Ди газетым зэрытетащи, куэд щIакъым Тыркум щыпсэу адыгэ бзылъхугъэ щыпкъэ, лъэпкъым ирагъэбгына щIыналъэр нэхъыжьхэм фIыуэ зрагъэлъэгъуахэм ящыщ, IэпэIэсэ, Кападокие Тхыдэмрэ гъуазджэмрэ я музей къыщызэIузыха Гуэбэл Сибел (Езауэхэ я пхъурылъхущ), абы и къуэ Серкан, ипхъу Селдэ сымэ Налшык зэрыщыхьэщIэрэ. Сибел дыщыхуэзам къыджиIэжа хъыбар гъэщIэгъуэнхэм ящыщт и адэм къыхуиIуатэу щыта таурыхъхэм ящыщ зыр. А псысэ дахэ цIыкIум ди газетым и электроннэ къыдэкIыгъуэм кIэлъыплъхэр фыщызгъэгъуазэмэ, си гуапэщ.
– Зы хъыджэбз дахэм зы щIалэ Iейуэ егуэкIуат, арщхьэкIэ ар къратыртэкъым, жи, унагъуитIым я зэхуаку зэгуэр къаугъэ дэлъати. Дауэрэ Iуэхум бгъэдэмыхьами, зыри къехъулIакъым. Иужьым кIуэри, мэзым щIэс уд фызыжьым елъэIуащ. Абы и лъэIур дахэу, кIыхьу, зэгъэкIуауэ жиIэрт си адэм, абы щыщу сигу къинар вжесIэнщ. «Си гум фIыуэ илъагъуу зы хъыджэбз щыIэщ, ауэ ди адэхэр зэзэуащи, зи къызатыркъым. Сэ си лажьэр лIо? Хъыджэбзри къысхуейщ, арщхьэкIэ нэхъыжьхэм зэщIыгъу дыхъуу ядэркъым, къэзгъэкIуэсэнути соукIытэри, апхуэдэуи схуэщIэркъым», – жиIэу къыщIидзэри, зыхуигъэтхьэмыщкIащ, хуэтхьэусыхащ.
– Абы щыгъуэм сэ зы мастэ уэстынщи, ар сэбэп хъунущ. Ауэ ар зыIэрыбгъэхьэн папщIэ мо къуршым удэкIыу къэбгъэзэжын хуейщ, – жиIащ удым.
Плъэмэ, Iуащхьэмахуэ елъагъу.
– Абы дауэ сыдэкIыну? – щыжиIэкIэ:
– Хъыджэбзым ухуеймэ, удэкIынщ, – жиIащ жи.
ТIэкIурэ щысри, щIалэр щIэпхъуащ. Зыкъомрэ кIуэри къигъэзэжащ.
– Мыбы нэмыщI зыгуэр сщIэфыну пIэрэ мастэр къыщIызэптыну? – щIэупщIащ. – СыдэкIыфыну си гугъэкъым.
«Хьэуэ» къыщыжриIэм, аргуэру щIэпхъуащ, ешри къигъэзэжащ. Апхуэдэу зыбжанэрэ къыщыкIуэжым фызыжьым къыжриIащ:
– Апхуэдизрэ удэкIыну ущыхуежьэкIэ, хъыджэбзыр фIыуэ плъагъур пэжщ. Аращи, къарууэ уиIэр зэхэплъхьэмэ, удэкIыфынщ. Зы мастэ цIыкIу узотри, уи къэшэным ет, ар и лъакъуэм хрегъауэ, щхьэгъубжэм деж щыту, – жиIащ жи фызыжьым.
Арэзы хъуащ щIалэр къыжриIамкIэ. КъикIукI-никIукIыу куэдрэ бжэIупэм Iутащ щIалэр, хъыджэбзыр и закъуэу имылъагъуу. Иужьым жыг лъабжьэм щIэтIысхьэри егупсысащ, жи. «Иджы мыр абы естрэ и лъакъуэм хигъауэмэ, и псэр узынщ. Дауэ хъуми сэ езым зыхэсIужынщи нэхъыфIщ», – жиIэри. Зэрызыхигъауэу бзу хъуащ. Зи хэтыр зыми ямыщIэ бзу-щIалэр хъыджэбзым деж кIуэурэ, епсалъэурэ къыдихьэхщ, къигъапцIэри Iуащхьэмахуэ щхьэдихьэхри, тхъэуэ псэууэ къэнэжащ, жи.
P.S. Хэкум къыщамылъхуа, къыщымыхъуам я дежкIэ Iуащхьэмахуэ зэры-Тхьэпэлъытэр наIуэу къызыхэщ зы таурыхъ гъэщIэгъуэнкъэ Сибел къыджиIэжар?!
