухуа зэгурыIуэныгъэр Iэмалу къэзыгъэсэбэп туристхэм я бжыгъэм хуэдищкIэ хэхъуащ. Ар къызыхэкIыр я узыншагъэм щыкIэлъагъэплъ санаторэхэмрэ курортхэмрэ я путевкэхэр зэрыпудырщ. Абыхэм я уасэхэм нэгъабэ лъандэрэ хэгъэхъуакъым. Осетие Ищхъэрэ - Аланиер къыхэзых туристхэр нэхъыбэу здэкIуэр Даргавс дэт «ЛIахэм я къалэрщ», Куртатинскэ, Дигорскэ аузхэрщ. Ингушым я лъэпкъ чэщанэхэри яфIэгъэщIэгъуэнщ зыплъыхьакIуэхэм. «Къэбэрдей-Балъкъэрымрэ Къэрэшей-Шэрджэсымрэ туристхэр щIэкIуэр абыхэм я къурш дахэхэр зрагъэлъагъун щхьэкIэщ. ЩIэупщIэ яIэщ махуитI-щыкIэ а щIыпIэхэм къыщызэдгъэпэщ экскурсиехэм», - къыпещэ Булах Оксанэ. Адыгейр нэхъыбэу къыхэзыххэр автотуристхэрщ. Ахэр дехьэх Лъагъуэ-Накъэ и джабэ нэкIухэм, абы къыщыщIэж псы хуабэхэм. Шэшэным кIуэхэм нэхъыбэу Грозный-ситим зыщаплъыхьын щхьэкIэщ путевкэхэр къыщIащэхур. Рейтингым и кIэм итщ Осетие Ищхъэрэ - Аланиемрэ Ингушымрэ. Урысейм и туроператорхэм я зэгухьэныгъэм къызэрыхигъэщамкIэ, Кавказым зыщызыгъэпсэхуну къыхэзыххэм я бжыгъэм хэхъуэм и мызакъуэу, щIыналъэ зыбжанэ зэуIуу зэзыгъэлъагъуну хуейхэри нэхъыбэ хъуащ. «Гъэмахуэ блэкIам къигъэлъэгъуащ Санкт-Петербург, Мэзкуу, Къэзан, Калининград, «Золотое кольцо»-м хыхьэ къалэхэм къадэкIуэу, Кавказ Ищхъэрэм и щIыналъэхэм яIэ щIэупщIэм фIыуэ зэрыхэхъуар», - жеIэ Булах Оксанэ. БЭТОКЪУЭ Албэч.
Поделиться:
Читать также:
27.04.2024 - 14:59 →
Лъагъуныгъэмрэ зэгурыIуэмрэ я къарур
27.04.2024 - 14:07 →
Шы гъэхъуным теухуа хабзэщIэ
27.04.2024 - 12:26 →
Бжэ зэIухахэм я махуэ
27.04.2024 - 12:18 →
Гугъуехьыр пщIэншэ хъуакъым
27.04.2024 - 12:02 →
Гъатхасэр и гуащIэгъуэу йокIуэкI
|