Уэрэдус, макъамэтх Къущхьэ Роберт Пётр и къуэр лъапIэныгъэ куэд зыбгъэдэлъ лIы щыпхъэт, акъылыфIэт, зэчиифIэт, жьакIуэт, кIуэ аракъэ, хэбдзын хэмылъ жыхуаIэм хуэдэт. Жэщибл-махуиблкIэ убгъэдэсами, уезэшынутэкъым, губзыгъагъэ, гъэщIэгъуэн куэд къыпкърыпхынут, адыгэ лъэпкъым укъызэрыхэкIам урипагэу уи гур щыз ищIынут, и гушыIэкIэ дахэмкIэ утригъэунут, и жьэгум щызэблах ерыскъы IэфIымкIэ уигъэтхъэжынут.
ЛIы зэIэщIэлъ хэIэтыкIат Роберт. ЦIыхушхуэм гушхуэ кIуэцIылъщ жиIэкъэ адыгэм - и гупсысэкIэкIи, и Iуэху щIэкIэкIи, и дуней тетыкIэкIи, и тхэкIэкIи инышхуэт Роберт, куэд къызэщIэзыубыдэт, куэдым хуэIущт, хуэIэкIуэлъакIуэт. Сыту куэдым яхузэIухат абы и гур, и пщIантIэр, и унэбжэр. Сыту дахэу къепщIэпщIэкIрэт и ныбжьэгъухэм я унагъуэхэр. Сыту екIуу игъэхьэщIэрэт ди лъахэм къеблагъэ хьэщIэхэр.
ЩызэзгъэцIыхуа махуэм абыхэ я унагъуэм нихьа и ныбжьэгъухэр республикэм фIыуэ къыщацIыху, пщIэ щызиIэ защIэщ. Ахэр Роберт къэсцIыхун ипэкIэ си нэIуасэу щыта пэтми, иджы Роберт и фэ ясплъ хъуат, арауэ си гугъэт Iущыр зыгъэIущыр, дахэр зыгъэдахэр... Къулхэ Амиррэ Ланэрэ, Шалхэ Хъусенрэ ФатIимэрэ, Езауэхэ Хьэбасрэ Мадинэрэ, Ефэнды Терезэ, Зыхьэ Заурбий, Шыбзыхъуэ Басир, Мыкъуэжь Арсен сымэ Роберт зыпащI щымыIэу я ныбжьэгъу нэхъыжьт, и унагъуэмрэ лъэпкъымрэ я щхьэр лъагэу езыгъэIэтт, адыгэм ди жьантIэр зыгъэдахэт.
ФIагъ куэд зыбгъэдэлъ лIым и зэчийр къыщызэIуихар курыт ныбжьым нэсауэт. Арагъэнт усакIуэкIи, макъамэтхкIи уеджэу щIимыдэр. Имыдэми, Роберт уэрэдус гъэщIэгъуэнт, лъэпкъым, цIыхум, дунейм я купщIэр, мыхьэнэр, лъапIэныгъэхэр, лъэпкъ щэнхабзэм, хабзэм, тхыдэм я курыхыр къыхэщу усэ, поэмэ телъыджэхэр зэхилъхьэрт, абыхэм езыр-езыру макъамэ ящIилъхьэжырт. Апхуэдэуи адыгэбзэр - урысыбзэкIэ, урысыбзэр - адыгэбзэкIэ Iэрыхуэу зэридзэкIырт. Роберт и псалъэр адрейхэм ещхьтэкъым - езым и дуней зыхэщIэкIэ зэриIэжым хуэдэу, и псалъэм и купщIэри къызэрымыкIуэт. ГъэщIэгъуэнт и макъамэ къэгупсысыкIэри, и щхьэм къизэрыхьа гупсысэм и макъамэр и Iэпэхэр зэтригъауэурэ къигупсысырти, телефоным тригъатхэрт, итIанэ и ныбжьэгъу музыкантхэу Къул Амир, абы и къуэш Беслъэн, Шал Хъусен, Бэрбэч Рэмэзан сымэ яхуригъэхьырти, ечэнджэщырт. Макъамэ и лъэныкъуэкIэ ар дэлэжьащ композитор цIэрыIуэ ХьэIупэ Анзор, клип зыбжани трахыну хунэсащ.
Зи гугъу тщIы Роберт и ныбжьэгъухэм фIыщIэшхуэ ябгъэдэлъщ ар утыку къызэрихьамкIэ, къызэрытцIыхуамкIэ, нобэ езыр тхэкIыжами, уэрэд щыжиIэ клипхэр лъэпкъым къызэрыхуэнамкIэ. И ныбжьэгъухэм щхьэкIэ кIыхьу шхыдэфынут Роберт, и IэдакъэщIэкIхэр хэIущIыIу зэращIам щхьэкIэ. И укIытэр къытекIуэрти, и усэхэр къагъэсэбэпыну щариткIэ, и цIэр кърамыIуэну елъэIурт. Ауэ апхуэдизу творческэ зэчий ин зыбгъэдэлъу гупсысэ куухэр усэбзэкIэ къэзыIуатэ лIым и цIэр дауэ къыумыIуэнрэт. «КъуРш» цIэ лейр фIащри, зыкъомым зэIэпахыурэ, итIанэ адыгэ зэхыхьэхэм, макъамэ пшыхьхэм, еджапIэхэм ирагъэблагъэ щыхъум и цIэ дыдэри къыщIэщат.
Къул Амир цIыхубэ тхакIуэ IутIыж Борис и IэдакъэщIэкIым къытрищIыкIыу игъэува «Нартхэ я дыгъэ» япэ адыгэ мюзиклыр ди республикэм дахэу щагъэлъэгъуауэ щытащ. Ар Урысейм и къалэхэм яшэн папщIэ урысыбзэкIэ зэдзэкIын хуейт, ауэ Амир хэт зыхуимыгъэзами, зыри тегушхуакъым IутIыжым и лэжьыгъэм зрипщытыну. Абы щыгъуэм Къулыр и ныбжьэгъум елъэIуащ, зэрыхузэфIэкIынур ищIэрти, хигъэзыхьауэ жыпIэ хъунущ ар урысыбзэкIэ зэридзэкIыну. Абдежи Роберт къелъэIуат, «си цIэр зыщIыпIи къыщыхыумыгъэщыну псалъэ къызэптмэ, зэздзэкIынщ», - жиIэри. АрщхьэкIэ, зэныбжьэгъухэм къызэралъытэмкIэ, апхуэдэ зэчий ббгъэдэлъу Тхьэм укъыщIигъэщIар ар цIыхубэм ялъэбгъэIэсын щхьэкIэщ. Роберт и цIэр абы иужькIэ пхуэбзыщIыжынутэкъым, лэжьыгъэр апхуэдизкIэ фIыуэ къехъулIати. ИтIанэ и усэхэри уэрэдхэри дунейм нэхъ къытехьэ хъуащ. АдэкIэ ХьэIупэ Анзор тригъэчыныхьурэ, Роберт итха уэрэдхэм елэжьурэ, фащэ щыгъыу езы авторым жиIэу зыбжанэ трыригъэхащ.
Щхьэм къихьэ, гум къикI гупсысэхэр усэбзэкIэ къэIуэтэныр и щIасэми, и цIэр лейуэ жригъэIэнутэкъым Роберт. «Сэ сыусакIуэкъым икIи сытхакIуэкъым, си гум щыщIэр къэсIуатэ къудейуэ аращ, ауэ мы си «пэщIэщIэгъухэм сащащ», Къэбэрдей псом сыкърагъэлыжащ», - жиIэу гушыIэурэ къехъурджауэт абы деж дызыша Амиррэ Хъусенрэ.
ТхьэмахуитI къудей хъууэ арат Роберт иужьрейуэ иригъэтха, траха уэрэдыр дунейм къызэрытехьэрэ. Ар хуабжьу гущIэм нэс, купщIэ зыхэлъ, ди лъэпкъ тхыдэм и напэкIуэцI фIыцIэхэр нэгум къыщIэзыгъэхьэ уэрэд куу хъуат, абы теухуа си гупсысэри кIыхьу щыхуэсIуатэм:
- Сыту фIыт мы адыгэм ди щхьэ кърикIуа гузэвэгъуэшхуэр сэ зэрызыхэсщIэр фи деж нызэрысхьэсыфар. Нобэ сыадыгэщ жызыIэ дэтхэнэ зыми и гум хэкIакъым а узыр. Ди лъэпкъым лейуэ къытехьар дэ тщыгъупщэнкIэ Iэмал иIэкъым. Си уси, си уэрэди а Iуэхум нэхъ теухуауэ щIыщытыр арагъэнщ, - жиIат.
Егъэлеяуэ адыгэгу иIэт Роберт. КъызыхэкIа лъэпкъым, къызыдэкIа къуажэм, къэзылъхуахэм я фэеплъым папщIэ и псэр итыну хьэзыру псэуащ. Аушыджэр щыщт Къущхьэр, и адэшхуэм, и адэм я лъапсэ исыжт, абыхэм ирагъэжьа псэукIэм езыми къыпищэу. Адыгэ унагъуэ дахэт, щIалитI иIэщи, гъэсащ, еджащ, унагъуэ яухуащ, адэфIым и щапхъэр я гъуазэу мэпсэу. И щхьэгъусэ Хьэлимэт егъэджакIуэщ, унэгуащэ ахъырзэманщ, и пэшхьэкум илъ мафIэр зэи ужьыхыркъым. Арыншауи хъунутэкъым - пщIантIэм дэт унэ зэгуэтышхуэм адыгэ хьэщIэщ щхьэхуэ къыпыщIыхьауэ Роберт деж щепсыхыр мащIэтэкъым. Мы хэгъэгум къихьауэ щIыпIэм и дахагъэр, лъэпкъым и хабзэр, адыгэм и цIыхугъэр, къиIэт ерыскъыр, тхыдэ гъуэгуанэр, нобэ здынэсар ебгъэцIыхуну ухуеймэ, Роберт деж Аушыджэр пшэмэ, псори къыщищIэнут. Сыт щыгъуи хьэзырт ар и акъылкIэ, щIэныгъэкIэ, цIыхугъэкIэ, жумартагъкIэ къыбдэгуэшэну. Философ пэлъытэм хуэдэу шэрыуэт, щIэнгъуазэ Iувым хуэдэу акъылкIэ бейт Роберт.
И адэ-анэ Къущхьэ Пётррэ Жанусэрэ пщIэшхуэ яIэу дэсащ Аушыджэр. Ахэр пщIэ зиIэ егъэджакIуэхэт, курыт еджапIэм илъэс 50-кIэ щылэжьат. Ноби Къущхьэ Пётр и цIэр жылэм и уэрамхэм ящыщ зым зэрехьэ. И адэм и IэщIагъэр къыхихыжри, Роберти илъэсипщI хуэдизкIэ физикэмкIэ егъэджакIуэу лэжьащ. И щIалэгъуэм спортым дихьэхыу щытащ, бэнэкIэ хуитымкIэ зэхьэзэхуэхэм пашэныгъэхэр къыщихьу, лIыпIэ иува нэужь щIым телэжьыхьу къэгъуэгурыкIуащ. АдэфIым хуэщ къуэфIу дунейм тетащ Роберт, лъэужь дахи къигъэнащ. Быдэу си фIэщ мэхъу я адэм и фэеплъыр я гъуазэу БетIалрэ Иналрэ гъащIэм дахэу зэрыщыпсэунур. Я адэм къимыгъэщIар Тхьэм къахупищэ щIалитIым.
