IэпщIэлъапщIэхэм я кIыщКъБКъУ-м архитектурэмкIэ, ухуэныгъэмрэ дизайнымкIэ и институтым къыщIигъэкI IэщIагъэлIхэм гъунэгъу республикэми хамэ къэралхэми щIэупщIэ щаIэщ. IуэхущIапIэм тхыдэ дахэ къыдокIуэкI. 1957 гъэм япэщIыкIэ ар «Инженер-ухуэныгъэ факультет» цIэр иIэу къызэIуахащ. 1960 гъэм щыщIэдзауэ ар «Инженер-техникэ факультет», 2015 гъэм ар «Политехникэ институт» хъуащ. 2016 гъэм къыщыщIэдзауэ «АрхитектурэмкIэ, ухуэныгъэмрэ дизайнымкIэ институт» цIэр зэрехьэ. ЕджапIэм кафедрищ иIэщ. Ахэр - «Архитектурэ проект, дизайн, декоративно-прикладной гъуазджэ»; «Ухуэныгъэ-производствэ»; «Ухуэныгъэ пкъыгъуэхэр, механикэ». КъищынэмыщIауэ, институтым дизайнымкIэ колледжи иIэщ, 1992 гъэм къызэIуахауэ. КъБКъУ-м егъэщIылIауэ къекIуэкIащ ар 1997 гъэм щыщIэдзауэ. 2016 гъэ лъандэрэ КъБКъУ-м ДизайнымкIэ и колледжыр КъБКъУ-м архитектурэмкIэ, ухуэныгъэмрэ дизайнымкIэ и институтым хагъэхьэжащ. Абы нэхъыбэу екIуалIэр зи хьэрычэт Iуэху къызэIузыхыжыну зи хъуэпсапIэ дэрбзэрхэрщ. IуэхущIапIэм щолажьэ УФ-м и цIыхубэ, КъБР-м щIыхь зиIэ я сурэтыщI, республикэм и Къэрал саугъэтым и лауреат, ХудожествэхэмкIэ Урысей Академием и член-корреспондент, ЩIДАА-м и академик, Красноярск ксилографиемкIэ щыIэ студием и къызэгъэпэщакIуэ икIи и унафэщI Пащты Герман и цIэр зезыхьэ творческэ центри. Институтым и унафэщI, техникэ щIэныгъэхэмкIэ я доктор, профессор Хэжь Анатолэ зэрыжиIэмкIэ, я еджапIэм нобэ студент 900-м щIигъу щIэсщ. ЕгъэджакIуэ 60 абыхэм ядолажьэ, я IэпэIэсагъэр ирагъэфIакIуэ. Студентхэм я хъуэпсапIэщ къалэм, абы и ухуэныгъэхэм нэхъапэм яIа архитектурэ теплъэр къагъэщIэрэщIэжу ирагъэфIэкIуэну, туристхэр кърашэлIэну, щэнхабзэмрэ гъуазджэмрэ хэлъхьэныгъэхэр хуащIыну. Институтым и егъэджакIуэхэм ящыщ куэд щIэныгъэмкIэ докторщ, кандидатщ. Ди республикэм и мызакъуэу, хамэ къэралхэми щIэупщIэ ин щызиIэ архитектор, ухуакIуэ, дизайн, декоративно-прикладной гъуазджэм и IэщIагъэлIхэр институтым къыщIегъэкI. КъыжыIапхъэщ, институтым и студентхэм я бжыгъэм гъэ къэс зэрыхэхъуэр. Институтым гъунэгъу республикэхэм, хамэ къэралхэм, къапщтэмэ, Сирием, Иорданием, нэгъуэщI щIыпIэхэм къикIа студентхэри щIэсщ. Ахэр инджылызыбзэщ зэрырагъаджэр. ЕджапIэ нэужьым абыхэм щIэупщIэ зиIэ IэщIагъэлIхэр къазэрищIыкIым и щыхьэтщ абы ящыщ куэд ди щIыналъэм нэмыщI, нэгъуэщI щIыпIэхэм, Сирием, Иорданием, Тыркум, Америкэм и Штат Зэгуэтхэм зэрыщылажьэр, IуэхущIапIэ инхэм я унафэщI зэрыхъуар, зи IуэхущIапIэ къызэIузыхыжаи, къэрал лэжьакIуэ, депутат хъуаи зэрахэтыр. - Илъэс 65-рэ хъуауэ инженер-ухуакIуэхэр къыщIыдогъэкI. Архитекторхэр япэу нэгъабэ къыщIэдгъэкIащ. А IэщIагъэм иIэ щIэупщIэм гъэ къэси хохъуэ, абы ущеджэну мытыншми. Ди студентхэр егугъуу а IэщIагъэм хуоджэ. Архитектурэр гъуазджэмрэ дизайнымрэ къыгуэхыпIэ имыIэу епхащ, – жеIэ институтым проект щIынымкIэ и кафедрэм и унафэщI ГъукIэлI Хьэзрэт. – Ди республикэр щIыр нэхъ щыхъей щIыпIэхэм ящыщу къалъытэри, ухуакIуэхэм ар къалъытэн хуейщ, псом хуэмыдэу къат куэду зэтет унэ щыдращIейкIэ. ГъукIэлI Хьэзрэт зэрыжиIэмкIэ, ухуакIуэхэмрэ архитекторхэмрэ щIыналъэм и хабзэхэм, дунейм и щытыкIэхэм зыхагъэгъуэзэн хуейщ, я лэжьыгъэр къайхъулIэн, псэуалъапхъэхэр тэмэму къыхахын папщIэ. Нэхъыщхьэращи, я IэщIагъэлIхэм я лэжьыгъэхэр пхагъэкIыфу, нэгъуэщIхэм ейм зэрефIэкIыр къагъэлъэгъуфу щытын хуейщ. Институтым жыджэру долажьэ Урысейм, нэгъуэщI къэралхэм я еджапIэхэмрэ щIэныгъэ къэхутэныгъэ щрагъэкIуэкI институт цIэрыIуэхэмрэ. Я студентхэр я зэфIэкIым щоплъыж зэхьэзэхуэ зэмылIэужьыгъуэхэм. ЦIыху мелуанхэр зыхэт урысейпсо зэпеуэ зыбжанэм ахэр зэрыщытекIуам еджапIэм и унафэщIхэмрэ егъэджакIуэхэмрэ дамэ къытрагъэкIащ, щIалэгъуалэри IуэхущIэхэм трагъэгушхуащ. ТЕКIУЖЬ Заретэ.
Поделиться:
Читать также:
03.05.2024 - 10:01 →
Куржы фIэщыгъэхэм я тхыдэ лъабжьэхэр
30.04.2024 - 13:00 →
Гъатхэмэ къапех
29.04.2024 - 10:01 →
Дахагъэ къэзыгъэщI
29.04.2024 - 10:01 →
Хэку лъагъуныгъэм теухуащ уэрэдхэр
29.04.2024 - 10:01 →
Зэныбжьэгъугъэм и дамыгъэ
|