Спорт

Кавказ Ищхъэрэ щIыналъэм атлетикэ псынщIэмкIэ и чемпионат Ставрополь къалэм щекIуэкIащ.

Шабзэ

СпортымкIэ мастер, дунейпсо класс зиIэ, КъШР-м и депутату, дунейм самбэмкIэ и чемпиону щыта Къуныжь Мухьэмэд и фэеплъ урысейпсо зэпеуэ Черкесск къалэ щекIуэ­кIащ. Къэбэрдей-Балъкъэрым и спортсменхэм а зэхьэзэхуэм медалитху къыщахьащ. 

Налшык къалэм щекIуэкIащ цIыхухъухэмрэ цIыхубзхэмрэ зыхэта, Къэбэрдей-Балъкъэрым стIолыщхьэ теннисымкIэ и чемпионат.
ЦIыхубзхэм я деж япэ щыхъуащ Котовэ Анастасие, етIуанэщ Дэхъу Дисанэ, Тазиевэ Даринэ ещанэщ.
ЦIыхухъухэм я деж бжьыпэр щиубыдащ Чимбарцев Владислав, Чэгъэду Ислъам етIуанэщ, ещанэ увыпIэр къихьащ Сибэч Къантемыр.

Налшык щекIуэкIащ спорт гимнастикэмкIэ зэхьэзэхуэ. Абы хэтащ Къэбэрдей-Балъкъэрым, Ставрополь крайм, Дагъыстэным, Шэшэным щыщ спортсмени I20-м нэблагъэ. А зэхьэзэхуэм ныбжьыщIэхэм спортымкIэ мастерым и кандитатым, апхуэдэуи, япэ, етIуанэ, ещанэ разрядхэм я мардэхэр щагъэзэщIащ.
Спортым и мастерым и кандидатым и мардэхэр ягъэзащIэу, япэ увыпIэр къахьащ щIалэхэм ящыщу КъуэщIысокъуэ Алим, Григорян Нарек, Шэшэн Эмир сымэ.

Налшык дэт универсальнэ спорткомплексым щекIуэкIащ 2010 - 2011 гъэхэм къалъхуа ныбжьыщIэхэм дзюдомкIэ я республикэпсо зэхьэзэхуэ. Ар къызэрагъэпэщащ Урысейм щIыхь зиIэ и тренер Ныр Сеф и фэеплъу

Яламов Эдуард и фэеплъу Екатеринбург гъэ къэс къыщызэрагъэпэщ урысейпсо щIымахуэ зэхьэзэхуэм ехъулIэныгъэ къыщигъэлъэгъуащ Къэбэрдей-Балъкъэрым щыщ спортсмен цIэрыIуэ Ласицкене Марие.
А зэпеуэм, хабзэ пыухыкIам тету, саугъэт I3-м щыщIэбэнащ. Абыхэм ящыщт атлетикэ псынщIэмкIэ къызэрагъэпэща зэпеуэри. А лIэужьыгъуэмкIэ зэпеуэну къэралым и спортсмен нэхъ лъэрызехьэхэр зэрихьэлIат.
Ласицкене Марие и хьэрхуэрэгъу цIыхубз псоми ятекIуэри, Башкирием щыщ цIыхухъур иужьрей зэIущIэм хьэрхуэрэгъу къыщыхуэхъуащ.

КъБР-м Олимп резервымкIэ и школым и гъэсэн, илъэсипщI фIэкIа мыхъу Батыр Софие Пензэ къалэм псым есынымкIэ щекIуэкIа урысейпсо зэпеуэм дыжьын медалыр къыщихьащ. А зэхьэзэхуэм Урысейм и щIыналъэхэм къикIа сабий 200-м нэблагъэ хэтащ. Къэбэрдей-Балъкъэрым щыщу Батырым и закъуэщ абы кIуэфар.
Иужьрей илъэсипщIым къриубыдэу апхуэдэ лъагапIэм нэсыфауэ диIэр Софие и закъуэщ. Метрищэ зи кIыхьагъым абы етIуанэ увыпIэр щиубыда нэужь, метр 200-м ещанэ щыхъуащ, абы и фIыгъэкIи, етIуанэ спорт разрядым и мардэхэр игъэзэщIащ.

 «Спортыр узыншагъэщ» къыхуеджэныгъэм щIэту, шахматхэмкIэ сабийхэм я зэхьэзэхуэ Налшык щекIуэкIащ. А зэпеуэм хэтащ КъБР-м и щIыналъэхэм къикIа щIалэрэ хъыджэбзу 80-м нэблагъэ.
Зэхьэзэхуэр я ныбжь елъытауэ Iыхьищу гуэшауэ щытащ, разряд яIэхэми тещIыхьауэ.
Зыхэта гупхэм япэ увыпIэхэр къыщахьащ Николаевэ Софье, Ахматовэ Аминэ, БжьыхьэлI Каролинэ, УнэлIокъуэ Даниял, Жабоев Имран, Теунэ Амир сымэ.
Машэжь Рустам, Курманаевэ Иссанэ, Iэщыжь Iэдэм Ханукаевэ Елизаветэ, Ульбашевэ Аминэ, Карамазов Къасболэт етIуанэ хъуахэщ.

ФэкIи, бзэкIи, хабзэкIи, дуней тетыкIэкIи зэхуэмыдэ цIыху куэд зэришэлIат Катарым щекIуэкIа топджэгумкIэ дунейпсо зэхьэзэхуэм. Ислъамыр мамырыгъэм и дину зэрыщытыр я нэкIэ ялъагъуну Iэмал иIащ дунейпсо цIыхубэм.