Саугъэт нэхъыщхьэр къахь

Тхьэмэдокъуэ Маринэ зи художественнэ унафэщI, «Дархан» къэфакIуэ ансамблым иджыблагъэ Сочэ къалэм щекIуэкIа «Алые паруса» международнэ зэпеуэм и саугъэт нэхъыщхьэр къыщыхуагъэфэщащ. 

Зэпеуэм хэтащ къэрал зэмылIэужьыгъуэхэм я гупхэр. «Дархан» ансамблым Гран-при саугъэтыр къызэрахьам къыдэкIуэу, ахэр нэхъыфIу къыщалъытащ зэхьэзэхуэм и лIэплIым. КъэпщытакIуэхэм ягу ирихьащ «Парный танец», «Лъапэрисэ», «Убых къафэ», «Джэгу къафэ» къафэхэр.

«Дархан» ансамблым екIуу зыкъыщигъэлъэгъуащ «Кубанский казачок» XXV урысейпсо фестивалми. Абы гупыр щэнейрэ лауреат щыхъуащ. 

Фигу къэдгъэкIыжынщи, «Дархан» ансамблыр нэгъабэ Къэбэрдей-Балъкъэрым и цIэкIэ хэтащ гъуазджэмрэ щэнхабзэмкIэ Москва щекIуэкIа «Зэныбжьэгъугъэм и лъэмыж» урыс-китай международнэ фестиваль-зэпеуэм. Гупым абы щигъэзэщIа «Лъапэрисэ» къафэмкIэ икIи зэхьэзэхуэм и лауреат хъуащ. Фестивалыр къызэригъэпэщат сабий творчествэмкIэ «Мост-Контакт» фондым, сабий творчествэм зегъэужьынымкIэ зэгухьэныгъэр, Китай ЦIыхубэ Республикэм ЩэнхабзэмкIэ и министерствэр и дэIэпыкъуэгъуу.