Гъэ джэгугъуэщIэм жыджэру зыхуэзыгъэхьыр «Спартак-Налшыкыр» тренерыншэу къэнащ мы махуэхэм. Иужьрей илъэситIым командэм дэлэжьа Биджиев Хьэсэнбий Дагъыстэным и Мэхъэчкъалэ и «Динамо»-м ирагъэблэ гъащ. Дауи, мазэ-мазитI ипэкIэ апхуэдэ хъыбар ди футболеплъхэм къаIэрыхьауэ щытамэ, щыгуфIыкIынкIи хъунут, нэгъабэ дызыхэта дивизионым щыдиIа ехъулIэныгъэхэм тещIыхьауэ. Ауэ, иджыпсту, чемпионатым щIидзэжыным махуэ бжыгъэ фIэкIа къэмынэжауэ, нэхъыбэр хигъэгупсысыхьынущ: арыншами, зи Iуэхур мыщIагъуэ ди «Спартак»-р адэкIэ дауэ хъуну, жаIэу.
ЗэрытщIэщи, командэр щытекIуэм деж фIыщIэри щIыхьри псоми я зэхуэдэщ, ауэ Iуэхур дэмыкI зэрыхъуу псом япэ лей къызытехьэри, мыхьыр зрагъэхьри тренерым и закъуэщ. Ауэ Биджиевым и зэфIэкIымрэ и Iэзагъымрэ къамылъытэу ауэ сытми, зэрыжаIэу, къыгуалъэфу я деж яшакъым ар дагъыстэнхэм. Уеблэмэ, УФ-м футболымкIэ и Япэ лигэм бжьыпэр щызыIыгъ, мы гъэми Премьер-лигэм хыхьэну щIэхъуэпс, абы щхьэкIи сыти зыщIэну хьэзыр Мэхъэчкъалэ и «Динамо»-м и тренер нэхъыщхьэм и къулыкъур дзыхь къыпхуащIыным пылъ жэуаплыныгъэр псоми къыдгурыIуэу къысщохъу.
ДызэрыщыгъуазэмкIэ, ахэр тренер куэдым яхэплъащ, ауэ, къыхэдгъэщынщи, хамэ къэралхэм щыщхэм ядэлэжьэн Iуэхур занщIэу ирагъэкIуэтэкIащ, икIи къытеувыIащ СССР-м и чемпионатым щыджэгуауэ, футболым фIыуэ хэзыщIыкI цIыху къыхахыным. Абыхэм хуэкIуэу къыщIэкIащ ди лъахэгъу щIалэр.
Биджиевыр я командэм щIрагъэблагъэм теухуауэ иджыблагъэ журналистхэм епсэлъащ Мэхъэчкъалэ и «Динамо»-м и президент Гаджиев Гаджи:
«Дыщогугъ и лэжьыгъэм ар пэлъэщыну. Апхуэдэ гугъэхэми лъабжьэ яIэщ – ар Мэзкуу и «Локомотив»-м, «Анжи»-м зэрыщыIарщ, и лэжьыгъэм и пIалъэ фIыуэ зэрищIэрщ. Дауэ мыхъуми, а лъэхъэнэхэм а командэхэм хэтахэр топджэгу цIэрыIуэ защIэщ. Иужьрей илъэсхэм Биджиевыр Налшык щылэжьащ, арщхьэкIэ абы куэд щыпхуэщIэн, щыпхузэфIэкIын хуэдэу Iэмал иIакъым, ауэ езым и зэфIэкIыр сыт щыгъуи наIуэу щытащ. ШыIэныгъэ зыхэлъ, зи акъылыр зэрыубыда цIыху зэтетщ ар. Абы и хьэлымрэ и дуней тетыкIэмрэ, сэ сызэреплъымкIэ, Бердыев Курбан ейм тохуэ. Пэжщ, футболым щахузэфIэкIамкIэ адрейр къытокIуэ, ауэ дэри ди командэр иджыри зыщIыпIи нэсакъым».
Дагъыстэным и командэм и генеральнэ директор Газизов Щамили жеIэ бжьыхьэ кIуам клубым зригъэгъуэта ехъулIэныгъэхэм Биджиевым зэрыпищэфынум шэч къызэрытримыхьэр, командэм адэкIэ зэрызиужьынум ехьэлIауэ яIэ гупсысэхэри зэрызэтехуэр.
«Абы футболым фIыуэ хещIыкI, езыри джэгуащ, командэ зыбжанэм я тренер нэхъыщхьэхэм я дэIэпыкъуэгъуу, иужькIэ езыри тренер нэхъыщхьэу клуб зыбжанэм щылэжьащ, зэрыжаIэуи, и иужьрей псалъэр а спорт лIэужьыгъуэм иджыри щыжиIакъым», - къыхигъэщащ Газизовым.
Фигу къэдгъэкIыжынщи, 2021 гъэм «Спартак-Налшыкым» къэкIуэн ипэ къихуэу Биджиевыр ядэлэжьащ Курск къалэм и «Авангард», Волгоград и «Ротор» командэхэм икIи зэфIэкI хъарзынэхэр зэриIэр абыхэм къыщигъэлъэгъуащ.
Урысейм и командэ къыхэхам, Мэзкуу къалэм и «Локомотив»-м илъэс зэхуэмыдэхэм щыджэгуа топджэгу цIэрыIуэхэу Пименов Русланрэ Булыкин Дмитрийрэ зэдыжаIащ Биджиев Хьэсэнбий и лэжьыгъэм зэрыпэлъэщынур, абы щхьэкIэ зыхуэныкъуэ зэфIэкIи Iэзагъи зэрыбгъэдэлъыр икIи Премьер-лигэм щымыкIуэдын щхьэусыгъуэ зэрыщымыIэр.
Мэхъэчкъалэ и «Динамо»-м, зэрыжытIащи, иджыпсту УФ-м футболымкIэ и Япэ лигэм бжьыпэр щиIыгъщ, очко 37-рэ иIэу. Абы къыкIэлъыкIуэ «Химки» командэр зы очкокIэ къыкIэроху, ещанэр Тольятти и «Акрон»-рщ.
ЩIымахуэ зыгъэпсэхугъуэм, чемпионатыр щызэпагъэуам, Дагъыстэным и командэм и тренер нэхъыщхьэу абы щыгъуэ щыта Бердыев Курбан мазаем и 1-м и къулыкъум текIащ езым и фIэфIыныгъэкIэ, ауэ Iуэхум щхьэусыгъуэ хуэхъуар щхьэтечу нобэкIэ жаIакъым.
МыдэкIэ, Биджиев Хьэсэнбий командэм хэкIыжын ипэ къихуэу ди футболеплъэхэм псалъэ гуапэкIэ захуигъэзащ, зым щхьэкIи къамыгъанэу къазэрыдэщIам папщIэ фIыщIэ яхуищIащ икIи жиIащ ахэр ягъэгуфIэн, я дэрэжэгъуэр къаIэтын щхьэкIэ командэм лъэкI къызэримыгъэнар, ауэ зэрыхуейм хуэдэу Iуэхур сыт щыгъуи зэрымыхъуар.
Дэри дехъуэхъунщ ди лъахэгъу щIалэм и мурадхэр къехъулIэну, Дагъыстэным къыщыхуагъэува къалэнхэр екIуу щигъэзащIэу, абыхэм я «Динамо»-р Премьер-лигэм къахишэну, адэкIи и IэщIагъэм гузэгъэгъуэ къриту футболым илъэс куэдкIэ хуэлэжьэну.
Мыдрейуэ, «Спартак-Налшыкым» дежкIэ къэдгъэзэжынщи, иджыпсту Iэмалу щыIэр зыщ - ар зэман кIэщIым къриубыдэу тренер нэхъыщхьэ къэгъуэтауэ адэкIэ лэжьыгъэм пыщэжынырщ, гъэм и кIэми зыхэт гупым екIуу къыхэкIауэ, ищхьэкIэ дэкIуэтеинырщ. Дыщыгугъынщ апхуэдэу хъуну.