Нартхэм я ныбжьырИджыблагъэ Тыркум къыщыдэкIащ тхылъ гъэщIэгъуэн, абы щыпсэу щIалэ Балъкъэр Селчук итхауэ. Ар адыгэбзэкIи тыркубзэкIи къыдэкIами, тыркубзэкIэ дунейм къытехьа тхылъ 4000-р зэбграхащ, адыгэбзэкIэ тхам щыщу 50 къудейщ Къэбэрдей-Балъкъэрым къэсар. Абы щIэупщIэшхуэ зэриIэм къыхэкIыу, къалъытащ Налшык и тхылъ тедзапIэхэм ящыщ зым ар къыщыдагъэкIыныр къезэгъыу. Балъкъэр Селчук и адыгэбзэр зыщIыпIи щимыджа адыгэбзэщ. Ар анэ быдзэшэм хуэдэу къабзэщ, и псалъэ гъэпсыкIэм, жьэгу мафIэм и хуабагъыр зыхэмыкIащ, щIэныгъэ зэзыгъэгъуэтыну хуейм, тхылъыр хуэщхьэпэнущ, зэрытха бзэри гурыIуэгъуэщ. Селчук зэригъэпщащ мысыр, алыдж, инд, нарт IуэрыIуатэхэр. ЗэрытщIэщи, зэгъэпщэныр IэмалыфIщ щыIэр зэрызэщхьэщыкI-зэрызэтехухэр кърипхутэну, ауэ ари 1эмал тыншкъым: зэбгъапщэнур щыми, плIыми я бзэхэм, я тхыдэхэм хэпщIыкIын хуейщ. Селчук хузэфIэкIащ щIэныгъэр тхылъхэм къриджыкIыну, щIиджыкIыну итIанэ ахэр зэпилъытыжыну. А Iуэхум уебгъэрыкIуэныр щIэныгъэ «гъущэкIи» зэфIэкIыркъым. Хэкупсэр гуащIэу зыхэпщIэн хуейщ, ар Iуэхум хэмышыпсыхьамэ, мурадыр дыкъуакъуэ мэхъу. - Пасэрей алыджхэм я IуэрыIуатэмрэ нарт IуэрыIуатэмрэ нобэр къэсыхункIэ зэрагъэпщакъым. Апхуэдэ дыдэу шумер IуэрыIуатэмрэ пасэрей мысыр IуэрыIуатэмрэ ирагъэпщакъым нарт эпосыр, зы лъэхъэнэм дунейм къытехьауэ хуагъэфащэми. Мы тхылъыр щIэттхам и щхьэусыгъуэр мыращ… Япэрауэ, алыдж IуэрыIуатэмрэ нарт IуэрыIуатэмрэ дыхэплъэу дытепсэлъыхьынущ. КъыкIэлъыкIуэ Iыхьэр пасэрей мысыр IуэрыIуатэм теухуащи, пирамидэхэм я тхыдэм щыгъуазэ дыхуэхъунущ. Ещанэ Iыхьэр зыхуэгъэпсар шумер IуэрыIуатэращ. Аращи, щIэджыкIакIуэм къыпэщылъ зекIуэ кIыхь нэужьым нарт IуэрыIуатэр къызэрытщыхъужымрэ къызэрыдгурыIуэжымрэ иджыри зэ дыкIэлъыплъыжынущ, икIи абы и ныбжьыр къызэрытхутэным дыпылъынущ, - жеIэ тхылъыр зи Iэдакъэ къыщIэкIа Балъкъэр Селчук.
Поделиться:
Читать также:
26.04.2024 - 17:06 →
Тызылыкъуэр пэщIэдзэт
22.04.2024 - 16:16 →
Зы мащэм цIыху 233-рэ
22.04.2024 - 14:55 →
АдыгэлIым и цIэмрэ и картэмрэ
17.04.2024 - 12:43 →
Шуудзэ хъыжьэм и тхыдэ напэкIуэцI
16.04.2024 - 17:52 →
Де Марикур Леон
|