Искож хьэблэм иджыблагъэ Щэнхабзэ зыужьыныгъэмкIэ центр къыщызэIуахам щыIущIащ КъБР-м Тхылъыр фIыуэ зылъагъухэм я литературэ клубым хэт тхакIуэ ныбжьыщIэхэм. Пшыхь гуапэр къызэрагъэпэщащ «Алые паруса» щэнхабзэ клубым и лэжьыгъэм хыхьэу.
ЗэIущIэм ирагъэблэгъащ республикэм къыщацIыхуа, творческэ проектхэм жыджэру хэт тхакIуэ, усакIуэхэу Щомахуэ Дарье, Мазуренкэ Маринэ, Хаджиевэ Джамилэ, Рамонов Алан.
Пшыхьым щытепсэлъыхьащ литературэм, иджырей усыгъэм, абыхэм гъащIэм щаубыд увыпIэм, тхылъеджэхэмрэ тхакIуэхэмрэ я зэхущытыкIэм. Ирагъэблэгъа тхакIуэхэмрэ усакIуэхэмрэ къеджащ я тхыгъэхэм.
ТхакIуэхэмрэ усакIуэхэмрэ я гъащIэм щыщ щапхъэ куэд къахьащ, литературэм хаухуэнам щыщу. Махуэ къэс дызэсэжа къэхъугъэхэм ахэр бзэ щIэщыгъуэкIэ топсэлъыхь, удимыхьэхынкIэ Iэмал имыIэу.
- Псалъэм и мыхьэнэм зэи кIэрыхуркъым, нобэ, Iэмэпсымэхэм я зэманым, зэпсэлъэныгъэр зэпэIэщIэ Iэмалым тету и нэхъыбэм екIуэкIми, - жиIащ «Солнышко» сабий журналым и редактор нэхъыщхьэ Щомахуэ Дарье. - ТхакIуэ ныбжьыщIэхэм папщIэ къэралым зэхыхьэ, мастер-класс зэмылIэужьыгъуэхэр щокIуэкI. Ауэ езы тхакIуэ ныбжьыщIэрщ зэлъытэжар апхуэдэ зэхыхьэрэ зыужьыныгъэрэ ар хуэныкъуэрэ хуэмыныкъуэрэ. Къапщтэмэ, Налшык я ныбжькIэ гуэшауэ усакIуэхэм я зэгухьэныгъэхэр щыIэщ.
Щомахуэм игу къигъэкIыжащ КъБР-м Тхылъыр фIыуэ зылъагъухэм я зэгухьэныгъэм ныбжьыщIэхэм я литературэ клуб къызэрыщызэIуахар, абы хыхьэу зэIущIэ щхьэпэхэр зэрырагъэкIуэкIар.
Зэхыхьэм хэтхэм я цIэ ираIуащ литературэм, абы и жанрхэм зэфIэкI щызиIэу къалъытэхэм. Апхуэдэу къытеувыIащ гъунэгъу щIыналъэхэм, къэбгъэлъагъуэмэ, Дагъыстэн Республикэм щIэупщIэ ин зиIэ усыгъэ театр къызэрыщызэIуахам. КъищынэмыщIауэ, а республикэм и ТхакIуэхэм я зэгухьэныгъэм щIалэгъуалэ литературэ зэхуэс зэрыщащIым, сабии ныбжьыщIи абы зэрызэхуишэсым тепсэлъыхьащ.
ЗэIущIэм къыщыхалъхьащ республикэм усыгъэ фестивалхэр, выставкэхэр, пшыхьхэр щрагъэкIуэкIыну. «Алые паруса» щэнхабзэ клубым и унафэщI, щэнхабзэм теухуа жэрдэмхэр къыщыхалъхьэ «Мирт» центрым и унафэщI Уэрдокъуэ Юлэ тепсэлъыхьащ КъБР-м и Жылагуъэ палатэм и «Живое слово» проектым. Абы тхакIуэ, усакIуэ ныбжьыщIэхэр зэхуешэс. НобэкIэ хунэсагъэххэщ зэхыхьэ щIэщыгъуэ зыбжанэ къызэрагъэпэщыну. Абдеж къыщыхалъхьащ къалэм къэзыщтагъащIэхэм я зэпеуэ фокIадэм ирагъэкIуэкIыну.
