«Москва областым щыIэ «Крокус Сити Холл» концерт гъэлъэгъуапIэм щIэпхъаджащIэхэр теуэри, цIыху пщIы бжыгъэхэр хэкIуэдащ, щэм щIигъу уIэгъэ хъуащ. А гузэвэгъуэшхуэр я гум щIыхьащ Къэбэрдей-Балъкъэрым щыпсэу- хэм. Дэ псори гукIи псэкIи дащIыгъущ лей зытехьахэм, абы хэкIуэдахэм я Iыхьлыхэмрэ благъэмрэ дадощыгъуэ.
Къэбэрдей-Балъкъэр Республикэм щыпсэухэм, си щхьэм къабгъэдэкIыу хэкIуэдахэм я унагъуэхэм сахуогузавэ. УIэгъэ хъуахэм я узыншагъэр щIэх зэфIэувэжыну согугъэ», - жиIащ КIуэкIуэ Казбек.
Москва областым къыщыхъуа а гузэвэгъуэшхуэм ипкъ иткIэ, къэралым и щIыналъэ куэдым я цIыхухэр ядощыгъуэ зи Iыхьлыхэр хэкIуэдахэм. Къэбэрдей-Балъкъэрым и цIыхухэри аращ. Ди республикэм махуэ блэкIахэм екIуэкIын хуейуэ щаубзыхуауэ щыта гуфIэгъуэ зэхыхьэхэр, нэгузыужь, спорт зэIущIэхэр ягъэIэпхъуащ. А Iуэхум теухуа унафэ къищтащ КъБР-м и Iэтащхьэ КIуэкIуэ Казбек.
КъБР-м и Iэтащхьэ КIуэкIуэ Казбек республикэм и цIыхухэм захуигъэзащ Москва областым къыщыхъуа гузэвэгъуэ Iуэхухэм япкъ иткIэ.
«Къэбэрдей-Балъкъэрым и цIыхухэу пщIэ зыхуэсщIхэ. Москва и Iэшэлашэм щыIэ «Крокус Сити Холл» IуэхущIапIэм къыщыхъуа гузэвэгъуэм къыхэкIыу, ди щIыналъэм щекIуэкIыну гуфIэгъуэ дауэдапщэхэр, спорт зэIущIэхэр пIалъэкIэ дгъэIэпхъуэну унафэ сщIащ, - жиIащ абы. - Къэбэрдей-Балъкъэрым щытыкIэр щызэпIэзэрытщ, псори ди нэIэм щIэтщ. АтIэми цIыху куэд щызэхыхьэ щIыпIэхэм, социальнэ IуэхущIапIэхэм, транспорт IэнатIэм шынагъуэншагъэ къыщызэгъэпэщыным гулъытэ хэха хуэтщIынущ.
Ди республикэм щыпсэухэм, абы и хьэщIэхэм сыныволъэIу нэхъ набзэгубдзаплъэу фыщытыну, шэч зыхуэфщI хьэпшып, цIыху е Iуэхугъуэ гуэрхэр флъагъумэ, хабзэхъумэхэм хъыбар занщIэу евгъэщIэну».
Къэбэрдей-Балъкъэрым и къалащхьэ Налшык дэт Макъамэ театрым и утыкушхуэу Къэбэрдей-Балъкъэрыр Урысейм зэрыгухьэрэ илъэс 400 зэрырикъум и цIэр зезыхьэм деж тхьэмахуэ махуэм щыгъуэ пэкIу щекIуэкIащ. Республикэм и щIалэгъуалэ жыджэрхэм, хэкупсэхэм абдеж къыщызэрагъэпэща фэеплъ щIыпIэм цIыху куэд екIуэлIащ, удз гъэгъахэри тралъхьащ.
КъБР-м и Iэтащхьэ КIуэкIуэ Казбек удз гъэгъахэр трилъхьащ а щIыпIэм, Москва областым хиубыдэ Красногорск къалэм дэт «Крокус Сити Холл»-м к ъыщыхъуа гузэвэгъуэ иным хэкIуэдахэм я фэеплъым хуэщыгъуэу. А щIыпIэм щекIуэкIа щыгъуэ пэкIум хэтащ республикэм и унафэщIхэр, жылагъуэ, щIалэгъуалэ зэгухьэныгъэхэм я лIыкIуэхэр. Абдеж щызэхуэсат къалэдэсхэм, абы и хьэщIэхэм, республикэм щыпсэухэм ящыщ куэд. Абыхэм фэеплъ щIыпIэм деж щагъэтIылъащ удз гъэгъахэр, шэху уэздыгъэхэри щыпагъэнащ. Дэтхэнэми гурэ псэкIэ и жагъуэ хъуащ щIэпхъаджащIэхэм я Iэужь бзаджэм кърикIуахэр: иужьрей хъыбархэм ятепщIыхьмэ, абы хэкIуэдащ цIыхуи 137-рэ, уIэгъэ хъуащ 182-рэ.
Москва областым къыщыхъуа щIэпхъаджагъэр цIыхугъэншагъэ дыдэу къызэралъытэр жаIащ КъБР-м и волонтёрхэм я зэщIэхъееныгъэм и пашэ Балаевэ Салимэ, «ТекIуэныгъэм и волонтёрхэр» урысейпсо жылагъуэ зэщIэхъееныгъэм КъБР-м щиIэ къудамэм и унафэщI Ерыстау Георгий, КъБР-м и ЩIалэгъуалэ Правительствэм и унафэщI Бейтыгъуэн Исмэхьил, Пэрытхэм я зэщIэхъееныгъэм и Къэбэрдей-Балъкъэр щIыналъэ къудамэм и пашэ Баваш Валерие сымэ.
Фэеплъ пэкIум къекIуэлIахэр гукIи псэкIи яхуэгузэващ зи Iыхьлыхэр гузэвэгъуэм хэкIуэда унагъуэхэм. УIэгъэхэми я узыншагъэр щIэх зэтеувэжыну ехъуэхъуащ.
Къэбэрдей-Балъкъэрым щыпсэухэм даIыгъ гузэвэгъуэр къыщыхъуа «Крокус Сити Холл» концерт гъэлъэгъуапIэу Магомаев Муслим и цIэр зезыхьэм деж цIыхухэм къыщызэрагъэпэща фэеплъ пэкIур. «Кърухэр» фIэщыгъэр зиIэ а щыгъуэ пэкIум къыщеуащ усакIуэ Гамзатов Расулрэ макъамэтх Френкель Янрэ зэдатхауэ щыта, а цIэр зиIэ уэрэд цIэрыIуэр.
«Уэрэдыр зи къалэмыпэм къыпыкIахэр ди лъэпкъыбэ къэралым щыцIэрыIуэ цIыхухэщ. Гамзатовымрэ Френкельрэ я творчествэм ноби дызэкъуегъэувэ къэралым ис псори, Хэкум дыхуэпэжыным, цIыхугъэ лъагэр тфIэмыкIуэдыным дыкъыхуриджэу, - жеIэ КъБР-м и Iэтащхьэ КIуэкIуэ Казбек. - «Кърухэр» уэрэдыр Хэку зауэшхуэм хэкIуэдахэм я фэеплъ мыкIуэдыжым теухуащ. Абы и псалъэхэм ноби мафIэу пхесыкI зыхэзых дэтхэнэми и гур, Москва областым къыщыхъуа гузэвэгъуэр езым ейм хуэдэу псэкIэ зыхищIэу.
Си фIэщ мэхъу хэкIуэдахэм ящыщ дэтхэнэми папщIэ щIэпхъаджащIэхэм жэуап ткIий зэрахьынур.
Фэеплъ пэкIум къыпэджэжащ Урысейм щыпсэу цIыху мелуанхэр. Ар толъкъунышхуэм хуэдэу ди Хэку иным щызэбгрокI - дэ псори дощыгъуэ, гузэвэгъуэм хэкIуэдахэм я цIэхэр хуэму жытIэу.
Тщыгъупщэнукъым».
