Урысей Федерацэм футболымкIэ и етIуанэ лигэм и Япэ гупым и «Б» зонэм щыIэну зэхьэзэхуэм нобэ щIедзэ. Сыхьэт 16-рэ дакъикъэ 30-м Налшык и «Спартак» стадионым ди щIалэхэм къыщрагъэблэгъэнущ Владикавказ и «Алания-2» командэр.
Зэхьэзэхуэм и пэ къихуэу, вэсэмахуэ, «Спартак-Налшыкыр» зэрыщыту IущIащ къыдэщIхэм. Абыхэм я зэпсэлъэныгъэр купщIафIэт икIи хэкIыпIэфIхэр къызэралъыхъуэт. УпщIэхэри жэуапхэри и щыхьэтт зым адрейм пщIэ зэрыхуищIым икIи куэдкIэ лъэныкъуэхэр зэрызэщыгугъым. КIыхьу екIуэкIа псалъэмакъым нэхъ хьэлэмэту къыщытщыхъуахэм фыщыдогъэгъуазэ:
- Фызыхыхьэ зэпеуэм сыт хуэдэ мурадхэр щывиIэ? Дыщыгугъ хъуну ерыщу фебгъэрыкIуэну, фи джэгукIэ дахэмкIэ дэрэжэгъуэ къыдэфтыну?
- Ди джэгукIэр щIэх-щIэхыурэ дохъуэж икIи абы Iэмал къыдет хьэрхуэрэгъухэр дгъэбэлэрыгъыну, ехъулIэныгъэхэр зыIэрыдгъэхьэну. Къапщтэмэ, блэкIа зэхьэзэхуэм топ куэд щыдэдгъэкIыну тхузэфIэкIащ. ДяпэкIэ дызыхущIэкъун хуейр нэхъ мащIэ къызэрытхудагъэкIынращ. Абы долэжь. Ди мурадщ адэкIи ди къару псори джэгупIэ губгъуэм къиднэну.
- МылъкукIэ фи Iуэхухэр дауэ щыт?
- Дэтхэнэ зыри хуейщ мылъку нэхъыбэ къратыну. Дэ абы и Iуэху зыдохуэ. УлахуэкIэ щIыхуэ ттелъкъым, ар псом ящхьэщ.
- ЩIэзыдзэ зэхьэзэхуэм къалэн пыухыкIахэр щыфхуагъэува?
- Дызыхэт гупым дыщытекIуэну дыхущIэкъунущ.
- Урысей Федерацэм футболымкIэ и кубокым ехьэлIа зэхьэзэхуэм щыщIэвдзэнур дапщэщ?
- ЗэкIэ зэхэкIакъым абы теухуа зэхьэзэхуэм дэ дыщыхьэнур дапщэщми. ЗэрыжаIэмкIэ, шыщхьэуIу (август) мазэм зэпеуэр зэхаублэнущ.
- ХъутIэ Анзоррэ Дэхъу Ислъамрэ «Спартак-Налшыкым» зэрыхэкIыжам теухуауэ сыт къыджефIэфын?
- Щхьэусыгъуэр гурыIуэгъуэщ, я Iуэхур нэхъ щыдэкIын абыхэм къалъыхъуэ. Дыщыгугъынщ, ахэр зэрытхэкIыжар гупым и джэгукIэм зэран хуэмыхъуну. НэгъуэщIхэр къэтщтэнщ, дгъэсэнщ. Псалъэм папщIэ, щIалиплI зыхэдгъэхьакIэщ. Ахэр Кърымым къикIыжа гъуащхьэтет Къумыкъу Аслъэнбий, топджэгухэу Блий Елдар, Гуэгузокъуэ Андемыр, Березов Давид сымэщ.
Псалъэмакъым и кIэухым «Спартак-Налшыкымрэ» абы къыдэщIхэмрэ зэгъусэу сурэт зытрагъэхащ икIи къызэрыгъэгугъащ футболистхэм я къару псори джэгупIэ губгъуэм къыщагъэнэну, къыдэщIхэм зэралъэкIкIэ гупыр трагъэгушхуэну.
Хьэтау Ислъам.